شيرين من هناك
أصدقائي الأعزاء وأهل مصر خاصة.. أشكر لكم تفاعلكم وردودكم الممتعة واللي بجد بتشد من أزرنا في الغربة وخاصة لو كانت من ولاد بلدنا وأتمنى تكون عجبتكم مشاركة رفيقة رحلتي هناء وتكملوا معي المسلسل الدرامي وتشاركونا همومنا........
أنا بصراحة كده أحب أحكي عن أكتر مشكلة بتواجهنا هنا وهى مشكلة الجـــــــــــــــــــــواز
اشمعنى الجواز ؟؟؟
أنا أقلكم ليه ما هو طبعا في مصر عندك إمكانية تختار وتنقى... لأن كل اللي حواليك من بلدك وعارف أصلهم وفصلهم لكن إحنا في الغربة متبهدلين صراحة الأولاد.. والبنات... أبتدى الأول بالبنات : أي بنت هنا مفيش قدامها إلا 3 خيارات للجواز...!
الحالة الأولى (وهى الأكثر طبعا) الجواز من مصري... لكن لا مش أي مصري ماهى المصيبة إن معظم( ومش كل طبعا المصريين) الي بيروحوا الدول العربية جايين لأنهم مش لاقين شغل في مصر ما هو لو كانت حالته كويسة هيتغرب ليه ويسيب بلده إلا لو كان جاى لظروف دينية أو ظروف تانية والكارثة إنهم من مدن وأماكن غريبة .!!!
الجاتوة المنحوس
بادئ ذي بدئ بتلاقيهم متساويين في موضوع البخل والتحويش وكأنهم متفقين. أول حاجة بتقابلنا علبة الجاتوه والي طبعا من المحلات الي عليها خصم خذ قطعة وعليها قطعة مجانا وبنقول معلش مجاتش على الجاتوه .. لدرجة إن وحدة راحت لناس تخطب هي وابنها من غير ولا بنبوناية حتى ولما (واسطة الخير) سألوهم ليه كدة قالوا (محنا ياما جبنا ومش بتنفع الجوازة) ؟؟؟؟؟؟؟
تاني حاجة إن كل الي بيجى الدول العربية عندهم عادة وطبع فظيع قال إيه لازم يشتروا حتة أرض ويبنوا عليها للأقارب والي يعز عليهم حتى لو كانت 50 متر هيبنى عليها برضة برج عالي .
وكل عريس يجى يقول أنا يا عمى راتبي ما شاء الله الفين ولا تلاتة وناوى بس أبعت حاجة بسيطة كدا للعائلة وأجهز أخواتي البنات وأبني ؟؟ طيب أهله على العين والرأس لكن إزاى يا حسرة ؟؟؟؟؟؟؟؟؟
المشكلة أنهم بيقعدوا هنا في شقة كدا على الأد ومش متجهزة من كله لأنها طبعا على كلامهم مش بيتهم الأساسي وكل واحد يقول هنزل لما أخلص بنا إن شاء الله المهم كلهم في النهاية مبينزلوش إلا على خشبة؟ (يا لطيف اللطف)
أنت منين يابني ؟؟؟ من أرض الله يا عمي
المعضلة بقى الأساسية إن ماحدش يعرف أصل حد يعنى ممكن يكون عامل عاملة وجاي ، هتسأل مين يا حسرة ده جاى لوحدة لا عائلة ولا صحاب يعنى مفيش قدامك إلا إنك تصدقة بس تخليه طبعا يحلف على كلامه في الأخر!!
أو تعمل زى أبو(ر.ن) صحبتنا الله يمسيها بالخير بعد ما أطلقت مرتين المرة التالتة أبوها مكدبش خبر ونزل على قسم الشرطة في مصر يسأل إن كان ليه ملف ولا سوابق (بجد)
والمهم الموضوع مشي ولله الحمد
..... ودي بقى الحالة الأولى!!
عندي منه 3
أما الحالة الثانية: جوازة من أهل البلد نفسهم وطبعا هتبقى الثانية أو الثالثة لأنه بنت عمهم لازم تكون الأولى والأساس وبعد كدة يحلي .
حقهم برضوا..
مرة شافتنى واحدة منهم في فرح راحت وبصوت عالي لصحابتها مشاورة عليا وقالت هذى والله بتكون زوجة ولدي مش عارفه سلطان ولا بدر وكأني كاتبة على ظهري موافقة. المهم قولت لها يا حاجة بابا ميرضاش قالت لي (وي) وايش عليكي أنت في دار وهى في دار وأبشرك عنده مسبحين قولتالها الله يوفقه ويعوم فيهم هو ومراته؟؟؟؟؟؟؟؟؟
دي واحدة من الصدمات أل بنشوفها كل يوم!!!
