يوميات سنايبر ف المدرسة (1)

النهاردة أول أيام الدراسة.. ليهم مش لي.. أنا الدراسة هاتبدأ بالنسبة لي من بكرة.. فكرة فصل الأيام الدراسية دي لذيذة أوي.. بس برضة مش حلوة ساعات أصل أنا أغلب أصحابي بيروحوا الثلاث أيام التانية وعشان كده أنا هروح لهم كل يوم على باب المدرسة ساعة الفسحة وأستنى عند السور ونخرج كلنا نقعد على القهوة كأنه يوم دراسة عادي يعني..

بس فيه مشكلة أهم أوى وهي لما تحصل خناقة وأنا في المدرسة مش هايكون معايا أصحابي وكمان لو فيه ماتش كورة وهما مش فيه.. أكيد هاتغلب.

هما دلوقتي في الحصة الأولى عندهم الأستاذ وحيد جداول.. على رأي محمود بكر (الرجل ده) من أول يوم في الدراسة بيقسم جداول الدروس الخصوصية بعد ما بيقدم وصلته المعهودة إن الترم الدراسي قصير وإننا لازم نلحق الترم قبل ما يخلص وإن بالأجازات الأسبوعية والأعياد الرسمية فاضل مش عارف أد إيه من الدراسة وإن الوقت كالسيف والسيف حده حامي وحاجات كده..

الأستاذ وحيد دايماً بيظبط جدوله من أول يوم.. ويذنب العيال اللي مبتاخدش معاه دروس ويقعد يحكي في الممر مع المدرسين على المصيف اللي بيقضيه مع أهل مراته في بلطيم. نفس المواقف والحواديت كل سنة وكأنه فيلم بيتعاد على روتانا.

______

الصين دي ربنا يكرمها.. الموبايل أبو تلفزيون ده عمل الواجب وزيادة شوية.. كنت باقعد أنا والواد محسن على نفس الدكة في الآخر ونقضيها قنوات الأفلام بس هو السنة دي هيروح في ثلاث أيام غيري أنا.. عموما مفيش مشكلة بس السنة دي أنا خايف أوي.. طبعاً مش من الإنفلونزا بس.. لكن من إن أصحابي كلهم مش معايا كمان.. إحنا اسمنا "مثلث الرعب" رغم إننا أربعة.. محسن بازوكة.. وعلي الرفيع.. محمود مراجيح.. وأنا ممدوح سنايبر.. كلنا أصحاب من أيام المدرسة الإعدادي ومفيش حد فينا بيفتن على التاني في أي مقلب يتعمل في المدرسين.

يااه الحصة الأولى خلصت أصلي باعرف من الرنات بتاعة العيال.. بس كمان ساعة الفسحة تبدأ وهاروح لهم عند السور عشان نكمل جيم البلاى استيشن بتاع إمبارح في الكشك اللي جنب المدرسة.. اصلي كنت غالبهم.. كنت بلعب بازوكة وقتلتهم كلهم وخلصت الجيم.

______

بيقولوا في التليفزيون إن كل واحد يغسل إيده كل ساعتين طب أنا أمي لما الصابونة بتخلص بعد أسبوع بتصوت.. يعني لو كل واحد فينا غسل إيده كل ساعتين الصابونة هتخلص في يوم.. وكمان أصلا المدرسة مفيهاش حنفيات وأستاذ عبد العليم الناظر.. بيقفل المحبس العمومي وما بيفتحهوش غير لما يكون داخل هو الحمام (!!) وكمان القهوة ما فيهاش دورة مية.. يا عم كبر.. يعني هى لو إيدي مش نضيفة هاموت.

دلوقتي حصة الأستاذة سهام بتاعة الكيمياء.. حصتها حلوة زيها.. هي مش كبيرة وكمان مش بتشرح برضه حاجة.. بس بتقعد تتكلم عن الكيمياء وإن كان فيه معامل في المدارس زمان ومدرستنا مفيهاش وكمان بتقعد تقول إن مدارس أيامها كان فيها مسرح والطلبة بيقدموا مسرحيات بس هى ما تعرفش إن في أكتر من التمثيل بيحصل في الفصول.. إحنا عارفين إن دماغها تعبانة شوية وأحيانا تزعق فجأة لما الناظر يكون معدي..

الناظر بيدرس لنا رياضة واحد بس حصته بتبقى هادية ودايما بتبقى قبل الأخيرة وبتكون فرصة كويسة للأنتخة عشان الواحد يبقى فايق للماتش بتاع المرواح.

____

يتبع

____