هناء من هناك..
أهلا بيكم أخواتنا المخلصين في عشرينات نعرفكم بنفسنا الأختين الحلوين هناء وشيرين( أسماء مستعارة طبعا..لدواعي أمنية)..
إحنا صاحبتين مغتربتين خارج مصر – للأسف - مع عائلتنا تقريبا من ساعة ما أتولدنا.. شيرين هي العاقلة "مش قوي يعني" بس يعني نسبيا بالنسبة ليا..
المهم إحنا حابين نشارككم ونحكي لكم اللي بيحصل معانا من مواقف غريبة ومضحكة والمفارقات الغريبة بين واقعنا وواقعكم ويمكن ننقل لكم مأساة أولاد المغتربين.. أكيد في كتير منكم زينا أو حاسين بينا أو شايفين حد من قريب أو بعيد في المعاناة دي.. أهم حاجة إننا كلنا ما نفكرش أبدا نعمل في ولادنا كده..
يعني إيه خروج؟!
أول حاجة نعرفكم إن الخروج عندنا ممنوع إلا بمرافق.. يعني مفيش حاجة اسمها أركب تاكسي مثلا أو مواصلات (بالنسبة للمواصلات دي ممنوعة من الحكومة للستات)!!
والحمد لله ومحدش بيركبها إلا الهنود واسمها (النقل الجماعي) أما التكاسي بقى بيركبوها الغلابة اللي معندهومش سيارات أو في حالات الطوارئ.. وأنا وشيرين بقى من فئة الغلابة أكيد؛ لأن ممنوع الستات يكون عندهم سيارات.
واللي ييجي يدلع بنته كده ويخليها تقعد مكانه تجرب الكرسي اللي قدام، ولو حتى في مكان مهجور يكون جزاؤه (بره وبعيد عن البيت وصحابه) غرامة 10 آلاف ريال وسحب الرخصة والسيارة وترحيل (يعني ترجع على بلدك) ويمكن سجن لأصحاب البلد حسب ما سمعنا والله يستر.. عشان كده إحنا ماشيين جنب الحيطة وكنا لغاية وقت قريب جدا بنتحايل على أخواتنا الأولاد يوصلونا.
سواااااااق...قلة ادب!!!
طبعا أنتم عارفين القاعدة في الزمان ده "ما حدش فاضي لحد".. ولما فكرنا نقول لماما تجيب سواق.. سمعنا كلمة ((قلة أدب)) بترج البيت رج.. آه فعلا قلة أدب استغفر الله.. إحنا إزاي نفكر نركب مع سواق لوحدنا.. آه.. طيب نعمل إيه.. ما هو برضه مش معقول نفضل طول العمر محبوسين كدة نتكلم في التلفون ونستنى العوج (في مصر اسمه العدل.. لكن هنا عوج من العاهات اللي بنشوفها).. جبناها حبة حبة ركبنا أول مرة تاكسي مع أخويا.. بعدين مع أخوها ومرة مع مامتها..
وشوية شوية بقيا لوحدنا.. أنا أقول لماما مع أخوها وهي تقول لمامتها مع أخويا.. وفكينا والحمد لله.
أسطوانة الرعب الخيالية
آه على الاعترافات الرهيبة دي لو حد عرف الله يستر.. المهم أنا بقينا نشترك في مدارس تحفيظ ونوادي براحتنا ((إحم.. نوادي يعني أماكن مغلقة للسيدات فقط طبعا للرياضة)) وأحيانا نروح مركز تجاري (يا للعار) وطول محنا ماشيين نقول لبعض .. اتخيلي ببايا وبباكي لقيناهم جايين هنعمل إيه؟!..
يعني اسطوانة رعب لو أتأخرنا وها نرجع نقول كنا فين ورحنا عند صاحبتنا مين المرة دي.. أهم حاجة الحمد لله إن الآباء والأمهات كلهم مشغولين جدا.. يعني مش ممكن يعملوا جلسة جماعية يبحثوا فيها شئون خروجاتنا.. كفاية إن كل فريق فيهم مش عجبه الحال وساكت..
يحدث حول سور الحوامل
أحلى حاجة لقياها مؤخرا إننا نروح نمشي عندنا سور طويل أوي كده عشان تلف حوليه تاخد لك ساعة، ناس كتير أوي بتمشي كأنه ماراثون (هالله هالله على الكلمة القوية دي) والسور ده اسمه (سور الحوامل) سموه كده عشان الحوامل بيجو يمشو فيه عشان يولدوا.. لحظة.. هو السور دا يعني مخصص للستات.. طبعا لا (سور مشترك يعني).. عشان كده تلاقي الست ماشية وسيارتها ماشية جنبها تراقبها.
