عيد العمال.. يعني إيه عيد؟!

أنا سمعت إن عيد ميلاد الريس بعد 4 أيام، يعني بعد عيدنا بثلاثة أيام، يعني المفروض يبص لنا شوية، ده حتى إحنا ولاد نفس الشهر ونفس الأسبوع، يعنى الواجب علينا نقوله كل سنة وأنت طيب يا ريس".. هكذا عبر أحمد رباح، ويعمل ستورجي، عن أمناياته يوم عيد العمال الذي يوافق الأول من مايو من كل عام.

123 عاماً مرت على اليوم الذي بسببه تم "اختراع" فكرة يوم عيد العمال، ففي مثل هذا اليوم، شهد مجزرة في الولايات المتحدة الأمريكية حينما طالب عمال أمريكا بتخفيض ساعات عملهم ورفع أجورهم، فوقعت صدامات عنيفة بين العمال والشرطة، أدت لمقتل المئات من العمال، بالإضافة إلى محاكمة أربعة منهم وإعدامهم!

مثل هذه المجزرة يتعرض لها عمال مصر على مدار الأيام والأسابيع والأعوام السابقة، مع ارتفاع أسعار السلع والخدمات بصورة كبيرة لم يوازيها ارتفاع في أجور ومرتبات العاملين.

أنا شوفت الريس

عمر الهنجاري، عامل بناء، سألناه عن شعوره يوم عيد العمال، فقال: "عايز أقول لكل عامل بمصر كل سنة وأنت طيب، وأتمنى إن يكون هناك اهتمام أكبر بطائفة البنائيين، فلا توجد أي جهة تضمن لنا مستقبلنا المهني.. كان نفسي بكرة أسافر لبلدي الفيوم، بس خلاص هاقعد في البيت، أتفرج على التليفزيون"!

في حين يرى عماد صبحي، عامل حفر، أن غداً سيكون كسائر الأيام: "يعني إيه عيد؟.. بكرة هايكون كأي يوم عادي، وخاصة أنه يوافق يوم الجمعة، فلن نفعل شيئاً جديداً.. صلاة الجمعة.. فطار.. نوم.. غداء.. تليفزيون.. ثم نوم"!، وأضاف: "أنا شوفت الريس امبارح فى التليفزيون، بس ما قالش حاجة عن العلاوة، وأحسن أنه ماقلش، لأننا كدة كدة مش بناخدها، دى بتاعت السنة اللي فاتت حتى لسه صاحب الشغل ما صرفهاش"!

نتقدم واحنا تعبانين!

عم محمود إسماعيل، حارس عقار، يتحدث حول الأوضاع العمالية، من وجهة نظره، قائلاً: "عيد بمناسبة إيه.. دي أوضاع العمال مش مظبوطة، وفي نفس الوقت بنسمع أننا كعمال أساس تقدم البلد، طب أزاي نبني ونتقدم وإحنا تعبانين أساساً".

ثم توقف عم محمود عن الكلام لحظات، ثم أكمل: "زميلنا قطب عبد الملك، وقع قبل كده من الدور التالت بس ربنا ستر، ولم نعثر على مكان يسعفه، فنحن لا نعرف معنى التأمين الصحي، أو المستشفيات الاستثماري، ذهبنا به إلى المستشفى العام وظل في الانتظار لمدة ما يقرب من 11 ساعة، علشان ماكانش معانا فلوس ندفع له، ولما قام بالسلامة، قال لنا أنا قبل ما أقع كنت بافكر في الهموم وجبل المشاكل اللي فوق دماغي بسبب أني عايز عيالي يدخلوا مدارس نضيفة.. فقدت تركيزي.. وقعت".

عايزين نقابة

أما عبيد عبد الرشيد، عامل خرسانة، فحكى لنا مشاكله بقوله: "إحنا عارفين إن الحكومة بتعمل اللي عليها، بس إحنا برضه بني آدمين وبنحس وورانا مسؤوليات وبيت وعيال، طب ده أنا سمعت من قريب أن الناس بتوع الضرائب (يقصد موظفي الضرائب العقارية) نجحوا في أنهم يعملوا نقابة لنفسهم، ومن اللي فهمته من النشرة أن النقابة دى بتحميهم وبتصرف عليهم لما يتعبوا، ولما يكبروا بيبقى ليهم معاش، طب أحنا لما نكبر ونعجز ومانقدرش نشتغل، هانعمل إيه؟"

وعن كيفية قضائه يوم أجازة عيد العمال، قال عبيد: "عيد العمال كلمة في الهواء.. أنا مثلاً رايح النهاردة لمناطق بعيدة عشان الشغل، وسأضطر للبيات بها، لتوفير أجرة المواصلات اليومية.. فأنا أكتفي بالنزول من عملي مرة في الأسبوع عشان أشوف العيال وأمهم، لكن المرة دي للأسف مش بكرة".