هلال رمضان
خِلت الدروبُ فما بها حَبّيبة
كله استقام وانصلح وبطلّ خيبة
كله اتعدل ما تشوفش منه العيبة
كان فين دا كله من زمان يا اخواننا ؟!!
ليه الصلاح والتقى والرشد والتوبة
ما نشوفها طول السنة غيرشي يادوب نوبة؟
وطول شهور السنة .. بالعند مشطوبة
باقي الشهور نتروش ..
نعمل ما يحلى لنا
يظهر هلال رمضان.. تكوي البنات الطرح
واللي ف حياته ما ركع .. تطرح ف إيده السبح
رغم ان طول السنة .. صوت الأئمة اتنبح
تقفل طريق النار..
وتدل ع الجنة
صوت المصاحف عِلِى.. يشكى التراب فوقها
حتى المساجد بكت من كتر أشواقها
للي مجافينها شهور .. لكن ف شهر الصوم
حاضرين ف كل الفروض..
ويحافظوا ع السنة
ف الميكروباص ألتفت .. مصحف شمال ويمين
أذكار ف إيد الولد . . أوراد مع مسنين
ومفيش أثر للكاسيت .. قرآن يا إما دعاء
تسلم يا شهر الصوم..
وتداوي ف وداننا
يظهر هلال رمضان تلقى العوج يتعدل
والناس دي غير الناس .. حال الجميع اتبدل
باقي الشهور اشتكت .. حسدت هلال رمضان
م النق عجّز.. كبر ..
ما لحقش يستنى
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
مشاركه
رمضان جئت فلا تسال عن فرحت الدنيــــــــــــــــــا سما بشعورها القران
رمضان جئت فلا تسال عن شوقنــــــا يا ليت كل شهورنا رمضــــــــــــــان
جملة جبارة يا أحمد والله ..
ربنا يباركلك
بس كانت محتاجه تتظبط شويه ...فى حاجات مش ماشيه مع بعض شويه!!!!!!!