إحنا الاثنين بنكون ماشيين ماسكين في بعض ساعات نخاف وساعات نقضيها تريقة على الناس الماشية.. ده شكله واخد علقة.. دي شكلها مجتهدة.. دول داخلين مسابقة..
ده.. ودي.. وعلى كده نفضل نتكلم ونمشي لغاية ما نخلص الساعة
تاكسييييييييي..جنب البيت!
المهم بنرجع بقى مهدودين خالص.. وساعة بقى تانية لغاية ما نلاقي تاكسي.. قصدي ننقي سواق تاكسي.. أوعي ده شكله يخوف، ده باين عليه قتال قتلا، ده شاب ومش بعيد يكون...، ممكن ده؟!، لا ده؟!، وننتهي بقول أكثرنا تعبا: "بقولك خلاص أنا مت من التعب، أي واحد"، فترد الأخرى: "أنت اتجننتي، عايزانا نتخطف.. وأهلينا يعرفوا؟!
أيوه، خلاص ده، يا ستار استر، أحلى حاجة من كتر التعب امبارح وإحنا داخلين دخلت شيرين العربية وغصبن عنها مسكينة من التعب أول ما قعدت على الكرسي قالت: "آآآآآآآآ"..
طبعاً أنا عيطت من الضحك ومبقتش عارفة أقولها إيه وهي بقت ها تموت وتقولي مش عارفة إيه اللي حصل.. والراجل بص لورا وبحلق لنا كده وإحنا خلاص هانموت من الرعب .. رحت قلت بصوت عالي: "إنتي مشيتي كتير النهاردة متعمليش كدة تاني".. ممكن طبعا ما يكونش فاهم أنا قلت إيه بس طبعا أكيد فهم الآآآآآه:))..
لحظة طيب أنا جاية
بعد إذنكم .. شيرين بتناديني (يا للكسوف) طبعن رايحيين نمشي ..
تابعوا معانا مغامراتنا ..
أقرا في عشرينات :
مذكرات بنوته مفروسة
* من أسرة عشرينات بالسعودية
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
اجمل حاجة قريتها من النوع ده من ايام مذكرات بنوتة مفروسة ....!!
قبل السفر بيوم قلت يا واد لازم تصور البرج ده علشان تفرجه علي الناس في مصر
المهم وانا راجع من الشغل بالليل جبت كاميرا جديدة والله ..وطلبت من السواق اننا نعدي من تحت البرج ...
جينا قريب من البرج ... نزلت من العربية بسرعة وهاتك يا تصوير ..
وخلاص
مشينا بعدها ربع ساعة فجأة لقينا عربيات كتير حوالينا وناس كتير ولمة وزعيق وهات الكاميرا وفين هاويتك وانت بتصور ليه يا حيوان ..
قلت معلش يا جماعة اسف وخدوا الفيلم وانا اسف وسلام ..
قالوا لأ الريس جاي من المخابرات الملكية وهوا هيشوف يعمل معاك ايه
جيه الراجل بتاع المخابرات ...وقعد يسأل نص ساعة ,ولما قلتله انت خايف من ايه ..قالي انت بتصور البرج علشان تبعت طيارة تضربه من مصر ..
يا نهار اسود
ياعم الحاج انا بس معجب بجماله ,,,ابدا
المهم انتهي الموضوع لما قلتله اني بعمل بحث وكنت محتاج الصور فيه ...فرح قوي وقعد يدعيلي وادالي صورة للبرج من طيارة هليكوبتر ...
اقولكم بصراحة ....لما شوفت الصورة فكرت بجد اني اضرب البرج بطيارة ..!!
و ربما يكون في عونكم
و لو حبيتو تاخدو نصايح في فنون التخفي
و أصول الفكاك من الحصار ,
أو حتى تبادل إطلاق النار
احنا في الخدمة ..
وميرسي لعشرينات على اكتشاف مثل مواهب
حقيقي عشنا وشفنا دول بحالها بتتسمى باسم واحد
يعني انا كده ممكن اعمل ثورة او حرب اهلية وامسك حكم مصر
وساعتها عيالي يسموها جمهورية وائل العباسية
هاهاها
يعني الواحد يسموا شارع مثلا باسمه
فيلا ... عمارة ... برج
مش بلد بحالها والمصيبة ان فيها الحرمين !!!
