بحبك.. رغم أنف رمضان!
رمضان كريم.. كلمة تسمعها فجأة من كل الناس وكأنه سر كان يعلمه الجميع إلا أنت .. كل شيء يحدث فجأة وعلى طريقة سعيد صالح الشهيرة.. "أنت جيت – شهقة - يا رمضان"..!!
تجد نفسك كشاب تستعد للصيام والسحور والقطايف والتروايح.. و"اللوك" الرمضاني في الجامعة! مصحف صغير.. وقصة شعر محترمة وعينيك في الأرض على طول و.. اللهم أني صائم..!!
ربما يختلف الأمر قليلا بالنسبة للفتاة ..فالبنطلونات الجينز تتحول إلى "باجي".. ويظهر الإيشارب ويتراجع المكياج إلا قليلاً.. ومفيش داعي نسلم على ولاد الشلة النهاردة.. وعلى رأي أحمد عبيد زميلنا في الموقع.. يظهر هلال رمضان تكوي البنات الطرح !!
بنت وولد..!!
علاقة الولد والبنت في الجامعة شيء لن ينتهي الكلام عنه.. لكن ربما الجديد هذه المرة ما هو خاص بـ"طبيعة" هذه العلاقة في رمضان..
نهى – تجارة إنجليزي – كانت أول من سألناها، لم تفهم السؤال في البداية، لكن بعد نصف ساعة من التوضيح قالت في تردد، الأمر لا يختلف قليلا عن باقي شهور السنة ..الحلال والحرام شيء واضح سواء في رمضان أو حتي في "أيلول"!
أما ليلي فقد "أفتى" لها حبيبها بأن مادام الغرض من علاقتهما الزواج في النهاية فلا داعي لاختلاف شكل العلاقة؛ لأن كله في سبيل الزواج وإقامة "بيت مسلم"!
الحب الرباني ..!!
بيت مسلم.. اللفظ يستحق أن تقف أمامه قليلا، خاصة لو سمعت بعده رأي هادي – آداب جغرافيا – يقول: العلاقة بين الواحد والبنت التي يحبها لابد أن يعملا على أن تكون مباركة من الله.. بمعنى أن يكون الله طرفا بها حتى يحرسهما ويكون حبا ربانيا!
وعلى هذا الأساس فهادي لا يرى حرجاً في الحديث مع حبيبته في رمضان بل والأفطار سويا في أي مطعم قريب من الجامعة بعد يوم دراسي طويل!
الإفطار سويا.. لفظ آخر جديد - على أذني فقط على الأقل - لكن كان هناك ما هو أغرب.. وهو بالتأكيد ما صرح به شريف – تجارة القاهرة – يومي مع حبيبتي في رمضان كله "طاعة" فنحن نقرأ الورد القرآني سويا ونتسابق في الحفظ .. وبعد الإفطار نلتقي لنصلي التراويح في مسجد يؤمنا فيه أحد أصدقائنا!.. وعن السحور فهما يكتفيان بـ "الميسد كول " ليوقظ كل منهما الآخر ..!!
LOVE STREET..!!
"شارع الحب" ..ولو لم تكن تعلم ماذا يعني شارع الحب فهو باختصار مكان بعيد ..هذه هي الصفة الرئيسية فيه ..بعيد عن العيون والآذان وجو المحاضرات و"الدوشة" بتاعة العزال ..!!
في رمضان تجده غالبا خاويا دون طلبة..!! كان طبيعيا أن أسأل عن سبب خوائه فالآراء التي سمعتها من هادي وشريف ونهى كلها تؤكد أنهم ليسوا في حاجة لأن يرحلوا بعيدا عن هذا الشارع.. سعيد طالب قديم بالجامعة قال: "تجدهم هنا أوهناك ..ربما في الكافتريا أو في قاعات المحاضرات التي عادة ما تكون خاوية ..وربما خارج أسوار الجامعة في حديقة بعيدة عن كل شيء "صائم"!!
