زوجة رجل ممل (6)

طبعا ما يعرفش قيمة فترة الخطوبة وكتب الكتاب إلا اللي اتجه لمصيره المحتوم زي حالاتي واتجوز، تفضل البنت يا حرام طول فترة الخطوبة تحلم بعش الحب اللي هيجمعها مع حبيبها طول العمر، وتنام بالليل على صوته العذب وهو بيقولها أحلى كلام.. ولكن بعد الجواز تكتشف أن صوته زاد عليه حرف فتحول من "عذب " إلى "عذاب"!!

ومع ذلك لا تيأس المسكينة وتحاول جاهدة استرجاع رومانسية فترة الخطوبة وكتب الكتاب، ولو كانت محظوظة "وهذا نادر جدا" ترجع جزء منها، لكن في الأغلب بتكون ذهبت مع الريح وتحولت إلى مجرد ذكريات ...

وبالنسبة لـ"هاني" جوزي فقد فاق بدري من غيبوبة الرومانسية والحب والغيرة وسمى كل المواضيع دي كلام فارغ...

- ألو.. إزيك يا هاني؟

- الحمد لله، خير في حاجة؟

- أبدا بسأل عليك

- طيب شكرا، سلام عشان أنا مشغول

- سلام

شايفين الحوار الحق عليا أني كلمته، يا ساااااااااااتر

حوار من ذاكرة التاريخ "أيام الخطوبة"*

- ألو صباح الخير يا هدى

- صباح الخير يا هاني أزيك؟

- الحمد لله إنتي عاملة إيه؟

- كويسة الحمد لله لسه صاحية من شوية

- طيب الحمد لله أن أول حاجة صحيتي عليها الصبح كانت صوتي

- (وبكسوف رديت طبعا..) وسألته: أنت فين؟

- في الشغل

- طيب أنت كدة متعطل، خلينا نتكلم أما ترجع البيت

- لأ ما فيش عطلة ولا حاجة، أنت أهم حاجة عندي في الدنيا

وبعد حوار طوييييييل قفلنا السكة وفضل كلامه الجميل في أذني لغاية لما كلمني بالليل تاني.

شوفتوا الفرق بين الحوارييييين؟!

قبل الجواز أتعلمنا أن الغيرة الزيادة مرض وأضرارها كبيرة جدا على الحياة الزوجية، وأنا بصراحة بيني وبينكوا كنت بغير على هاني جداااااااااا، لكن تصرفات هاني وردود أفعاله بعد الجواز خلتني أخبي غيرتي عنه وبعدين بدأت تتلاشى بالزمن..

* في فترة الخطوبة..

أنا وهاني خرجنا مع العيلة وقاعدنا قريبيين منهم عشان نتكلم شوية ورن موبايل هاني، وكانت المكالمة من بنت وبعد ما خلص..

- كنت بتكلم مين يا هاني؟

- دي واحدة زميلتي في الشغل

- كانت عايزة حاجة؟

- أبدا دي بتسأل على حاجة في الشغل وبتعرف أنا جاي بكرة ولا لأ

- يعني ما كانش ينفع تستنى أما تروح الشغل بكرة؟

- هدى أنت بتغيري عليا؟

- وبكسوف رديت لأ..عادي.. بس ما يصحش تكلمك وأنت خاطب

و"انشكح" هاني وقال لي: على فكرة أنا مبسوط أوي من غيرتك عليا ويا ريت ما تبطليهاش أبدا.

* بعد الجواز...

بعد خروجة مع أصدقائنا، رجعنا البيت وكان بصراحة بداخلي بركان غضب من هاني، اللي طول القاعدة بيتكلم عن الزواج التاني ومدى إقتناعه بيه، لما خلاني في نص هدومي، وحاولت لما رجعنا أعاتبه بالأسلوب الرومانسي المقبول اللي كان بيبسطه أيام الخطوبة لكن هيهات...

- هاني بصراحة أنا متضايقة خالص من طريقة كلامك عن الزوجة التانية

- إيه المشكلة دا كلام عام

- أيوا بس بيضايقني لو سمحت

- أنا شايف أنك مزودة الموضوع أوي، أكيد أنت غيرانة

- مش عيب أيوا أنا بغيير من الموضوع دا ومش بحب تتكلم فيه تاني مع أصحابنا

- أنا حر أنت مش هتعلميني أتكلم إزاي، وغيرتك بصراحة خنقاني

- ليه مش بتعتبر الغيرة حب وخوف عليك؟

- عشان غيرتك مش مبررة يا هانم ومش عاجباني

- يا سلااااام وكانت عجباك أيام الخطوبة يعني

- أنت لسه فاكرة دا كان زمان

في النهاية عايزة أقول جملة مشهورة قالها اللي سبقونا وغنوها كمان..

ما تفتكروش يا بنات أن الجواز راحة..

وما تزعلوش يا بنات إن قلنا بصراحة أن الجواز عمره ..

عمره ما كان راحة...".

أقرأ أيضا:

زوجة رجل ممل (1)

زوجة رجل ممل (2)

زوجة رجل ممل (3)

زوجة رجل ممل (4)

زوجة رجل ممل (5)