الحب .. لغته العيون
أما الحالة التالتة والمستحيلة طبعا إنك تاخدى واحد جنسية غريبة وإني وحظك بقى هندي كوري ليبي .الخ
مرة حصلت لي صدمة وجالي واحد تشادي وطبعا قفلنا على الموضوع خوفا من الفضائح وحتى خبيت على هناء .. وبعد سنة مقدرتش أكتم أكتر من كدا وقلتلها .. لاقيتها الخاينة بتضحك، قال إيه طلع جالها هي كمان وخبت عليا المهم ظهر إن عنده عقدة البياض وعايز يحسن النسل.
ولا الفلسطيني الي عايز يجوز علشان ينزل مصر ماهو كل واحد سبب و مش لاقي وبياخد أي حاجة.
وختمت من أسبوعين بواحد فرنساوي المهم الراجل طيب وأمور لكن أنا معرفش غير كلمة (وى(،(مامو) وقلتلهم هتفاهم معه إزاى قالولي ده شكله يتحب والحب لغته العيون؟؟؟؟؟؟؟؟؟؟؟؟؟؟
مفيـــــــــش فايدة
المشكلة بقى أننا لا ينفع نتجوز هنا ولا هناك ماهو هناك مين الي يعرفنا بننزل شهر في الصيف مع الأقارب وأسبوع في العيد فمحدش هيعرفنا .. أفتكر مرة شافني واحد وأعجب بالعباية مش بيه وقال ماشاء الله محترمة وكنت وقتها رايحة لصحبتي مشي ورايا لبيت صحبتي وفي النهاية انتهت بخطوبتها ولله الحمد (البيت اللي دخلت جواه العباية) :)))))))))) أكيد ميعرفش بيت مين ..
وإن جه حد بيجى على سمعة ( أبوها مجهزها وعندها شقة) ولما بابا يقوله الشقة وجبنهالك والجهاز وهنجهزها لكن هتشتغل إيه يقوله البركة والخير فيك يا عمي ؟؟؟؟؟؟؟؟؟؟؟؟؟؟؟؟؟
وهى دي بقى المأساة الي إحنا عايشنها ووالله أتمنى من قلبي إن محدش يتقدم خالص ولا كل يوم تاخدي صدمة وإحباط نفسي وكله على فشوش!!!
كمااااااااااااااان الأولاد
وطبعا مش البنات بس الي مظلومة الرجالة كمان . مشكلتهم بقى الكبرى أنهم جايين لوحدهم من غير عائلتهم وبيكافحوا الله يكون في عونهم ومعظمهم عايز واحدة من هنا علشان بس يضيفها على أقامتة ميقدرش يعملها اقامة من مصر لأن الاستقدام مش مسموح غير لأصحاب الشهادات العالية جدًا ..
فمشكلتهم ميعرفوش حد يخطبوه ماهو هنا مفيش اختلاط ولو شاف واحدة في الشارع وسألها مخطوبة ولا لأ ونيته خير يعنى تبقى فضيحته بجلاجل ومش بعيد يتسجن فيها .
مافيش إلا إنهم يدوروا على حد متجوز ويقسموا صحبات مراته على بعض مهما كانت ظروفهم المختلفة ..
مطلوب عروسة
وأفتكر ياعينى في واحد له سنه بيلف على واحدة ومش لاقي ومن شهر لاقى واحدة صحبتي لكن أهلها قالوا له أستني ياخويا أصل عندنا ضيوف جاين يعملوا عمرة وخايفين من عينهم متتقدمش دلوقتى، المهم الضيوف قرروا يكملوا للحج ولله الحمد في الأخر بعتوه لواحدة تانية طلع عندهم عزا قالوا له تعالى خد ثواب وعزيهم وأبوها هيشوف شكلك ويحكم بعدين
وعلى كدة يا حسرة من المواقف المحبطة........
وفي النهاية كل واحد بياخد الي مكانتش في باله
وطبعا أنا كل ده بتكلم على فترة الخطوبة أما الجواز بقى فالحمد لله بينتهى في السفارة والمحاكم ؟؟؟؟؟؟؟؟؟؟؟؟
ويا قلبي لا تحزن
بعد إذنكم .. هاروح أجهز
أصلي بعد المغرب هقابل العريس اللي جاي من جزر القمر ..........
- هناء من هناك..
- أنا وكاثرين و كوستا .. والدكاترة بتوع الإحنا!! (تجربة شخصية)
• من فريق عشرينات بالسعودية
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
الله يا شيرين... تصدقي من كتر ما اتعودت على المواقف دي بقت تعدي عليه من غير ما أحس انها حاجه غريبة؟ لدرجة اني طول ما أنا بقرأ كلامك قاعده بضحك من انطباق الكلام ده عليه و على باقي صديقاتي الي حظهم حدفهم على الدول العربيه يكملوا حياتهم فيها !
