عـريـس حبـيّــب

بما ان النهارده الجمعة نويت كده ارتب أوضتى ودولابي .. بقالى زمان بروق كده من ع الوش .. فقلت مبدهاش يا صوصو .. طلعى مصارين الأوضة كلها ورصيهم زى الناس.. ما نمتش بعد الفجر مع أني كنت هلكانة وشمرت عن ساعدى وقلت بسم الله..

شديت أول درج.. ما كانش راضى يطلع من كتر الورق المحشور فيه.. إنما لاينته وطلعته.. وربعت على السجاده وقلبته كله وبدات أفر الورق.. إيه الحاجات الغريبة دى .. فواتير قديمة.. دى بتاعة تليفونى القديم .. يظهر كنت ناوية أرجعه ولا حاجة .. ودى بتاعة mp3 كنت جيبته أول ما اشتغلت ..

- ايه اللى مصحيكي يا صابرين ؟؟

- بسم الله الرحمن الرحيم .. مش تخبطى ياماما واللا تتنحنحى ولا حاجة.. فزعتينى

- سلامتك .. بتعملى ايه ؟؟

- بروق أوضتى ..

- أيوه كده دواليبك وإدراجك عاملة زى أرشيف الحكومة.. طيب أعمل لنا كوبايتين شاى وأجى اقعد معاك

(وقعدت أنا وماما نقلب فى الورق والصور .. اللى نقطعه واللى نرميه .. واللى نضحك عليه لغاية ما لقيت أمي فجأة وكأنها لقت حاجة كانت تايهة منها)

- ورينى الصورة دى ؟؟

- انهى واحدة

- دى اللى فيها انتي وياسمين ومامتها

- اتفضلى

- هو مش ده أخوها مراد اللى بيشتغل فى البنك

- أيوه هو

- يا ترى اتجوز؟

(بتفكرى فى ايه يا ماما ؟؟ أنا عارفة البصة اللى بتطلع على وش أمي دى كل فترة لما تلاقى فرصة ظهرت لها كده إنها تتحفني بعريس.. يعنى ناوية على إيه يا غالية طمنينى .. حتروحى تقولى تعالى أخطب بنتى؟ والنبى ياماما بلاش أفكارك دي.. سايئة عليك النبى يا شيخة بلاش ترتيبات ما لهاش لازمة)

- الواحد والله مقصر فى حقهم . ..

- فى حق مين ؟؟ طنط عطيات؟

- أيوه طبعا مش كانوا جيراننا وكان بينا عيش وملح

- أيوه بس دول عزلوا بقالهم كام سنة .. خلاص بقى

(إنما أمي طبعا ما دام الفكرة شعشعت فى دماغها يبقى خلاص .. أخدت الصورة فى حضنها كانها درع البسالة وخرجت من أوضتى ... وأنا كملت الترتيب وانا خايفة من أفكارها وتكتيكاتها.. وحياتكم ... يوم الأحد الصبح لقيت أمي داخلة على الأوضة قبل ما أقوم من ع السرير)

- انتي لسه نايمة يا صبرورتى؟

- لا يا ماما صحيت خلاص.. أنا قايمة أهو

- حترجعي من الشغل الساعة كام النهارده؟

- عادى يا ماما فيه حاجة واللا ايه؟

- أيوه .. عزمت طنطك عطيات تاخد معانا شاي

(أهلاااا هي دي أول القصيدة.. طنط عطيات بس يا ماما؟ .. لكن قلت فى نفسى اعملى فيها عبيطة لما نشوف الست الوالده ح ترتب الحكاية إزاي)

- وأنا مالي ومال طنط عطيات يا ماما لا هى من سني ولا أنا من سنها

- لأ ما هي ياسمين ح تيجى هى كمان

- بجد؟

(المرة دى فرحت بجد ... أنا وياسمين كنا صحاب .. جيران وفى مدرسة واحدة.. افترقنا الأول عند الجامعة لما هي دخلت تجارة وأنا دخلت إعلام وبعدين افترقنا تاني مرة لما عزلوا)

- وهم جايين الساعة كام؟

- 8

- ياااااااااااااه .. 8 ؟؟ حكون رجعت طبعا إن شاء الله هو أنا عمري قعدت فى الجورنال لـ 8 إلا قليل

- لأ ما أنا عاوزاكي تيجى 5 كده ولا حاجة

- خير؟ ليه يا ماما هو احنا حنطبخ حاجه؟؟ مش كله حنشتريه ؟؟ بالكتير كيكة ولا حاجة متاخدش نص ساعة

(زمجرت أمي زى ما بتعمل كل مرة تتزنق فيها وراحت مبرطمة بكلمتين ما لهمش أي موقع من الإعراب)

- أنا عاوزاكي تيجى بدرى وبس .. اسمعى الكلام

(وهربت أمي بعنيها .. وخرجت من الأوضه وهى بتسمعني موال الأدب الشعبى عن الفرق بين الأدب زمان ودلوقتى: وهو يعنى كل حاجة لازم تقاوحينى فيها .. مينفعش تقولى حاضر وبس ... ده ايه الغلب ده ... ده الواحد ما كانش يستجرى يرفع عينه ...........إلخ)

(الست ماما العزيزة لم تذكر أن البيه مراد مشرفنا .. طيب أومال عاوزاني بدري ليه؟ فيه عرق فى نافوخى مش مريحني ... عندى إحساس أكيد أنه جاى مع مامته وأخته .. إنما بقى أمي دبرتها ازاى ؟؟؟؟ ربنا يستر حكم أمي دى عليها تدابير ..)

