يوميات نونا المجنونة!
أنا مهندسة الحمد لله طبعا، مش عارفة دي نعمة، ولا غضب من ربنا والله أعلم لكن على كل حال الحمد لله الواحد بعد ما خلص الكلية بشهادة بكالوريوس الهندسة قسم هندسة معمارية وفرحان بنفسه أشتغلت مع مهندس الحمد لله كنت برغم جهلي أفهم عنه، وهكذا بدأت المشاكل لأن أنا حاسة أنه مش بيفهم.. وهو حاسس العكس!
ومما زاد الطين بلة إن مهندس خريج معهد من أبو فلوس التحق بالعمل؛ لأني بنت كان هو مفضل عني برغم تفوقي عنه مضايقات أخينا بقي كانت إزاي ملفات مكتوب عليها اسمي يمسحوا ويكتب اسمه وأنا مش عارفة.. يقعد يلعب طول النهار وآخر اليوم يسحب الملفات من علي شبكة الشركة من جهازي ويقدمها أنها عمله تاني يوم..
الراجل ذو الزبيبة!
كل ما تيجي مهندسة جديدة يبدأ هو يتقرب لها وكان سبب رفد زميلة لنا أول ما جت الشغل كان يعمل لها شغلها وسايب شغلي أنا وهو لي أنا طبعا الموضوع ما جاش بس علي موضوع سرقة الشغل لكم إن تتخيلوا إن الفتى ذو الزبيبة قطر متر في وشه حاطط أفلام من إياها علي الجهاز المتوصل به جهازي والعجيب بيصلي والقبلة في اتجاه الجهاز وكل ما يحتاج لوحة أو يحب يشرحلي حاجة لازم يوجهلي الأوامر بأنه ينبهني بمسكة يد أو خبطة على كتفي!!
ها تقولوا تهزيق؟؟ والله ما عنده دم عادي أنه يتشتم ويتهزاء مش بيهمه أكيد واحد من الصنف ده وصل بالمحلسة والكدب بقى مديري (يا سبحان الله) وسيبت الشغل من قهرتي وجراء أسفين معتبر من أخينا..
رحنا شغل تاني الحمد لله ناس محترمة و مؤدبة ده بالنسبة للمهندسين إلى حد ما مؤدبين وأرحم من أخينا.. المهم طبعا البنت غير الولد بالذات لما تنزل تنفيذ بداية من ذهابي للموقع برغم أني محجبة ومحتشمة؛ لأني بعامل عمال لكن بداية من وصولي قرب الموقع تبدأ المضايقات.. أنا لاحظت إن معظم الرجال مش بيتوقفوا عن البحلقة في كل ست رايحة وجاية.. لابسة حشمة أو لا كلهم تقريبا ما سمعوش عن غض البصر!!
واحدة ست واحدة ست.. بص بسرعة
وصلت الموقع اللي أنا فيه مع مهندس و 2 أو 3 ملاحظين عمال و 6 أو7 عمال يبداء الصباح بأن يشتروا جريدة صفراء ويقرأوا فيها ويبدأوا يتناقشوا بقى في المواضيع إياها.. ييجي الفطار (طبعا بتسألوا هيشتغلوا امتى) بعد الفطار يبدأ فريق العمل في مراقبة كل أنثى تمر بالموقع والتعليق..
أسوأ يوم كنت فيه مع الفريق القومي للعمل بالموقع وقام أحدهم بمعاكسة سيدة غاية في الدمامة طبعا كان من نصيبي أنا كل الشتايم (قاعدة ليه وسط الرجالة؟!) وكل ما لذ وطاب من الشتايم..
نرجع لباقي يوم العمل.. بعد ما أكلوا وعاكسوا البنات والسيدات، يمر مندوب المالك لمعاينة سير العمل ويأخذ حظه من معاكسة كام واحدة معدية ويهرج شوية ويدي شوية أوامر لا قيمة لها ويطلب كام طلب من المقاول بداية من شريط من إياهم لفنانة مشهورة وصولا إلى ما تعرفونه..
فياجرا.. وقدامي!!
وأكتر مرة أتحرق دمي فيها خناقة بين مهندس المالك اللي في مقام مدير عام ومشرف علي رشوة تتكون من قرصين فياجرا أمامي أنا ومديرتي.. خناقة لا تتخيلوا بيشدوا الشريط من بعض ويقولوا معلش لا مؤاخذة ده علاج فيتامينات..!!
