عريس في المصيف

الصيف دخل والحر لا يطاق.. فوالدي العزيز أخدنا في مصيف تبع شغله لمرسى مطروح... ما تخيلتش أبدا إننا نملك في مصر المناظر الخلابة دي.. الجو جميل والميه صافية والموجه هادية وجميلة..

كنا كل يوم نصلي الفجر، نفطر، نشرب شاي وناخد بعضنا وننزل للبلاج ... بصراحة أنا طول عمري بحب البحر وشكله وصوت موجته لكني بخاف جدااا منه وأشعر ناحيته بالغربة... فكنت يا دوب أبل رجلي بالمية وأنا بتمشى وأرجع أأنتخ على كرسيا في الظل... مش عارفة ليه المصيف في ثقافتنا يبقى لازم يعتمد على الصوت العالي والكاسيت .. والغريب فعلا إن الناس متخيلة إن رب القاهرة غير رب مطروح.. فتبدأ البنات بخلع الحجاب وتبدأ الدراعات بالظهور والاسترتش يثبت نفسه.. وأتفرج يا سلااااااااااااام.

- يا صابرين

- نعم

- مش دي بنت أستاذ خالد هريدي ... مش كانت محجبة

- فين دي؟؟ أيوة أيوة هي

- مش كانت راكبة معانا الباص ولابسة طرحة؟؟

- أيوة يا ماما صح!! والله شكلها بالحجاب أحلى..

- يا بنتي الحجاب ياما بيستر

- ولية الغلط ده..؟؟؟ هو أنا كارته ولا اية؟ محنا زي الفل اهو.

- يا بنتي مقصدتش .. أقصد أنه بيحمي ويستر على بناتنا

- كده ممكن أعفو عنك...

(وقبل ما أكمل كلامي... لبست راسي حتة دين كورة من شوية عيال بيلعبوا جنبنا.. حسيت بالدنيا بتلف حواليا... صرخت فيهم أمي)

- أية ده في كده ؟؟ يا ابني ما تلعب بعيد عن الناس

- إحنا آسفين يا حاجة

(ومسكت أمي الكورة وراحت زرعاها بكل قوتها في صدر الواد)

- آآآة .. في أية يا ست!!

- ست!! ما كنت من شوية حجة.. يالا امشي من هنا

(رجع والدي بعد شوية ومعاه آيس كريم.. وبدأت الدردشة والحكاوي.. وشوية وجت واحدة تبقى مرات زميل بابا وبدأت تتعرف علينا وهاتك حكاوي ولت وعجن .. بس لاحظت إن أسئلتها بدأت تتجه معايا ومع ماما اتجاه تاني خالص... زي إنتي يا صابرين خريجة اية؟؟.. مواليد كام؟.. اتخطبتي ولا مجاش ابن الحلال؟..)

(لا لا لا الست دي خاطبة أكيد .. وبعد ما عرفت كل بياناتنا بسهولة ودحلبة .. مسكت موبايلها وكلمت حد وقالت له:

- هات شنطتي، عشان أخد دوا الضغط منها .. إحنا الشمسية بتاعتنا لونها أزرق بنجوم حمرا

(شوية جه شاب بشورت وفنلة وكاب وجايب في ايده شنطة الست الوالدة)

- سلامو عليكم

- ده أسامة ابني .. تعالى يا دكتور ... أصله دكتور في الجامعة في كلية آداب.

- يا أهلا وسهلا يا ابني... أتفضل

- متشكر يا طنط .. معلش أصلي سايب بابا قاعد لوحدة

(مسكت في ايده والدته.. وقالت)

- سيب أبوك في حاله .. هو عارف إحنا فين .. تعالى أقعد شوية

(طبعا كل دي حركات مفهومة وممضوغة كمان.. بس مفيش فرصة إني أفلفص .. مضطرة اقعد.. انسحب بابا وقعد مع أبو اسامه .. وشرف اسامة قعدتنا.. وبدأت طنط تعرفنا بأسامه أفندي)

- أسامة يبقى آخر العنقود ... بس مكنش متدلع أبدا ، كان ولد شاطر ملهوش في شغل الشباب ده ... من بيته للمدرسة ولما كبر بقت الجامعة

- يا أهلا وسهلا يا ابني .. ربنا يفتحها عليك

- متشكر يا طنط

(والدته حبت تعرفنا على بعض)

- دي صابرين بنت عمك محمد زميل أبوك.. صحفية قد الدنيا

- مش أوي كده يا طنط .. يا دوب بحط رجلي على أول عتبه

- ربنا يفتحها عليك يا بنتي ويرزقك بابن الحلال اللي يستاهلك

(قضينا باقي القعدة في كلام عام جداااا وشربوا الشاي وكلوا الكيك معانا وقاموا ... وبعد ما رجعنا من المصيف... فضلت أمي تلح على بابا ... هو أبو أسامة ما كلمكش؟؟ طب ما تتصل بيهم ليكون جرى لهم حاجة .... واشتغلت في الزن شويا لغاية لما يئست... أصلها متخيلة إن كل ما واحد ولا واحدة تسألني عن اسمي .. يبقى عندها عريس.. ما تعرفش ان العرسان أرزاق.

أقرأ أيضاً :

مفروسة من التليفزيون