تنظيم (لا بوم)
الشخصيات : باشا، الضابط مدحت، عسكري
الباشا: ده ورق التنظيم الجديد ؟
مدحت: أيوه يا باشا
الباشا: وأخباره إيه...
مدحت: كله تمام يا باشا
الباشا: مدحت عايزك تركز شوية مش زي آخر 17 تنظيم إحنا عاملينهم مكانوش منطقيين أبداً
مدحت: أيوه يا باشا بس هنعمل إيه مكانش فيه أي تنظيمات
الباشا: عندك حق يعني هنقعد فاضيين
مدحت: ولا نروح بيوتنا بقى
عسكري: أي والنبي يا ريت يا باشا أحسن بقالي 4 تشهر ونص مشمتش ريحة تراب بلدنا (هيهيهيهي) أبو طشت – سوهاج .. أي والله (هيهيهيهيهيه)
الباشا: على محمد 33 سنة حلواني ... سمير عبده 44 سنة حلواني... خميس زكي 62 سنة (باستغراب) ممم حلواني
الباشا : حلواني حلواني حلواني.. (بقلق) إيه الموضوع يا مدحت
عسكري: أصله تنظيم زلابية يا باشا .. إي والنعمة آخر حلاوة ... (هيهيهيهههي)
مدحت: (بثقة) .. يا باشا التنظيم فكرته إننا لاحظنا في الفترة الأخيرة إن فيه طابور خامس في البلد ...
الباشا: باهتمام.. حلو قوي ومسكتوا الأربعة اللي قابليه؟
عسكري: لا يا باشا دي طوابير كتير قوي.. أي وعزة جلال الله البلد مليانة طوابير.. بس هما بيقولوا خمسة عشان الحسد.. وعلى رأي الشاعر.. "يغني" سلامتها أم حسد م العين وم الحسد ...
الباشا: وأهداف التنظيم؟
مدحت: تنمية وتشجيع ثقافة الرفض في المجتمع
الباشا: بثورة يااااه ؟... لأ... تثقيف رفاضة الشجع في التنمية .. لاااا ... ده خط أحمر يا مدحت ..
عسكري: أيوة فعلا يللا بره يا مدحت ... بره عشان الباشا يكمل لعب..
مدحت: إيه ده إيه ده...
عسكري: إهي.. ؟ مش بيقولك كارت أحمر يا مدحت هيهيهيههي
الباشا: ووسائلهم؟
مدحت: بيتخفوا ورا شغلهم كحلوانية ويسموا أسماء أوروبية كلها تبدأ بكلمة (لا)... ويخربوا عقول البسطاء ويبثوا بذورهم المريضة في حثالة المجتمع وشراذم الفقراء والمهمشين..
الباشا: المهمشين؟ !!!
عسكري: أيوه يعني اللي ساكنين تحت كوبري مهمشة يا فندم (هيهيههيهيه)
الباشا: وإحنا أحسن ناس تقلد ونحب الحاجات الغربية والناس زي البغبغانات ... ها وشمعتوا المحلات؟
مدحت: طبعا .... لا رين
لا؟ (بهلع)
لا كازيتا
لا؟ (بهلع)
لا بوار
لا (بهلع)
الباشا: 3 لا .. فعلا ده بيعلموا الناس حاجات أستغفر الله العظيم
مدحت: والأخطر المحل بتاع قائد التنظيم .. (يتمهل) لا بوم
الباشا: هه يعني فيها متفجرات ..
مدحت: شوف بقى انت يا باشا...
الباشا: ولاد ال... وصولا أنهم يغرروا بيا...
مدحت: فعلا يا باشا..
الباشا: الأندال خدعوني لغاية ما وصلوا لغرضهم..
مدحت: هو الموضوع وصل لكده؟
الباشا: وأكتر...
عسكري: وين هنادي يا اماي ... هيهيهيهي
مدحت: يا باشا اللي انكسر يتصلح
الباشا: مش ممكن أبدا..
مدحت: لا لا ممكن أنا أعرف دكتور كويس قوي للحاجات *** اللي زي كدة ..
الباشا : انت افتكرت إيه أنا حزين لأني كنت متعود
مدحت: أنا فهمت يا باشا... خلاص
الباشا: متعود أشتري منهم.. وأجرمت في حق بلدي.. سامحيني يا بلدي.. سامحيني يا بلدي..
عسكري: بلدي هي أمي .. ترعتها بتجري في دمي.. حتى لوني كحلي.. لون السحابة السودا
الباشا : بس فيه مشكلة جامدة في فكرة التنظيم ..
مدحت: خير يا فندم؟...
الباشا: هو إحنا عندنا حد يستجري يقول لا يا مدحت .. (بحزن) كدة الفكرة الجميلة دي هتضيع...
مدحت: هو .. أأأ ... يعني ... أيوة عندي فكرة يا باشا .. معظم أوربا ضد أمريكا دلوقتي إيه رأيك لو نقول إن العيال دول قابضين من فرنسا وألمانيا عشان – لا مؤاخذة - يهاجموا ويحرضوا ضد دولة يعني صديقة وكده
الباشا: أمريكا.. ؟
مدحت: هو فيه أصدق منها يا باشا؟
الباشا: برافو برافو يا مدحت .. يا ابن الإيه .. والموجة دلوقتي للتنظيمات العالمية.. روح غير ملف القضية بسرعة.. وأنا هتصل بالباشا الكبير...
عسكري: يا باشا والنبي ليا عندك طلب.. زي ما خدتوا الحلاونية.. اعملوا قضية لبتوع الفراخ عشان كيلو الفراخ البيضا بقى ب 11 جنيه.. والسماكين والحلاقين والترزية وبتوع السماد (هيهيهيهيهي)
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
هو ايه دا ؟ جميل اوي يا عاطف
فين سينيما عشرينات
الموضوع جميل جدا يا جماعة بس ابو تشت مش فى سوهاج دى اول مركز ف محافظة قنا
سمااااجة سخااااااااااااافة رزلة اوى