تفتكروا ده جو محترم ممكن بنت تشتغل فيه مش ها قولوا لكم طبعا إن ساعات العمال بيعاكسوني وأنا واقفة بكلام سافل وباسمع شتايم من الصعب علي أي بنت احتمالها والمشرفين بيستغلوا إن البنت غالبا مش متفوقة في التنفيذ ويرتشوا ويسكتوا علي شغل غلط ومعرضة لقلة أدب أي حد منهم في أي وقت..
أزمة الشغل واحتياجنا كلنا إن نشتغل هو ده اللي بيسكتني وأقول الحمد لله غيري يتمني بس يشتغل ولو في ظروف أصعب من كده تفتكروا ترضوا لأخت ليكم التعرض لكل ده؟؟ أنا عرضت بس اللي باشوفه وما حبتش أحكي ما تتعرض له زميلاتي عشان ما جرحشي واحدة منهم بس إلى شافوه كان أصعب كتير مني.
- هناء من هناك!
* نونا المجنونة إحدى أنشط المعلقين على موقع عشرينات، وقد أرسلت إلينا هذا الموضوع الذي نفتح به الباب لجميع زوار الموقع لكي يرسلوا إلينا موضوعات مماثلة على: contact20at@yahoo.com
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
ربنا يهدينا
Sanyan sorry bakteb bel Language de 3alshan batee2 fel 3arabi ana!
Salesan...
gameel el Maqal da..
Go on Magnona Gurl!
Rabena yakatar men amsalek! lol
K. F.
sebek enty , '7aleeky fe sho'3lek mesh a7san ma teb2y keda hatla, asdy 3atla :D
rabena ma3aky ya magnoona :D
Haitham
wel daleel ennohom mesh bey3aksoki ente :p
haha, rabbena ma3ake ya o7'te al 3azeeza
Ahmed, ente 3arfa ba2a el ba2e lol
كل ده بيحصل قدامك يا انسه نونا ومش عايزه تقتنعي ان ما ينفع شغل للمرأه يا انسه انا اعرف شركة توظيف اموال في مصر فيها قسم للرجال وقسم للنساء ومستحيل يحصل فيها اي شىء او ربع الي بيحصل عندك فياريت تدوروا على الشركات دي
ربنا نعاكي
انا حطيت التعليق في المقال الغلط :(
العتب على النظر:(
سوري!
انا مقصدتش اقول ان شغل المرأة غلط لكن أختيار مجال العمل لازم يكون مناسب لطبيعة المرأة لان عمل زي التنفيذ يحتاج راجل اكتر .......الست ممكن تسد فيه اكتر منه لكن بتفقد رقتها و انوثتها و بتتبهدل
و كمان بعض الشباب العربي مخه عايز تصليح لاني برضة كان في مشاكل في عملي الاول برغم انه في مكتب مش في موقع ........ و احمد خان اشكرك و بتحرجني بذوقك :)
و قلبه علي الشغل
lol
u still donnu me !! :PP
الاخت العزيزة والمعلقة الموهوبة نونا المجنونة
أولا أهنيك علي حسك الراقي في التعامل مع الموضوع
أنا عن نفسي أعرف شركة كنت شغال فيها كان صاحبها شيخ بدقن علي صدره وبيحج كل سنة مرتين تلاتة ...ازاي معرفش
المهم صاحبنا متورط في علاقات من اياها مع كل بنت تشتغل في الشركة دي ..مرت الايام وقلتله في يوم عيب عليك اللي انت بتعمله ده
قالي يا اخي هذا جهاد ...انا بعمل ده علشان يقتنعوا ان عمل المرأة حرام
المهم انا مبسوط جدا بشغلك وفرحان بمقالك وخلينا نشوفك
انت ما قريتشي التعليقات من الاول ولا ايه؟؟؟
هاهاها
المقال بتاع عشرينات يا وائل لو هما موافقين يبقي مفيش مشكلة
زهور انا بحاول اراعي ربنا علي قدر المستطاع ادعيلي انت بس و انا فعلا بدرس دلوقتي لتحسين مستوايا العلمي :)
el mo7taram beyb2a mo7taram fe kol makana mahma kan el nas el 7awaleh 3amleen ezzay.. good job nona :)
god with you
TarEk.
