بنطلون جينز
بنطلون جينز
لا عمره إطبَق في فاترينة
ولا فيه شارع قدر يستوعب خطوته
بنطلون جينز
كان في الأصل شراع مركب
ورماه الموج علي رف الدولاب
أجمل ما فيه البقع
وأغمق ما فيه إيمانه بنفسه
صريح كأنه الصحرا
وخجول كأنه الليل
بنطلون جينز
ما فيش حباية تراب مدت أيديها وماسلمتش
ووسع لها مكان بين خيوطه
بس لسه برضه قادر يحافظ علي لونه
ويوماتي يشب
يمحى الكرمشة
والكٌسر
وآثار عضم الركبتين
ويفتح خطوته ميحصلهاش وقت
لا مره هزه شوك الصوف
ولا عمره صدق رقة الكتان
وتشوفه تحبه
أو تكرهه
بس ما تقدرش تقول ماشفتهوش
بنطلون جينز أصلي
ماشي بيتحدي نظرات بنطلونات كتير
بتعدي جنبه ومابتفهموش
يمكن لأنه متعود يغني وهوه ماشي
أو لأنه دايما بيدي انطباع
انه الوحيد اللي فاهم كل الفساتين
أو يمكن لأنه الجينز الوحيد
اللي قادر يوسخ نفسه
بمنطق انه دا اللي ها يخليه الأجمل بين بقية البنطلونات
بنطلون جينز
بيصحي كل يوم
مصدع..وصوته مبحوح
لا عارف يختار قميص
ولا قادر يدقق في الألوان
ومن البيت...
دوغري علي الشارع
عمره ماسأل رايح فين.؟!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
..بس جرب انته