كنت في حاجة لأن أسمع أحد رواد الشارع، أحمد كان من أريد، قال: "نجلس في أي مكان.. الأمر لا يختلف كثيرا".. أما عن شارع الحب الخاوي ..- الشارع طبعا - فقد قال ..تغيير ليس أكثر ..!!
صايم عن الحب!
مجدي كان آخر من تحدث ليقول في حدة: "حب إيه يا أستاذ.. ده كلام فارغ وتهريج ..حاولت أن أقول أي شيء ..لكنه لم يعطني الفرصة.. إلا أنه تمتم في سرعة: "اللي عايز يحب في رمضان.. يروح يحب ربنا"!
وأنت.. ماذا تفعل في رمضان؟! شارع الحب ولا بتقضيها فطار ولا أنت راجل مؤمن وبتصلي معاها التراويح؟!..
أخبرنا برأيك.. حتى لو كنت تكتفي.. بحب ربنا!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
عبدالوهاب احمد هزاع المحمدي .
جامعة صنعاء كلية الزراعة.
almuhammadi@ymani.com
(الله يفتح عليك )
احد صديقاتي أخبرتني أن شهر رمضان يدرب على الصبر بعد اتفاقها مع حبيبها ألا تحادثه طوال الشهر الكريم وقالت يمكن تراجع نفسها وتقول لحد ماتتم الخطوبة رسمي
يا رب اعن الجميع على طاعتك والبعد عن معصيتك في كل الشهور
كده لي عندك موضوع اوع تنسى !!!!!!!!!!!!!
انا قلت راى وهاأقول تانى
الحب الطاهر الصادق ماتفرقش معاه رمضان ولا غير رمضان أما حب اللمز والغمز طبعا........ فى رمضان أو غير رمضان لان ساعتها ممكن تقول
انت حيت (شهقه ) ياشيطان
هو يعني قصد الكاتب إن الحب غلط وبالذات في رمضان مفروض الواحد يبعد عن الغلط ، ولا إن اللي كان عنده علاقة يقطعها ولو حتى من بعيد من غير فطار مع بعض وشارع الحب والحجات دي
على أي حال ربنا يستر علينا في رمضان وغير رمضان
وشكرا - شهقة- يا براء
أنا طوال دراستي الجامعية لم أسمح لنفسي الدخول في قصة حب مع أي فتاة فأنا شاب مثقف ومن عائلة محترمة وبدلا من أن أشغل نفسي في الحب والكلام الفارغ تجدني منشغل بهم الأمة ومحاولة تنقيتها مما علق بها من علماء السوء والدجل ودعاة الكليب كعمرو خالد.
وأسعى دائما من خلال مجموعتي على الياهو اللتي يحاول دائما الإخوان المتأسلمون تدميرها إلى كشف نوايا هذه الجماعة بالوصول إلى الحكم.
كماأنني مشهور جدا على الانترنت من خلال مقالاتي الواسعة الانتشار ويمكنكم مراجعة كتاباتي على مواقع كثيرةمنها شباب مصر وعربتايمز وبحزاني وملتقى الحوار العربي ودنيا الوطن .
كما أنني أقوم بجهود جبارة في الدعوة الى الله حيث لي حوارات مطولة دائما مع غربيين من أجل إقناعهم بالاسلام.
وائل عباس
وربنا يسترها علي ولايانا
*** تم حذف الكلمات الموضوع مكانها هذه العلامة لخروجها عن سياق مناقشة الموضوع
أخوكم سامى عفصه
*** تم حذف الكلمات الموضوع مكانها هذه العلامة لخروجها عن سياق مناقشة الموضوع
وياريت كمان تحذفو التعليق بتاع(حب ايه) لأن مش وائل هو اللي كتبه ، وكمان التعليق اللي بيرد عليه وياريت نتعلم إننا لما نناقش نناقش رأي مش شخص ، ومدام انتو متأكدين إن مش وائل اللي كتب التعليق يبقى كمان اللي ناقش فكرته ، لأن مابني على خطأ فهو خطأ
وياريت بجد يتنفذ الإقتراح وكل سنة وانتو طيبين
لاحسن هي مش عارفة تنام لو ما اتحدفش
توب علينا يا رب من البلاوي دي بقى
بصراحة "جيت على الجرح"...