الكلام التاني عن شركتنا و اكيد انت عارف بتكلم عن مين للاسف و مفيش مبالغة لانك كنت معاهم و انا عيانة و جربت بنفسك القعدة مع الناس دي
امال انا عييت من شوية يا بشمهندس :)
انت نسيته؟؟؟؟؟؟؟ اخص اخص اخص علي رأي سيادة المحافظ
aw tare2a bashe3a fel kalam yasta7eel 7ata el
wa7ed yehazar beha
yagel el ta2aklom 3al wad3 el 7ader wa 2ela fa talab 3'eer zalek mosta7eel le2en el bad2 fel esla7 mesh natgo hakoon lena now dah haykoon le 2a7fadna falazem el tafkeer fe l tawagod femawake3 el 3amal aktar lel nas ely zayek
3ashan ye7sal el ta3'yeer asl law kol wa7ed zehe2 we meshy we hereb men 3eshto yeb2a malnash e7na el forsa le ta7seen el mosta2bal
nase7ty el sabr leeky fe3lan we rabena be2ezno haysahel
اتاري البنت بتشتكي
هاهاها
سايبين لها الشغل وانت عمال تضيع الوقت تقرا قصص ؟؟؟
قدامك حل من 2
يا تحفظى لك كام قاموس اباحه و تسمعيهم من المنقى يا خيار على غيار الريق كل يوم ، مع طبق ردح و تكشيره حريمى من اللى بالك فيهم اللى تعقطع الخلف
يقوموا يتلموا لأن الشعوب العربيه افتقدت السلوكيات من زمان ، و اذا ارت ان تعيشى بن الحيوانات ـ دول مش ذئاب لأن الذئاب محترمه شويه ـ فلتكونى ذات مخالب
يا ترتاحى فى البيت و كفى الله المؤمنين شر القتال
و على فكره مش عشان انك ست بيعملوا كده ، ده بقى تصرفات طبيعيه عندهم ، و الحجاب ما بيدافعش عن حد ، كان زمان و جبر قبل ما تلبسه البنات و تروح بيه على ديسكو السندباد و هات يا رقص و خلع و كباية البيره مشبره
انا شخصيا اتعرضت لما هو اسوء من كده ، و اول مره سمعت شتيمتى بودانى بالصدفه و كان بيتكلموا على ماما الحاجه أم سامى و بيقولوا ابن الست اللى مش نضيفه
و طلعت فى دماغى اخوكى انه يكيل لهم ـ العبدلله كان لسه بصحته ساعتها و من الوزن التقيل ـ
و بعدين عقل الرحمن قال لى ياواد ماانت لو مكنتش قارفهم و قاطع عليهم الميه و النور مكنوش شتموك ، يبقى انا ماشى صح و كبرت دماغى
يا نونا يا بنتى انا مسكت مواقع اللعب فيها بالملايين ، و كان عندى واد فى الأداره مرتبه 640 جنيه ، و كل يوم يركب تاكسيات بعشره و لا خمستاشر جنيه ، زائد علبتين سجاير مارلبورو كان ، وقتها العلبه بثلاثه جنيه ، يعنى لقيت مصروفه الشخصى قد مرتبه، بالاضافه الى انه بيدفع اقساط 3 شقق تمليك
طيب بيعيش هو و بيته منين ؟؟ رحت جايب ملفاتهم واحد واحد
مطولش عليك بعدها بكام شهر لقيت على مكتبه علبه مارلبورو ، فتحتها لقيت جواها كليوباترا
ضحكت و قلت له ايه ده ، امال فين المالبورو ؟ بص بنظره تقطع القلب و قال لى ملبورو منين ياريس ما انت نشفتها
و ياما اتعرض على الواحد هدايا ـ رشاوى يعنى ـ و بطرق لذيذه و جديده ، يعنى مره بمناسبه السنه الجديده جات لى هديه بدل من النتيجه و الأجنده ، علبه صغيره شكلها حلو ، فتحتها لقيت جواها اسوره ذهب مرصعه بالألماس اللى قلبك يحبه
سألت مسئول الشركة اللى جابتها أيه ده ؟ قالى دى هدية راس السنه ! ايه ياحاج ـ على فكره كان برضه بزبيبه ـ هو انتو بتوزعوا دهب و الماظ ؟ قال ده مستوى شركتنا ، قلت له بس انا مبلبسش اساور ، قال دى للمدام ! قلت و المدام ارجل منى مابتلبسش حريمى
