مفروسـة في العمــرة

فاجئني والدي العزيز بهدية جميلة جدااا "رحلة عمرة" مع خالي في المولد النبوي .. وبالطبع مقدرتش أرفض الهدية، دة حتى النبي قبل الهدية!! وبدأت أستعد وأعد العدة نفسيا ودينيا.. ورغم أن الرحلة روحانية والواحد ما بيفكرش فيها إلا في إرضاء ربنا والمناسك.. إلا أن الرحلة برضه كان فيها بعض المواقف اللي تفرس.. يعني بره مصر أو جوها برضه مفروسة!.

أول موقف كان في الطيارة في رحلة الذهاب.. كان في ذهني أني هاتفرج على مضيفات حسناوات الوجوه رشيقات القوام زي ما بشوفهم في أفلامنا العربية ... لكن بصراحة آمنت بأن الشاشة الفضية بتخدع وتغش المشاهد كتير .. فاللي شفته كانت أشبه بجبال متضرسة متحركة أو أشباه لثمرات الكمثرى.. وكان في مضيفة يبدو أنها كانت حامل في الرابع..المشكلة ما كانتش في الشكل بس كانت كمان في معاملتهم لينا لدرجة أن الأكل لما بيقدموه لنا كان لسان حالهم بيقول لنا "اطفحوا".. ولما المضيفة سألتني تشربي أية؟ ورديت عليها بابتسامة لطيفة:

- جوافة.

ردت بقرف:

- مفيش... اشربي كولا!!!

ولقيتها صبت الكولا وحطيتها قدامي وبصراحة خفت أقول مش عاوزة تقوم تضربني بأيدها السمينة توقع لي صف سناني... شربت الكولا مكره ولو أني كنت مقاطعة!!

بعد أيام زيارتنا لمكة المكرمة والانتهاء من العمرة وصلنا المدينة المنورة .. وأول ما حطينا رحالنا سألنا عن مواعيد زيارة الروضة وفوجئت بان الوقت المخصص للسيدات لا يتعدى أربع ساعات في اليوم ساعتين من 7: 9 وساعتين من 1.30: 3.30.. طبعا الوقت وباقي اليوم مفتوح للرجال حتى الساعة 9 لإن أبواب المسجد بتتقفل بعد 9 .. كنت متخيلة إن ساعتين كافيين لزيارة المصطفى والسلام عليه وتوصيل سلام المشتاقين له... صليت الفجر وترقبت الأبواب الموصلة للروضة تتفتح والساعة 6 كانت كل السيدات واقفة على الباب واستغربت لأن الوقت لسه بدري ساعة"!!...لكني فهمت ليه كل دول واقفين على رجلهم ساعة كاملة بعدين...

أتفتحت الأبواب على الساعة 7 بالضبط وفوجئت بأفواج النساء تجري نحو الروضة ولا كأنهم مشتركين في سباق المارثون.. فعلا كان الكل بيجري ويدفعوا بعض ويعطلوا بعض ويمسكوا في هدوم بعض.. ووصلت لمكان المقصورة الشريفة "المقام" وأول ما شفتها خارت كل قواي وبدأت محسش برجلي من هيبة المكان ..وعنيا نطقت بالشوق للمصطفى قبل ما ينطق لساني وتعالت حواليا سلامات بسمعها

- يا رسول الله فلان بيسلم عليك.

- السلام عليك يا رسول، أشهد أنك بلغت الرسالة وأديت الأمانة.

- السلام عليك وعلى صاحبيك الكرام.

وفي وسط كل السلامات والفرحة دي دة أفاجئ بزغاريد... وكأنها بتهتف وبتعرف بنفسها "المصريين أهمه"، تواريت بعيدا عن العيون لأني بصراحة حسيت أن كل الجنسيات عرفت أني مصرية من ملامحي ولقيت مساحة قد راسي أعرف أسجد فيها وكبرت وبدأت أصلي ركعتين في الروضة.. في السجود حسيت بكل معاني الخضوع لكن برضو حسيت "بكونتا كنتي" فراسي كانت مداس لكل من عدى عليا وافتكر كويس السيدة الإيرانية اللي تجاهلت راسي وقعدت عليها بصراحة على قد ما آلمتني على قد ما استغليت لزقة راسي في الأرض وقعدت أدعي.

في صلاة الظهر في اليوم التالي... وقفنا في صف طويل استعدادا للصلاة .. السيدة السعودية اللي جنبي كلمتني كلمتين مفهمتش منهم حاجة وشاورت على رجلي... ولما طلبت منها تعيد اللي قالته ...قالت:

- شرابك يا حرمة عليه روح.

- روح أية؟ (بصراحة فكرت الشراب ملبوس بعفريت ولا حاجة)

- الرسوم اللي عليه .. ما يجوز تصلي بيه.

(استغربت.. كانت معلومة جديدة بالنسبة لي ... وشكرتها ودخلت في صلاتي ... معقول الكلام ده !! يمكن حرام هبقى أسأل فيها... لكن الأغرب أن السيدة الفاضلة وهي مروحة فقدت صبرها على بنتها وضربتها وشتمتها ورفعت صوتها لأنها مأخدتش بالها من أخوها الصغير!.

في يوم رحت مع أسرة خالي للسوق وتبضعنا منه.. وأذنت علينا العشا وجرينا باتجاه المسجد النبوي نلحق الصلاة وعشان ألحق الركعة مع الإمام اضطريت أني اقف في أي مكان فاضي ويبدوا أني وقفت وسديت ع المصليات الطريق لاني قبل ما ارفع يدي بالتكبير خبطت على كتفي سيدة إيرانية وقالت لي بلغة عربية مكسرة:

- إنتَ عربي؟ (والخطاب موجه لمذكر)

- أيوة

قالت بحده

- إنتَ حمااااار

ذهلت لأني اتشتمت في الحرم النبوي.. لكني طبعا مسكت لساني ومردتش..

لكن.. بالذمة مش حاجة تفرس؟!!

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس

عريس حبيب

واحد متزمت