أخ سامي عصفة أهنئك على رأيك و أنا أوافقه تماما..
و يللا نغني سوا:
"حملت الحب في القلب
زرعت الحب في الدرب
تعالوا فتشوا عمري
فلن تلقوا سوى الحب"
انت بكلامك هذا تستهزئ بشهر رمضان وهو افضل الشهور وفيه ليلة القدر وهي خير من الف شهر
فقط اقول الله يهديك
السلام عليكم
اولا احب اقول لكل رواد الموقع العزيز رمضان كريم , واحب اقول لرمضان والله بعودة يا رمضان.
طبعا كالعادة نجد موقعنا العزيز عشرينات ثرى بالمواضيع الجديدة والافكار التى تجتهد لتقدم لنا كل ما هو شيق ومفيد
لا اذكر اننى علقت على احد مواضيع البراء اشرف من قبل_بالواقع نادرا ما يلفت نظرى اسم الكاتب_وهذا التعليق موجه له شخصيا
فالموضوع مبذول فيه جهد _كالعادة_حتى وان لم تكن فكرته جديدة الا انه اثراها بطريقة عرضة الشيقة,
فقط يا عزيزى البراء استخدامك المتكرر لكلمة الحب _سواء فى استطرادك واسم الموضوع او نقلا على لسان الطلاب_ اقل ما يقال انها استفزتنى
فانا اعتقد ان التفتح وتقديم القيم بشكل عصرى لا يتدنى ابدا لمسايرة اطلاق كلمة الحب _العبيطة_على كل مخادنة ومحن (مع الاعتذار للفظين) بين اتنين سايحيين على بعضهم وسايحين على اللى حواليهم ومظروتين الدنيا حواليهم بفضلات الاساءة للحياء والاداب والاحترام
ارجوا وضع الالفاظ فى موضعها الذى يدل عليها
وارجوا ان تتقبل ملحوظتى بصد رحب عزيزى البراء
انا مبكلمش اصحابى الولاد فى رمضان ممكن رسايل كل فين وفييييييييييييييين علشان بسنطمن على بعض اولا لانة رمضان ثانيا علشان وقت رمضان ضيق مابين كلية وصلاة وقران وشوية نوم وحبة على موقعك يبقى خلص اليوم وبصراحة انا بلاقى كل اصحابى بعد رمضان فى تغيير جميل بنتكلم فى الدين وربنا واللى عملناة فى رمضان بجد حاجة جميلة اما عن الحب فانا مش رومانسية اوى وحتى لوكدة فالمفروض انا ربنا اهم وهو مش حينفعنى بحاجة يوم القيامة
مش عارفه ليه يا براء بحب جملتك دى و معلقه معايا كل ما اجى اكتب تعليق على موضوع ليك
و برغم انى سالتك قبل كدا لسه هتحلم بمصر اللى بتتولد من جديد ف ساعه ضلمه ما يعلم بيه الا ربنا رغم كل الظروف اللى حوالينا و انت مرديتش عليا
انا برده هقوللك رايى
انا شايفه اننا طول السنه عايشين لحاجتين يا اما لنفسنا يا اما لغيرنا
و علشان كدا مش كتير لو عشنا شهر لربنا
و انا بستعجب يا جماعه من اللى يزعل لما حد يقولله ناجل كذا لبعد رمضان
فعلا يا جماعه مش كتير على ربنا شهر ف السنه
انا كنت هنيتك يا براء برمضان ف موضوع استاذ تاريخ نحن المساكين و بكررها تانى كل سنه و انت طيب
الموضوع مش موضوع رمضان
انما موضوع حلال وحرام
اللي شايف ان دي حاجة حرام ميعملهاش أساسا حتى في غير رمضان
واللي شايفها حلال_وانامنهم_براحته أهم حاجة ميبقاش فيه تعدي على حرمة الصيام
الكلام عن شهر رمضان الجميل