(من الساعة 4 والموبايل بتاعى مبطلش رن ... والمكالمة تخلص فى كلمتين : حالا يا ماما أنا نازلة على طول .. حاضر .. حاضر .. وطبعا وصلت البيت ولما شفت الورد .. عرفت انه صدق حدسى .. بعد ما غيرت هدومى قلت اروح انكش الحاجة وأنا متأكده انها مش حتقدر تخبى أكتر من كده)

- ايه جو الربيع اللى فى بيتنا ده يا ماما ؟...

- حد يكره الربيع

- محدش .. ده الدنيا ربيع والجو بديع ...

- بس ما تقفليش على المواضيع ...

- والله يا ماما شكل الصالة والصالون يستاهلوا يبقى فيهم فرح

- ان شاء الله يا صوصو ... حقه لو تم الموضوع يبقى الهنا جه لغاية عندنا

(أيوه كده .. فرحينى يامه فرحينى .. قولى اللى عندك ياغاليه كده ونورينى .. وبدلع مصطنع وتسبيلة بنويتى مش بتاعتى أبدا قلت لها):

- ما تكسفنيش ياماما ..

- من غير كسوف يا عين أمك .. طنطك عطيات أول ما قلت لها ما تيجى نلم الشمل يا حبيبتي .. لا حنلاقى أحسن منكم ولا تلاقوا حد زينا ... ده إحنا عشرة عمر وعاجنين بعض وخابزين .. والولاد عارفين بعض كويس قوى .. ما كدبتش خبر وقالت لى ياريت يا فوزية ياختى .. ده يبقى يوم المنى .. أنا خايفة على مراد تلوف عليه واحده من اياهم

(عملتيها يا حاجة !!!!!!!!!!!!!! مفيش فايده .. هو أنا رمية يا حاجة ولا وقيع!!! رايحة جايه تعزم بي على اللى يرضى يشيل .. ده أنا انسانة وعندى كرامة وكرامتى فوق أي حد وأي حاجة).

طبعا السلامات والتحيات كانت فعلا حلوة.. بينا عيش وملح برضه .. إنما مراد بالذات وقف فى زورى .. بس برضه قلت يابت .. فوتى ما هو لازم يقول: هاى !!!! مش بيشتغل فى بنك أجنبي وبيقبض بالدولار... وبعد السلامات والسؤالات عن الشغل وأنت فين وبتعملى ايه؟ وأنت يا خويا أخبارك ايه؟ .. انقطع كل حديث في القعده إلا عن مغامرات سي مراد العاطفية.. واحده فضلت تتصل بيه لما اضطر يا حبة عينى يغير نمرته علشان يخلص منها.. وواحده أبوها رئيس مجلس إدارة عرض عليه وظيفة بعشرتاشر ألف جنيه علشان بس يتنازل ويخطبها.. وواحده بيضة وواحده سمرا وفى وسطهم بمبى مسخسخ على برونزى....، ضربت بعينى فى اتجاه ماما لقيتها برضه بقها من ودنها دى لودنها دى من الفرحة.. ومش على لسانها غير كلمة واحدة:

- معاهم حق يا حبيبى هم حيلاقوا زيه فين

- (وطنط ترد رد واحد): فشر ... ده ما يخدش غير اللى تستاهله

(خدنا سهرة طويلة قوي.. والكل عمال يضحك وفاتح بقه .. وسي مراد عمال –بكل مياعه- يعيد الكلام عن الفلوس والمراكز والبنات اللي بيتحدفوا عليه وهو ولا حسين فهمى فى يا واد يا تقيل.. أما أنا فكانت فيه نحلة بتزن فى وداني ... ايه يا عم؟ .. فيه ايه؟ فاكر نفسك مين؟).

(بعد ما مشيوا ومع الوعود والأمنيات بعوده الميه لمجاريها .. وعن العشرة اللى ما تهونش إلا على ابن الحرام .. لقيت ماما بتقول لي):

- مبروك يا صوصو ... أهو ده النسب ولا بلاش

- أنا مش ح تجوز الأراجوز ده .. أنا يلزمنى راجل مش كازانوفا

- أصلك وش فقر .. خليكي قاعده لما تضفرى ضفيرة الشيب ... ماله مراد .. حد طايل .. اتبطرى يا ختى اتبطرى.. اللى يسمع كده يقول ملكة جمال ولا بنت مليونير ... أنا خلاص حطيت صوابعى العشرة منك فى الشق...

(ما ردتش عليها وبلعت دموعى .. وأنا مش عارفة ازاى قالت لي الكلمتين دول.. انطلقت لأوضتى ورزعت الباب ورايا.. وطبعا الوعود طارت والعشرة هانت والميه وقفت في المواسير).

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس