أنا مبكرهش أبويا !!
في طريقي للخروج من البيت .. لم أكن أظن أن شكلي يحمل أي نوع من أنواع الغرابة أو الشذوذ...لكن الطريقة التي استوقفني بها أبي ليصيح في وجهي...أنت هتنزل الشارع بالشكل ده!!!رجعت في هدوء إلي المرآة نظرت...دققت.. فتشت عن أي شيء غريب ..... لا جدوى أنا متأكد أن شكلي طبيعي جدا ً(!!)
عدت إلى أبي متسائلا في هدوء متعمد...بابا هو في إيه في شكلي غريب النهاردة....؟؟؟رد بسرعة شديدة وهو يتعجب من غبائي...أنت لسه معرفتش يا متخلف...إيه القرف اللي أنت حاطه في شعرك ده....؟؟!! آه هي دي المشكلة ده "جل" يا بابا....رد في غيظ...وهو طبيعي إن الشاب المحترم يحط "جل" في شعره...دي "رعونة" يا بيه.....
و ما هي إلا دقائق عجزت فيها "بالطبع" عن إقناعه أن "الجل" شئ طبيعي وضرورة شبابية والذي منه..بعدها اتجهت إلى الحمام لأغسل شعري وأنزل بعدها إلى الشارع وتفاصيل المناقشة الغير متكافئة تدور في ذهني .... متخلف...شاب محترم...رعونة يا بيه...إيه القرف ده...!!
وجدتني دون وعي أنطق وأنا في آخر الشارع....أنا بكره الراجل ده قوي...!!
حدث هذا من سنين أما الآن فأجدني لا أطيق البعد عنه... مع أنه مازال يرفض الجل والقميص الأحمر والجازمة الإيطالي اللي ب600 جنيه....!!!
السؤال الذي نطرحه على أنفسنا... هل فعلا من الممكن أن يكره الواحد أباه... أم أنها ظروف سن وفترة وتمر....؟؟؟؟
أعترف أن السؤال صعب و"مكلكع"... تعالي معي لتعرف إجابات الشباب عليه......!!!
"حب الأب من حب الرب"...!!
أول الآراء كان لمحمد مهندس كمبيوتر – 22 سنة – يقول... أولا حرام إن الابن يكره أبوه لأن "حب الأب من حب الرب"...قالها بثقة جعلتني أحاول البحث عن أي فتاوى خاصة بحب الأب أو كرهه..إلا أن نسرين وهي طالبة بأحد الجامعات الخاصة استوقفتني لتقول أعترف أني ابنة عاقة فأنا لا أطيع أبي أبداً في أي شيء.. حتى ولو كان علي حق (!!)... إلا أني لا أستوعب فكرة كرهي له... فهو في النهاية أب ويخاف علي بنته هو فعلاً آرائه غريبة وقديمة لكن ممكن التعايش معها..!!
أكرهه جداً...!!
حتى هنا كنت قد اقتربت من اليأس من أن أجد ابنا " كارها" لأبيه ...بدأت ألملم أوراق التحقيق وأقرر عدم الاستمرار فيه ...أوقفتني سارة في اللحظات الأخيرة لتقول في حدة ...أكرهه جدا ...أكرهه أكثر من أي شخص آخر علي سطح الأرض ... دموعها التي انسابت علي وجهها كانت دليلا علي أنها تعيش أزمة بالفعل، قالت " ما فعله أبي مع أمي كفيل بأن يجعلني أكرهه بشدة فقد هجرها بعد ميلادي بعام واحد ليعود بعد 15 سنة يبحث عني بعد أن عاد من أوروبا مع زوجته الإنجليزية وابنه " الأحمر اللون " ...!!!
لم تكن سارة هي الوحيدة فعادل غريب.(رجل أعمال 30 سنة) ..يقول ..أنا أعتبر نفسي إنساناً ناجحاً في حياتي العملية ...وكراهيتي لأبي هي سر نجاحي فمنذ أن كنت في الثانوية وأنا أكره قيود أبي، وتركت البيت في عامي الجامعي الأول لأحترف التجارة وأصبح رجل أعمال ناجح ....بصراحة – والكلام مازال لعادل - أنا لا أكره أبي فقط ...أنا أكره صورة الأب المتكررة والتي رأيتها في مدرس الفرنساوي بالثانوي، ودكتور السلوكيات بالكلية وحتي مدير المطعم الذي عملت فيه أول حياتي ...!!!
بابا فين..أقوله مين!!
رأي عادل " الغريب " كان هناك ما هو أغرب منه فرامي (20سنة سياسة واقتصاد) تسائل في براءة مقنعة ...أنا أبحث عن أبي ...أترك لي رقم تليفونك لأتصل بك إن وجدته لأخبرك إن كنت أحبه أم لا..!!