شهر رمضاندة يا جماعة لازم ننسى فية كل حاجةيعنى اللى ماشى معى بنات يفكو منهم شوية واللى مقضيها بردة نفس الكلام يعنى باختصار الشهر دة لازم نبقى فية شوية معى الله عز وجليجماعة لازم نصلى ونصوم ونقرا القرءان ونصلى التراويح ونصلى الفجر حاضر ياريت يا شباب علشان احنااللى هما الشباب ريحين فى دهية خالح يعنى نبقى شوية معى ربنا علشان احنا ريحين فى دهية يجماعة لحظو انا دلوقتى اللى بيموت هما الشباب الصغيرينصح ولا غلط ندعو الله ان يهدى جميع شباب المسلمينامين
السلام على من اتبع الهدى - مالك ياعم براء بتخبط ليه - عنوان مقالك - بصراحه سىء للغايه-مش عارف تختارلك عنوان اخر - مثلا تطلع لنا بفتوى من اياهم ان لمس الحبيب لايفطر طالما النيه انك تتجوزها بعد العيل الاولانى - انتا قريب حمدى رزقوف بتاع المصرى اليوم ولاايه الحكايه - وكل عام والاسلام بخير شاء من شاء وابى من ابى - تسكثرون علينا ان نعود الى الله فى هذا الشهر - كلنا - انا اتكلم على المسلمين يابراوف - كلنا نعلم اننا مقصرين مع الله - فل قررنا ان نصالحه فى هذا الشهر تزعل ليه يااسطى براوف - انا فهمت مقالك كده مش عارف يمكن عندى قصور فى الفهم - ولا حريه الابداع عندك مفتوحه الشهيه علينا - روح ياعم اتوضى وصلى لك ركعتين واتقى الله على الاقل فى هذا الشهر - ولو مش عارف كيف تتوضاء ممكن ترجع لاى موقع اسلامى تتعلم منه كيفيه الوضوء وكيفيه التأدب عنما تتحدث عن شهر انزل فيه القرأن - يا اسطى برأوف
انا بحب كتير مقالاتك ا اخ براء
كل موضوعاتك بتكتبها باسلوب كتير حلو
انا ما كان يتغير عليا شي ايام رمضان لما كنت بالجامعة اولا انا طول 4 سنين ما كنت لا مصاحبة و لا بحب بس كانت علاقاتي بضل عادي مع زمايلي الشباب يعني بغير رمضان و لا برمضان انا ما كنت بحس حالي بعمل اشي غلط عشان اوقفو برمضان
مجرد زمالة عادية و هاد كتير طبيعي و حتى بعد ما خلصت و اشتغلت ضلت علاقتي مع زملا الشغل عادي زي طول ايام السنة
بعتقادي الواح منا لازم يحترم حالو و يفرض حدود على علاقاتو برمضان او بغيرو هيك ما بطر غير شي برمضان
و كل عام و انتو بخير
يا جماعة اتقوا الله في انفسكم رب رمضان رب كل الشهور وايه حب وكلام فاضي اصلا وجود البنت مع الشاب بدون اي ارتباط او عقد شرعي او محرم حرام شرعا ولا يجوز..............................................
السلام عليكم ورحمة الله وبركاته .. ورمضان كريم علينا جميعا .. انا مع الاخ نادر انور والاخ معاذ .. رب رمضان هو رب شوال هو رب كل الشهور ... بس ياريت منضيعش الشهر ده فى الحب والكلام الفارغ .. واسمعوا نصيحة واحد ... ضيع اربع سنين من عمره فى الجامعة وضيع معاها اربع شهور رمضان فى الحب والكلام الفارغ والعلاقات الغير جائزه .. الله يهديكم جميعا ..
شكرا لك يا براء انك فتحت موضوع زى ده ...
حسبي الله ونعم الوكيل
براء انف رمضان ارقي من ان نتطاول علينا انه شهر رمضان العظيم الذي انزل فيه القران وبعدين كل ماكتبته ليس فيه شئ رغم (انف رمضان )الكريم مع اعتذاري الي الله عن هذا اللفظ المستفز فالفتايات والشباب يزيدون التزام وابتعاد عن الشهوات ولو قليل ولكن في النهايه كل فرد يشعر بقدسية الشهر الكريم علي قدر التزامه وليست الشهور كلها مثل رمضان الكريم الذي تصفد فيه الشياطين ودون رمضان قد يطغي الشيطان علي الأنسان في لحظات من الضعف ولكن ربي غفور رحيم
أولا أسم الموضوع جامد جدا ويعبر فعلا عن مضمونه انا رأي إن رب رمان رب باقى الشهور مفيش حاجه أسمها مانكلمش بعض علشان إحنا فى رمضان فحرام وأنا صايم والحركات دى لأ الصح معروف والخطأ معروف بصرف النظر عن الشهر اللى إحنا فيه يعنى فى العلاقات دى طبعا غالبا بتحصل حاجات مش صح عموماولو هنتكلم عن الصح الصح ده حتى النظره حرام ولا يمكن فى رمضان بيكلموا بعض وهما حطين وشهم فى الأرض.
السلام عتيكم ورحمة الله وبركاته الموضوع مش بطال لاكن طبيعة المتكبر المغرور البراء نقد دون فهم حتى اصبح انه لايرى الا ما يراه هو فقط الحب كلمة جميلة يحرص عليه الكبير قبل الصغير وحب الجامعة اذا بعد عن الاحترام وحفظ اليد والكلام المثير ودخل من الباب فاهلا به وما الفرق بين الخاطب والحبيب الاول يخرج ويتسحر ويكمل اليوم مع التليفون حتى الفجر والثانى قد يفطر ولايستطيع السحورمع حبيبته ان رمضان شهر القران فما يفعله المحبين الجامعين فى رمضان نقول لهم جزاكم الله خيرا وشدوا حلكوا وجعتوا حبكم في النور وربنا يسامحكمان شاء الله وياايها الساخر المغرور الا بيته من زجاج
بس اللي بخاف منه فعلا وبيدفعني اني احذر وننور اللمض ونرفع حالة الاستعداد للبرتقالي.....ان يظن الكاتب والمؤلف انه ارتقى سلم البيان ويحاول ان يرضي قرائه باي عنوان مثير.
(رغم انف رمضان)..... شهر الله...الذي انزل الله فيه(شهر رمضان الذي انزل فيه القرآن)......الذي قال انه لي.
ينفع تقول (رغم انف النبي ).....عارف انه في معرض نفي......بس قد يحبط عملك.
فخللي بالك الله يكرمك عشان متوديش نفسك في داهية اكتر مانتا رايح.
ورغما عن انف ابيك ....سوف ا
عارف انها جرحتك.
