ضــيـق خــلـق
من كام يوم اتصل بينا خالي وعزمنا عنده على العشا بمناسبة عيد ميلاد بنته "رانيا"، وفي اليوم المحدد واستعدادا للعزومة نزلنا من البيت بعد العصر مباشرة لأن خالي ساكن في حلوان ... و بالرغم من إننا ساكنين في عمارة في شارع متفرع من فرع من الشارع الرئيسي إلا إننا معرفناش نخرج بالعربية لأن العربيات بدات تتسلل للشوارع الفرعية هربا من زحمة وعطلة الرئيسي واللي اكتشفناه بعدين إن في مسؤل كبير بيعدي هوه اللي زاحم الدنيا كده.
بعد ما وصلنا للشارع الرئيسي (بعد ربع ساعة) بدأ كل سواق يعمل إعلان على قاموس القباحة اللي عنده ومكتفوش بالقاموس ... فكانت الكلكسات والشتايم على ودنه:
واحد: مش تفتح يا أعمى ..هتكسر المرايه!!
وتاني: ألا ألا ألا ... هطير يعني !! ما تصبر يا عم .. ما انت شايف الشارع ضيق إزاي.
وتالت: اووووووف ...اللهم طولك يا روح ... المغرب هيدن علينا ومتحركناش!!
ومتطوع ماشي على رجليه: صلوا ع النبي ياجماعة .. تعالى أنت كده شوية ... خشي يا مدام يمين سنة، أيييييييوة كده... تعالى أنت مااااااشي ... كده كويس .. ما تشيل ايدك من ع الكلكس يخرب بيت (لفظ مش كويس) هتخرجنا عن شعورنا يلعن دين (لفظ مش كويس برضو).
(ودبت خناقة بين المتطوع وصاحب الكلكس وتعقد الشارع بزيادة... وبعد مدة لمحنا عسكري من بعيد وكل علامات القرف على وشه وكان ماشي بيبرطم ويتمتم بكلام مش مفهوم ...ساعتها افتكرت بيت الشعر اللي بيقول:
تلقاه بوجه مكفهرٍ .. كأن عليه أرزاق العباد
وجه العسكري ونظم المرور ومع تحرك العربيات بدأت الناس تمد إيدها للعسكري اللي يحط في ايده فلوس، فعلا والله العساكر المصرين نموذج جميل لقوة التحمل فهو مقاوم للصقيع والحرارة وفوق كده بيستحمل أوامر الضباط ولسانهم اللي بينقط شهد وبالرغم من ده فالعسكري نموذج للشحات الرسمي!.
في إشارة طويلة لمحت واحدة بجلابية سودة، راكنة على الرصيف، قدامها قفص بيض مكسور على جنب.. إيدها على خدها وكل علامات البؤس والحزن على وشها.. المشهد مأسوي واحدة غلبانة بتبكي على البيض اللي انكسر منها وطبعا الهدف من المشهد مش البكاء ولا استعراض لنظرة موناليزا.... الهدف بالتأكيد الشحاته لكن - من وجه نظرها- الشحاته بعزة نفس.
وصلنا عند خالي وقت آذان المغرب بالزبط وكان في معازيم كتير ... كنت متخيلة إن السفرة هتبقى عامرة بالحلويات لكنها عمرت بالبروتين والخضار... إيه ده كله محمر ومشوي ورز وخضار وسلطات و و و ... بصراحة أول سؤال جه في بالي:
- هو خالو أحمد ورث!!! مهو مش معقول كل السفرة العامرة دي من مرتبه بس!! خصوصا واحنا عارفين ان خالي حاله على قده!!
قبل ما أسترسل في الكلام ... لقيت ماما بتقوله:
- أيه يا أحمد ده كله!! ليه كده يا اعتماد (زوجة خالي) ؟؟
- ما يجيش من قيمتك أبدا .. يا أم مصطفى
- ما شاء الله ... بس ده كتير على 6 أفراد ... مش كنت توفر حاجة لباقي الشهر!!
- باقي الشهر إيه يا أبو مصطفى... عاملين حسابنا وبيت السبع ما يخلاش.. ههههههههه
(سبع إيه وشبل إيه ...ده من كام شهر استلف خالي من أمي مبلغ عشان يصلح عربيته... مش عارفة ليه حاسة إن خالي ورث فعلا... مش يمكن طلع لأمي عم ولا خال في البرازيل وخالي كوش ع الميراث!!! اللهم يخزيك يا شوشو).
وأخيرا قمنا من على السفرة بالعافية بعد ما كنت متوقعة أن خالي ممكن يربطنا في الكراسي عشان لاااااااااااازم ندوق كل الأصناف... وجه وقت الشاي والحلو ... وبصراحة ريقي قبل عيني كان بيجري على طبق الحلويات الشرقية اللي كنا جبناه معانا لخالي... شوية ولقيت طبقنا متقدم مع التورتة غير الكنافة والساليزوه... يا ربي هاكل كل ده إزاي..... يا ريتني ما تقلت في العشا.
وكملنا السهرة... وفي طريق رجوعنا كان كل اللي شاغل أمي العزيزة... خالي جاب الفلوس دي منين!!! لتكون اعتماد خليته يستلف!!! يمكن رانيا دفعت معاهم... ما مصيبة ليكون أختلس.... وفضلنا طول السكة نفكر في شكل السفرة العامرة غير المناسب لوضع خالي المتواضع ...
وبعد أيام وبالصدفة وقعت طنط اعتماد بلسانها في التليفون وقالت لماما انها كانت عاملة جمعية مع الجيران بخلاف جمعية خالي واللي زبطوا دورهم بحيث يقبضوها قبل عيد الميلاد.. منساش أبدا شكل ماما وهي بتسمع الكلمتين دول من طنط .. فبدأت بالمصمصة وتشاور بايدها على راسها (إشارة المجنون) ... كان منظر أمي ما يختلفش كتير عن منظري بعد ما سمعت "سر السفرة" من ماما .... بصراحة ملقتش كلمة أقولها أكتر من مثل جدتي الله يرحمها "مفيش فقر...ده قلة رأي".... وعجبي.
حلقات سابقة :
مفروسة من التليفزيون
عريس في المصيف
تااكسي
عريس من الماسينجر
دماغ تفرس
هدوم تفرس
عريس حبيب
واحد متزمت
مفروسة في العمرة
مفروسة في الميكروباص
عريس رغاااااااي
عريس صاحب منصب
ننوس عين أمه
بنوتة بـتـحــب
عريس كلبـــوزة