و اللى يعرض عليك خمسين باكو و يبكى و يقولك عشان خاطر النبى اجبر بخاطرى و أقبل منى الواجب البسيط ده ، اقول له عشان خاطر النبى عايزنى اقبل رشوه ؟ يقولك ليه بس كده يا بيه مش عيب برضه هو احنا بتوع كده ، ده حقك و خيرك علينا
قلت ماشى مادام انت شايف انه حقى يبقى خلاص ، و فقعت أهله ، اخدت منه الفلوس وندهت السكرتيره و ناولتها الفلوس قدامه ، قلت لها روحى الحسابات هاتى وصل بالمبلغ ده ، الحاج فلان اتبرع بيه لنقابة العاملين
بقى حيولع و يقول لأ دول عشانك ، قلت ماشى انت قلت لى دول حقى و انا حر اصرف فلوسى زى ما انا عايز
الدنيا كده و ماليانه عالم وسخه ، و لازم تبقى قد حالك أو تطفشى
على فكره انا طفشت فى الاخر ، لأن اعصابى تعبت و مش قادر اتحمل كل الفساد اللى فى البلد ، و خاصة ان خلقى ضيق و لسانى طويل
اما بادرة الخير و الأمل ان من يومين واحد زميل و صديق من موديلات زمان ، مسك منصب من المناصب المرعبه ، و أتصل بى و قال لى حط المبلغ اللى انت عايزه و انا موافق مقدما و ترجع
تشتغل فى مصر معايا ، بس بدون مبالغه ، قلت له مفيش مبالغه ، المهم نشتغل فى نضافه
و بدون ما كبار اللصوص يقرفونا
و على فكره على كلامك عن المهندز ابو جهل ، كان شغال معايا كبير مهندسين ـ كبيــــــــــــر ـ
بس ماشاء الله كان حمار ببردعه و الجهل نفسه ـ كانت مسميه الدكتور لأنه جايز يكون دكتور انما مستحيل مهندس ـ و الله يا نونا يا مجنونه كان يطلب قطع غيار و هو ميعرفش بتاعة ايه ولا تركب عنده ولا لأ
سامى عمران
للحق انا بدء يصيبني الاحباط و بدأت ازوغ و احس ان فلوسي حرام
لكن لازم اقف مع نفسي وقفه يا ابقي راجل و استحمل يا اسيب الشغلانه دي:)
يعني المفروض كل راجل ما يعملش الحاجات دي وكمان حتى لو شاف واحد معندوش دم بيعملها لازم ينهره. يا جماعة أنا نفسي حصلتلي مواقف أسوأ من كدة بكتير ومنها مواقف في أماكن العمل.. ده حتى المنتقبات ما سابوهمش.. ده أصحابي المنتقبات بيسمعوا كلام من المتنقي وكأن البيه الفتك شايف اللي تحت النقاب.
بصراحة أنا شايفة الموضوع ده مستفحل أوي ... لو كل واحد في الرجالة روح وسأل أخته أو مراته أو أمه أو خطيبته وشها حيحمر ويجيب عشر ألوان ومش حاتقدر حتى تقول ربع اللي بيحصلها في الشارع.
طيب بصوا أهي لستة بالحد الأدني من المواقف اللي بتحصل:
البحلقة من الجيران الذكور من غير دم ولا خشا لو حد فيهم صادف واحدة على السلم
البحلقة من كل من هم تحت العمارة وحوالين العمارة وإنشاءالله فوق العمارة والعمارات اللي حواليها
لو محظوظة وعندها عربية، فيه طبعاً بحلقة الشباب الروش اللي بيسوق جنبها وكمان بحلقة الكهول اللي معندهمش دم اللي بيبصوا بطريقة والله أخجل من وصفها
بحلقة أي حد ماشي في الشارع من ناس بتعدي أو سواقين عريبات أو ميكروباصات وعساكر المرور وهلمة جرا مش بعيد تسمعلها كام شتيمة من المتنقية من أي حد ماشي أو راكب وشتايم من اللي ممكن يكون فيه بعض الرجالة عمرهم ما قالوها. ده غير طبعاً المعاكسات الخارجة والداخلة والمهينة وعلى كل لون يا بطستا زي المثل ما بيقول. يعني أنا عن نفسي بين بيتي وشغلي مسافة ربع ساعة وبتشتم فيها تلات أربع مرات (على سبيل المعاكسة).