**** تم حذف الجملة التي وضع مكانها هذه العلامة
انا بتخانق مع اهلي بسبب خوفهم الزيادة علي
لكن انا لو مكانهم ولادي هعمل معاهم اكتر
بس انت دمك عسل و الله يكون في عونك
(سلامي لشرين العاقلة )
انا ببعت كل يوم ومحدش بيعبرني
اديني قاعدة أعيط أهو مع هاني شاكر
الله يسامحكو
كنت بانسى
مش عارفة دا حصل ازاي
معلش . هي مناسبة بردو أقرا مغامرات حلوة
تسلم اديكي ومرسي على الموضوع
ابو انس
والي بتحسسنى إنى لسا في مصر وبين أهلي
وقلبي معاكي ياست منى
وحاسة بيكي والله من غير ماتكلمى
عموما أنا والله من حيث البلد الي أنا مقيمة فيها
فوالله ماعنديش أى نقد على حاجة فيها
لأنها تكفي إنها بلد إسلامية وبتطبق الدين
فأنا إن حكيت فبحكي عن السلبيات الي بناخدها من الغربة
ومانصحكيش أبدا يا ست نونا تججربي
علشان متبقاش مذكرات هناء وشرين ونونا..........
وائل ما شاء الله ماشفتش حد عنده طموح وخياله واسع شوية زايك..بمزح ترى بس إنت بتكلم مع واحدة يأسه شويه
أشكرك جدا ياأستاذ أحمد على حسن ظنك
وبالنسبة للتشادي مقولناش عنصرية ولا حاجة لكن لا كدا ولا كدا
لكن يكون في حد المعقول
أنا متأكدة لو كنت خذته كانوا عيالي هيطلعوه مخططين
أبيض في أسود
ولا حتى كروهات
أصل دة غلب التشادين كلهم بجماله
وثانيا .. بجد أنا اتبسطت أوي من الكلام الجميل اللي قرأته هنا ومش عارفة أعمل ايه من الشكر يعني ..
مرسي أوي لبيرو ومطراوي وبقولك يامطراوي اسمك بيفكرني بعيله هنا اسمها (المطيري) لكن مطراوي يعني بتحب المطر ولا انت من العيلة دي ومتخفي ؟؟؟
أما بقى واحد من الشعب حكايتك تهلك من الدحك وأنا رحت برج المملكة دا عادي جدا من جوا زي أي مول بس هو اللي من برا شكله حلو عشان بيتلون .. وعنده ناس زحمة جدا وكل مايحبوا يعملوا مظاهرات يجروا على هناك :))
مصعب الخير أرجوك الحقنا في فنون التخفي وأصول الفكاك والحصار اللي بتقول عليها دي أرجووووووووك
وائل عباس .. انت كبير أوي كدة ولا عامل علينا عمو :)) بترول ودولة وعباسية .. لو الموضوع بجد أنا هاصوت لك بس تجيب لنا عربية بسواق ..
نونا .. اتبسطت أوي من ردك .. لكن منين انتي بتدايقي من أهلك بسبب خوفهم الزيادة ومنين هتعملي مع ولادك أكتر ؟؟ :( أنا حطيت نفسي مكانهم لقيتني مش ممكن أعمل زيهم
واحد من هناك ؟؟؟ لو مش عيزنا نخرج لوحدنا تعال وصلنا ياعم الشهم :))))))))))
أما بقى أجمل رد ..
عارفين يا جماعة إن أبو أنس دا يبقى ابن عمتي (( يارب بس مكونش غلطانة واتكسف )) تتخيلوا إن الحكمة بتاعته دي كلها والرأي السديد وهو لسا في ثانوي .. ربنا يحرسك ويحميك ياعبوووووود يااااااااااارب
وطبعا مش هانسى أشكر كل من قرأ وعلق ومكتبش اسمه وأنا بجد زي ماقالت توأمتي شيرين حاسة إني في مصر وفي وسط أهلي كمان .. وأشوفكم على خير في المغامرة الجاية
هناء
مرة تحت الكوبري ومرة في 2 جنيه ونص
ودلوقتي في هناء من هناك
بقولكم ايه
انا رايحة انتحر