السفيرة.. منة عرفة!
"طمطم.. فيكي شيء مخلينى.. طمطم راضي أضحي بسنيني.. طمطم يا أعز من عيني.. معزت ولد الود"
هكذا غنى أحمد حلمي في فيلمه (مطب صناعي) للطفلة منة عرفة التي استطاعت رغم سنوات عمرها التي تعد على الأصابع أن تستحوذ على لقبين في أسبوع واحد، الأول هو: (سفيرة الطفولة العربية)، والآخر هو حصولها على جائزة أوسكار ART ولقب (طفلة الدراما الموهوبة) لعام 2008، ولهذا كان لنا هذا الحوار مع الطفلة منة..
* منه.. يعني إيه سفيرة الطفولة العربية؟
- يعنى أنا همثل الأطفال في بلاد الدنيا كلها وعلى فكرة ناس كتير اختارتني عشان أكون سفيرة وأصحابي في المدرسة فرحانين جدا إن صاحبتهم سفيرة.
* مين اللي اختارك سفيرة؟
- لجنة تحكيم من سفراء جامعة الدول العربية وعدد من أساتذة في الجامعة وعمو محمود قابيل سفير منظمة اليونسيف اللي بتهتم بقضايا الطفل.
* وأنتي عارفة هتعملى إيه يا سعادة السفيرة؟
- طبعا فاهمة، أنا مش صغيرة أنا عندي 9 سنين، يعنى كبيرة وأول حاجة هاعملها هسافر بلاد عربية تحتاج إلى معونات، سواء فلوس أو عندهم مشاكل تانية وكمان هاهتم بأطفال شوارع واللي عندهم نقص أدوية واللي بيهربوا ومش بيحبوا يتعلموا.
* هاتسافرى تبع مين؟
- كل ده تبع جامعة الدول العربية.
* وأول بلد هتسافري لها إيه؟
- إن شاء الله هسافر ليبيا بس بعد امتحاناتي عشان لازم ألاقي حل لموضوع كبير بيقولوا إن فيه أطفال هناك أخدوا حقن فيها إيدز.
* عرفنا إنك فزتي كمان بجائزة طفلة الدراما الموهوبة 2008؟
- آه الحمد لله وده كان في مهرجان أوسكار الـ ART، وكان عن مسلسل (راجل وست ستات) مع عمو أشرف عبد الباقي وطنط لقاء الخميسي وعمو سامح حسين.
* أنتي عاملة إعلانات كتير مع عمو سامح.. بتحبيه؟
- هو بيضايقني وبيرخم عليا كتير بس أنا بحبه أوي لأنه بيحبني.
* وبتهدي الجايزة دي لمين؟
- يعني إيه؟
* أقصد مين ممكن تهدي له جايزتك وتقولي له شكرا؟
- آه.. فهمت بس كده وكده أديهاله يعني وبقوله شكرا هو عمو أشرف عبد الباقي لأنه تعب معايا كتير في المسلسل ومن غيره ما كنتش عرفت أعمل حاجة في المسلسل ده.
* زعلتي لما عمتو زيزي مصطفي ماتت؟
- آه زعلت وقعدت أعيط كتير؛ لأنها كانت بتحبني وبتلاعبني كتير.. بس برضه طنط إنعام دمها خفيف وبحبها.
* منة.. إيه أخبار فيلم (ليلى)؟
- أنا انسحبت منه عشان كان تصويره مع امتحانات نص السنة فكان صعب أوى أصور وأذاكر وامتحن.
* أنتي شاطرة في المدرسة؟
- آه.. بس بصراحة مش بطلع الأولى.. أنا مش بكدب.
* تفتكري إيه أصعب مشهد مثلتيه؟
- كان في فيلم (مطب صناعي) مع عمو أحمد حلمي المشهد بتاع الغرق عشان أنا مبعرفش أعوم خالص عشان كده المشهد طلع حقيقي وكل فريق العمل صقفوا لي.
* طب ونفسك تمثلي مع مين؟
- عمو عادل إمام لأني بحبه أوى وبحب أتفرج على كل أفلامه وأنا عارفة انه لو اشتغل معايا هيحبني لأني بحبه
* ومن البنات نفسك تمثلي مع مين؟
- نفسي أمثل مع طنط ياسمين عبد العزيز لأنها بحسها شقية زيي.
* بيقولوا إنك اعتذرتي عن الجزء الثاني من فيلم (عمر وسلمى)؟
- آه.. كانوا عايزني في دور أطلع أصغر من سني بكتير.. وده الناس قالت لي هايبقى وحش عشانك.
* وإيه آخر أعمالك؟
- أنا هامثل في مسلسلين، واحد مع عمو هاني إسماعيل المخرج والتاني كوميدي اللي هو اسمه مسلسل ست كوم.
* سمعنا إنك هاتعملي فوازير رمضان السنة دي؟
- بصراحة مش عارفة.. بيقولوا مش هالحق.. بس نفسي أعمل زي طنط شريهان.
* نفسك تدخلي كلية إيه يا منة؟
- أنا بحب الرسم أوى عشان كده نفسي أدخل كلية فيها فنون وكده.
* وإيه آخر حاجة رسمتيها؟
- رسمت سمكة في بحر وكان شكلها حلو أوى علقتها في الأوضة بتاعتي.