بالإضافة للكسر عليها ومنعها إنها تعدي على سبيل الإستظراف مش عارفة ولا حتى على سبيل الغيظ من إنها ست بتسوق زيها زيو (مرة سواق تاكسي واللي جنبوا شتموا واحدة صاحبتي شتايم خارجة علشان كانوا بيكسروا عليها ويعاكسوها وعرفت تهرب منهم وكان معاها مامتها وإخواتها البنات ولما وقفت عند ظابط المرور طلعوا يجروا). ومرة واحدة تانية راجعة من كلية الهندسة بعد الدنيا ما ضلمت وكانت مضطرة تتأخر علشان المشروع بتاعها، سواق ميكروباص شارب أو شامم فضل يعاكسها ولما كسرت عليه وهربت منه قام عامل أمريكاني وإعترض طريقها في نص شارع الأوتوستراد ونزل وشدها من شعرها من عربيتها !!!!
أما بقى لو حظها جميل جداً وبتركب مواصلات فحدث ولا حرج عن كل أنواع التحرش اللي ممكن واللي مش ممكن تيجي على بالكم. وطبعاً كل واحد نطع ماشي في الشارع واخد توكيل من هيئة التحرش العالمية تؤهله لفعل ما يريد بدءاً من البص ونهاية بما هو أكتر من مد الإيد وحسبي الله ونعم الوكيل. وكلنا عارفين قصة البنت اللي اتنشرت في جريدة الأهرام المصريو وجت في أحد برامج التليفيزيون، وهي عن البنت إلى ركاب الميكروباص والسواق إعتدوا عليها وهي راجعة من شغلها كممرضة في أحد المستشفيات باليل وسابوها بعد ما افتكروا إنها ماتت... كمان خطيبها لما عرف (وكان كاتب كتابه عليها) كان عايز يسيبها وكأنها هي المجرمة
وقبل ما تركب بيكون طبعاً التسخين، وده بيأهل الواحدة مننا معنوياً للإهانات والتحرشات اللي حتتعرضلها في وسائل النقل علشان مايجلهاش صدمة عصبية ولا تروح تنتحر. وطبعاً التسخين ده يتضمن بحلقة وشتيمة ومعاكسة وإستظراف بالإضافة لحبة كهول عندهم عته منغولي فاكرين إن لما واحدة تقف تاخد مواصله معناه إنها عايزة تركب مع أي واحد ومستعدة تدفع أي بديل للفلوس. وبالتالي بيهدوا ويعلقوا ويبحلقوا و...إلخ
وطبعاً بعد التسخين تبدأ المبارة فلما تركب المواصلات، الذكور (ولا أقول الرجال) اللي معندهمش ريحة دم بيعتبروا أن مجرد ركوبها المواصلات موافقة ضمنية على أنها تصبح مشاع للركاب والسائق والمنادي بتاعه بالمرة يالله ما أهو أبو بلاش كتر منه. والله أنا مكسوفة أفسر أكتر من كدة.
ولو واحدة حاولت تدفع مكان كرسيين مثلاً علشان محدش يقعد جنبها يهبوا فيها (لأنها كدة بتعتدي على حقهم الطبيعي في التحرش) ثم تلاحقها الشتيمة بعد ما تنزل من الميكروبص، وطبعاً لو واحد إتحرش بواحدة في المواصلات وجرؤت تفتح بقها ولا تهزأة يبقى يومها مش فايت وتبقى جنت على نفسها براقش. والواحدة مننا بتكتم في نفسها وتروح تعيط في بيتهم أحسن... يعني حيبقى تحرش وكمان فضيحة وشتيمة في الشارع.
هذه الأمثلة من التحرش أثناء الذهاب الركوب وما قبله أو بعدهوماتكلمتش عن التحرشات اللي بتحصل في مواقف تانية