اتنين ونص.. وتعال بص..!
اتنين ونص تعالى بص.. كل حاجة هنا باتنين ونص يا بيه.. خد فكرة واشتري بكرة.. نداءات ربما تكون قد سمعتها من قبل على ناصية أحد الشوارع المزدحمة أو في قلب ميدان مشهور.. أو لعلك قابلت من يناديك بنفس الجمل في العتبة أو ميدان الأزهر..
لكن أن يتحول الأمر إلي لافتة ضخمة تضم كل هذه النداءات وتحتها محل "محترم" يبيعك كل شيء شرط أن يكون.. باتنين ونص.. فهذا ما جعلنا ننزل من بيوتنا في "عز الحر"، لنرى ماذا يحدث في هذه المحلات!
يقول ماجد 22 سنة: "عرفت هذه المحلات للمرة الأولى منذ عام على الأقل، وتحديداً وأنا أمسك في يدي مرتبي للمرة الأولى.. وكالعادة كان مطلوبا مني قدرا كبيرا من الهدايا لأخوتي وأصدقائي والأقارب.. فكرت كثيرا واكتشفت أن المرتب كله لن يكفي لأشتري أكثر من 3 أو 4 هدايا..
وهنا ربنا هداني لفكرة هدية باتنين ونص وبعد جولة قصيرة بأحد المولات وجدت المحل المنشود.. ودخلت وكانت النتيجة ما يزيد عن 15 هدية، ولم يكلفني الأمر كله أكثر من 50 جنيهاً..!
تجارة ولا شطارة ..!!
محمد سيف 25 سنة صاحب أحد محلات اتنين ونص يحكي لنا: "نشأت هذه المحلات أصلا للترويج للبضائع الخفيفة التي تستورد من الخارج وخصوصا من الصين وأندونسيا ودول جنوب شرق آسيا.. كذلك نحن لا نعتمد فقط على عرض البضائع التي تباع بهذا السعر فقط، فداخل نفس المحل عندي من الهدايا ما يتجاوز المائة جنيه!
حاولت أن أسأله عما إن كانت تجارة رابحة أم لا.. (ثبتني) بالعبارة الشهيرة: "الرزق من عند ربنا".. وبالطبع ليس أمامك إلا أن ترد عليه: ونعم بالله يا حاج
مؤامرة..!
أما عادل جاد- 28 سنة - فيقول: هذا النوع من المحلات ببساطة يخاطب فينا الحس الاستهلاكي؛ فأمر جميل أن تقنع الذي أمامك أن الاتنين ونص كافية لتشتري بها هدية حتى ولو كانت عديمة الجودة.. المهم أن تشتري لتشعر أنك لست فقيرا وأن ما يحويه جيبك قادر علي أن يفعل شيئاً..!
هكسرها على دماغه..!!
أما رانيا فأكدت لنا تحمسها للفكرة، وقالت إنها رائعة فعلا وتستحق التشجيع.. قاطعتها بسؤال: "لو جاءتها هديتها القادمة على طريقة اتنين ونص قالت في ثقة: أكيد هاكسرها علي دماغ صاحبها:(((
إذن فالبعض يراها فكرة لذيذة والبعض لا يريد التحدث عنها كتجارة والبعض الآخر سيكسر الهدية لو جاءت من هناك..
ننتظر رأيك..
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
اهو ده المكان الوحيد اللي الواحد ممكن يسترجع فيه ذكريات الجنيه المصري قبل التعويم والتغطيس والغسيل والفرد والمكوة
اي نعم الجنيه ما يجيبشي حاجة برضه
يمكن قزازة حاجة ساقعة صاروخ مثلا
لكن العشرة جنيه اللي قربنا نحس ان هي كمان ما تساويش ... هناك تجيب اربع حاجات
اهو اي تفاريح في الزمن الكالح اللي احنا عايشينه ده ...
الواحد بيخش كارفور بيقول ده انا عاوزلي عشرتلاف جنيه مرتب علشان اقدر افتح بيت ...
اهو اي حاجة تدينا امل وهمي ان الدنيا لسه بخير ...
هو ده حلو طبعا ...بس يا ريت ميتكررش تاني
والله يا جماعة الموضوع لذيذ وماشي يعني ..
واللهم لا حسد بيكسب والعجلة ماشية وقربنا نسدد القرض ويمكن اتجوز الصيف الجاي بس ادعولي ...
وبما ان ده اول تعليق ليا انتهزها فرصة واحي وائل عباس علي تعليقاته اللذيذة وآرائه الغريبة والشاذة وهجومه الجبار علي بيرو وامثاله ,,,
ربنا يكرمك ونشوفك نقيب الصحفيين الأليكترونيين ...في حياتي ان شاء الله
أنا كنت بحبها زمان عشان أشتري توك وصور استيكرات وهبالة كدة
لكن متهيألي دلوقت كبرت وبطلت
لكن فعلا بتكون فيها هدايا حلوة ميد ان تشاينا تحف صغيرة كدة وحجات تفرح
والصراحة الهدية مش بقيمتها
الهدية باللي جاية منه
يعني لو حد بكرهه وجب لي هدية بمليون ريال هكسرها على راسه فعلا
لكن لو حد بحبه وجب لي هدية حتى بنص ريال هطير بيها
(آه يا عم الرومانسي)
أوعى وشك