فخللي بال سيادتك وانت بتتكلم عن حاجة متخصكش لوحدك
يبدو ان الاستاذ نسي لب الموضوع وبدا يتخذ طريق صلاح سالم ولكن باعتباري ازهري احب اقول ان لولا قلة المال ما اظطر زميلنا العزيز من ملاحظه تلك الملاحظه الشديدة وكتابة موضوعه
وذلك اننا نعاني من كساد في الزواج علي مستوي الشباب ولا اعترض علي التعارف الذي يتم بين البنات والاولاد وذلك ان اخذ اطارا شرعيا ولا اقصد يذلك الزواج طيعا ولكن اقصد علاقة الزمالة التي تتحول في اغلب الاحيان الي حب صادق غير مشوش باي شئ يخجل منه اي حب بغرض الزواج ولا اجد مشكلة لتحدث في رمضان لان رب رمضان هو رب باقي شهور السنة ولا ينظر الله الي العباد في رمضان ثم يقلي عنهم يعد ذلك حاش لله فيجب علينا اتباع الاداب التي يقبلها كل منا علي من هو عرضة من اخوات مثل حبيبتة وهو
عدم الملامسة الغير مبررة
عدم الخوض في احاديث يمكن ان تثير الغرائز
احملي من تحبينه علي طاعة الله
احمل من تحب علي طاعة الله وافهمها حقوقها وما لها وما عليها
والله المستعان وندهو ربنا
ان لا نحتاج الي ذلك في المستقبل وان يزوجنا ربنا بالصالحات الغير مفرطات
وكما قال جل شانه
الطيبون للطيبات والخبيثون للخبيثات .... الاية
Liked it
, I think that if ppl think that el 7ob 7aram, yb2a 7aram fi ramadan we fi 3'eer ramadan. but I dun think that it is
مش عارف الاخوة برغم احترامى الشديد للثقافات الدينية او الاحساس الدينى و توابعه من حمية و احساس انه لازم نفهم الناس اشياء هيا اساسا عارفاها و فاهماها و زى مابيقولوا عندنا فى المثل المصرى _يعرفوا القرد مخبى ابنه فين_بس اكيد الدنيا كلها شباب و بنات و حتى مع ملاحظة ظهور جنس تالت و رابع كمان بس الواضح و الظاهر ان الصفة السائدة فى مجتمعاتنا الاسلامية و لن اقول العربية نظرا لان لبنان دولة عربية و طبعا كلنا عارفيين ايه اللى بييجى من الشام و بنشوف عالفضائيات حاجات كدة جامدة و شديدة بس اللى واضح انه فيه حالة من انعدام شىء بالى اسمه القيم الدينية فى نظر الناس دى وماتفتكروش يا اخونا و لا تصدقوا الاسطوانات الفاشلة بتاعة انا هانتظم و اصوم و اصلى و مش هالبس بادى و لا جينز و لا شغل العروض اللحميةدى
كل ده بيتغير و بيعود لطبيعته بمجرد بعد الفطار و اساسا هى مجرد اعراض رمضانية مؤقتة بحسب التشخيص الطبى للحالة بس بتختلف مدتها من حالة لحالة بس النتيجة محتومة الا و هى عودة المياه لمجاريها
على فكرة انا انسان بسيط جدا و باشتغل عالنيل فى السياحة يعنى و كدة و باكلمكم من واقع شغلى اللى انا باشوفه كل يوم بنفس مستوى الرتابة الممللة بتاعة موظفين الحكومة
تلاقيهم كدة ياخويا شباب و بنات و خواجات حتى!!!!! تخيلوا و قاعدين ايه ؟!!!! شيشة و مزاج و بلوتوث و مقابلات و كلام من كدة
اللى يخلينى باعممها و بانظرلها بالشكل ده هو العدد و باحسبها علميا فبلاقى ان الغالبية العظمى زيى مابقولكم
الصح بيقول اتعامل مع الوضع كما هو عليه مش كما ينبغى ان يكون عليه
يعنى من الاخر و على بلاطة باردة كدة و ساقعة
فككم من المثاليات و كل واحد حسابه عند ربه و هما عارفيين كدة
زمن الدعوة انتهى يا برنسات و دلوقتى اهو بقى زمن ستات على خواجات !!!!!!!!
لقد جمعت يا سيدي ما بين الحب وما بين اللهو في مسألة الحب
الحب ليس هوجا ولا طيشا .. وليس محرما سواء في رمضان أو ما عدا ذلك لأن لا حكم لنا عليه فهو شعور ناجم عن حاجة الإسا للشعور بالعاطفة .. وأعظم حب قطعا هو حبنا لله عز وجل ثم لرسوله صلى الله عليه وسلم وكذلك أنبياؤه جميعا .. ومما يستوجب التوضيح أن المسألة التي طرحتها تفي بغرض الترويج لفكرة أن الحب هو اللهو ..