ربنا معاكي، كملي الموضوعات و لو عايزه مساعده بموقف أو تجربه، حاحب إني أساعدك...:)
انا عندي اروح كوالالمبور و ابقي لوحدي يا منمن بس اسيب هنا
ايه رأيك نبدل؟؟ انا فعلا بفكر جديا اهاجر لزيمبابوي
كمان يعني هما عرسان مصر الي عدلين قوي... يا شيخة روحي :|
ملاحظة: غدا سأقوم بتوصيل الامانة يا منمن
و كلمة السر: كتكوت يا معلم
بعد ما اقوم بالثورة الميمونة بتاعتي وشوية الاعدامات للخونة والعملاء واللذي منه على كام تاميم كده على كام حرب هافتح الحدود بين كل الدول العربية
وهالغي مسخرة الكفيل والشهادات والاستقدام الممنوع وحجز الباسبور والكلام الفارغ ده كله
وهاسحب خرطوم من ابار البترول كلها يصب في بيت مال واحد هو بيت مال المسلمين اللي المفترض يكون موجود بدلا من ان يحفظ ذهب المسلمين كله في فورت نوكس بشارع وول ستريت علشان عائلات محددة تظفر به وحدها في حماية امريكا ... ان شاء الله يتوزع على فقراء المسلمين في كل مكان حتى السودان و الصومال وجيبوتي ومصر وما يبقاش حكر على فئة او عائلة آل فلان وحاشيته وما شابه ... يتجبوا علينا بيه ويقولوا صدقة ويقولوا بنشغلكم ونوظفكم ونعطيكم مرتبات وهم بيعطوا الامريكاني عشر اضعافها ويبوسوا ايده كمان لكن احنا مطلوب نبوس الجدم ... الى اخر الاغنية ...
وان شاء الله مش ها يكون فيه عاطل ولا عانس ولا حد مش قادر على الجواز ... ويا بخت من وفق راسين في الحلال بدلا من صرف نقود المسلمين على شراء الخيول واسطبلاتها في انجلترا او على موائد القمار في مونت كارلو او على البنات المش كويسة في ماربيا باسبانيا او استثمار الف مليار دولار داخل الولايات المتحدة من اموال دولة عربية واحدة بدون ذكر اسماء والعواطلية المسلمين ملطعين على القهواي وعائلة ال زعبلة رايحة تشغل ولاد الامريكان بفلوسها !!!
بس ادعولي ما اتجوزشي واحدة تضحك على عقلي وتخليني احط الخرطوم في جيبي انا واجهز ابني الصغير لتولي العرش من بعدي ...
المضوع مهم جدا والتناول رائع وفيه كوميديا سوداء غير مفتعلة.
أهم حاجة بقى إنك اتكلمتي عن الرجالة برضو كطرف في الموضوع ولم تركزي على البنات فقط ، وده للأسف اللي بتعمله كتير من البنات إلا ما رحم ربي،وكإن محدش عنده مشاكل غيرهم.
تسلم إيدك وفي انتظار المزيد
في انتظار تأكيد وصول الأمانه.. خلي بالك كتلفتيش النظر ليكي، الكل عارفك بالإسم الحركي.. و مش عايزين فضايح..
مش حاوصيكي، لو انكشفتي اوعي تبوحي بسر الأمانه أو اسم صاحبها (إلي هوه أنا) مهما كانت الضغووووووووووووووط... معلش أنا عارفه إن السيخ المحمي صعب شويه بس انتي قدها برضه و أنا أستاهل
بس على فكرة ماله التشادي بقى يا ست شيرين ولا هي عنصرية والسلام
ههههههههههههههههههههههههههه
مش كدا ولا ايه يا شوشو
كلامك حلو أوي
وتصدقي والله انتي بجد اتكلمتي في موضوع مهم جدا . أنا كنت عايشة في السعودية وأنا صغيرة بس الحمد لله اني جيت كبرت هنا :)
مستنيين مغامراتك يا شيرين
والي بتحسسنى إنى لسا في مصر وبين أهلي
وقلبي معاكي ياست منى
وحاسة بيكي والله من غير ماتكلمى
عموما أنا والله من حيث البلد الي أنا مقيمة فيها
فوالله ماعنديش أى نقد على حاجة فيها
لأنها تكفي إنها بلد إسلامية وبتطبق الدين
فأنا إن حكيت فبحكي عن السلبيات الي بناخدها من الغربة
ومانصحكيش أبدا يا ست نونا تججربي
علشان متبقاش مذكرات هناء وشرين ونونا..........
وائل ما شاء الله ماشفتش حد عنده طموح وخياله واسع شوية زايك..بمزح ترى بس إنت بتكلم مع واحدة يأسه شويه
أشكرك جدا ياأستاذ أحمد على حسن ظنك
وبالنسبة للتشادي مقولناش عنصرية ولا حاجة لكن لا كدا ولا كدا
لكن يكون في حد المعقول
أنا متأكدة لو كنت خذته كانوا عيالي هيطلعوه مخططين
أبيض في أسود
ولا حتى كروهات
أصل دة غلب التشادين كلهم بجماله