لا لا
من يقول أنه يحب ليلهو فقد أخطأ ..
هذا ليس حبا .. هذه شهوة وصياعة
.. الشاب الذي يلقى خمسين شابة بالنهار ويتغزل في هذه ويلمس تلك وفي النهاية يقول أنه لم يقم بأي علاقة مع فتاة وإن كان في ذلك صادقا من حيث المفهوم الأشمل فقد فعل ذلك بمفهوم غير مرئي للعين المجردة .. وبذلك هو لا يعرف الحب لأنه لو أدركه لأحب في الله .. لأحب من منطلق حبه لله الحياة وما فيها كما الخلق
لذلك.. أعجبتني الجملة الأخيرة وقول الأخ فيها .. اللي عاوز يحب .. يحب ربنا ..
وهذا هو الحق .. أن نبدأ بحب الله وإدراك الفكرة في هذا الحب، ومن ثم الحكم إذا ما كان الشعور مدرجا تحت مصطلح حب أم مدرج تحت مصطلح شهوة
حياكم الله
السلام عليكم
لهووحب؟
تفتكر يا سيدى الفاضل ان دلوقتى لو سيادتك يعنى بتشوف ناس او بشر ايا كان مستواهم المادى او الاجتماعى تقدر و بمنتهى الموضوعية تقولى مين دلوقتى مش بينظر للحب على انه وسيلة لهدف ماايا كان سواء هدفه مادة او شهوة ؟ يعنى مين بيتجوز الا لما يكون له هدف فى زواجه؟
مش الواحد بيتجوز عشان هدف معين هو فى احتياج ليه؟
يعنى جوازه هو نظرا لاحتياج شهوانى ايا كان نوعه(مال_سلطة_وضع اجتماعى_جنس ....الخ)
والشهوة محركها هو احتياج للشعور بمتعة الارضاء
اصبح ان الحب رياضيا او عقلانيا او منطقيا زيى ماسيادتك بتقول وجهان لعملة واحدة !!!!!!
اما بالنسبة لحب ربنا سبحانه و تعالى ...........مش المفروض اننا نحب الله عشان ندخل الجنة؟!!!!
يعنى حتى حب الله هدفه اتقاء النار و العذاب صح؟!!!!!
يعنى بمعنى اخر حب لازالة الشعور الانسانى بانه سوف يتعرض للعذاب و الالم النفسى كل مايفتكر انه عاصى!!
يعنى تقدر تقول مع انه حقيقة بس فى نفس الوقت وسيلة ذاتية يختلقها الاقتناع بان حدوث العذاب هو امر حتمى
وهنا وصلنا لنقطة اسمها عظيم الا و هو (الايمان بالخالق) سبحانه و تعالى
ولما نقيس اللى فات على اللى موجود دلوقتى حوالينا نجد و بكل صراحة و بدون محاولة تزييف حقيقة امر قائم بزعم الحرمانية اننا و للاسف ......معدومى الايمان الفعلى بوجود الرب ونعتبره مجرد فكرة لدينا ليس لها الاسانيد المادية اللتى يحتاجها العقل ليتاكد ويلمس حقيقة وجود الله .............
اسف للاطالة وارجو الا يعتبر الاخ كلامى على انه اساءة للخالق عز وجل !!!!!!!!
ولكن اصحوا يا برنسااااااااااات ......
صدقونى دى بقت دنيا ستات على.... خواجات!!!
عنوان الموضوع غير موفق تماما
برجاء تغييرة فورا
لا احد رغم انف رمضان
وولا حب رغم انف رمضان
برجاء الانتباة قليلا ( كثيرا ) لما نقول
فان الرجل ليتكلم بالكلمة لا يلقى لها بالا يلقى فى النار سبعين خريفا