يا عزيزي أنا أري أبي في المناسبات ...فهو باستمرار مسافر أو مشغول وحتي لو كان فاضي فهو مختلف مع أمي و"بايت في الفندق إياه" .... أنا موش لاقي أبويا علشان أحبه أو أكرهه ...!!!
أما سماح فهي مازالت عند آرائها المصدمة منذ أن كانت معنا في تحقيق "
علاقتي بأخويا " تقول ... قضية الحب والكراهية مرتبطة بالحقوق والواجبات فأنا لي عند أبي حقوق وأخذتها فأنا أحبه، أما لو(....)..فلست ملزمة بأن أعطيه حباً لم "يدفع هو ثمنه "...!!!!
لن أقف عند رأيها طويلا ً الرأي الأخير كان لعم "بخيت" (75 سنة بقال مشهور جداً في شبرا) قال في بطء ..يا ابني هو حد لاقي ....الأب ده نعمة من الرب ..حبه علشان ربنا يحبك وتعرف تعيش ...!!!
عم بخيت لم ير أباه الذي مات قبل ولادته ومازال يبكي إلى اليوم علي ابنه الذي سافر من 10 سنوات على أوروبا هربا من عم بخيت نفسه ...ليترك كلمة جديدة في كتاب كراهية الابن لأبيه ....!!!
ها ... انتهت آراء الشباب... علي الأقل الذين قابلتهم... هل تملك رأيا آخر.... قابلني في التعليقات ...!!
- لن أعيش في "دكان" أبي..!
- بر الوالدين .. ماركة 2004
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
بجد مش عارفة اقول ايه، غير انى باحبكم يا عشرينات
" حب الأب من حب الرب "
ياااااااااااااااه جملة مؤثرة جدا
من العبقري الذي قالها؟
بجد يا براء أنا حبيتك جدا
" يعلن المتحدث الرسمي
باسم الحلف الالكتروني الفظيع
مصعب الخير
أنه يحب الكاتب المميز بعشرينات
البراء أشرف جابر"
ترقبوا البيان التأسيسي للحلف الالكتروني الفظيع!!!
براء ولا بيرو
ممكن ترسو علي بر بقي في يومكم ده ...!!!
حب الأب من حب الرب
لا مؤاخذة أنا ما بحبش غير كلمة "الله" .. سبحانه جل شأنه
بس بصراحة الموضوع حلو أوي أوي يا البراء.. تسلم إيدك يا برنس
أعلن بصفتي المتحدث الرسمي
باسم الحلف الالكتروني الفظيع
أن "بيرو"
شخصية منفصلة عن شخصية
" البراء أشرف "
و هذا على مسئوليتي المفوضة لي من قبل الحلف
و ننذر كل من تسول له نفسه إطلاق إشاعات مغرضة
بأنه يعرض نفسه للمسائلة القانونية
أمام لجنة الأحلاف و الأحزاب الالكترونية
- التي ستعترف بنا قريبا إن شاء الله -
و نذكر هنا أن التعليق الذي كنت قد كتبته
كان من باب الدعاية للحلف
و قد تم الاعتذار رسميا
للكاتب المحبوب
"البراء أشرف"
ووعدناه ألا نسمح بحدوث هذا الخطأ مرة أخرى
سواءا له أو لأي كاتب آخر في
" عشريناتنا "
هذا وبالله التوفيق ...
ترقبوا البيان التأسيسي للحلف الالكتروني افظيع !!!
الله يا سمحك يا مصعب الشر أنت
توقعوا البتاع التأسيسي للبتاع الإليكتروني الفظيييييييييع!!!!
احنا بنحب بابا علشان هوه بابا
اما بقى اذا كان بابا ده مش بابا
هل كنا ها نحبه ؟ ولا لأ ؟
انا اقصد أقول ان الاب لازم يبقى فعلا اب
علشان فعلا يتحب بجد
ده رايي
؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟
مش فاهم؟!!!!!
معلش بجد " سامحني "
على أي حال، أنا باقول إن حب الإبن لأبوه ده حب مكتسب مش فطري ولا واجب.. عايز ابنك يبرك؟ بره انت الأول..الإنسان بيتولد و معاه غريزة حب أبنائه، لكن العكس غير صحيح!
سيدنا عمر رضي الله عنه قال" عققت ابنك قبل أن يعقك"... جبتوا منين بقى "حب الأب من حب الرب" دي؟؟
أنا شخصيا كانت بتعدي عليه أوقات بحس فيها اني بكره أبويا.. و أمي و إخواتي كمان.. مقدرش أقول بشكل مطلق اني بكرهم، لكن ده إحساس أنا جربته في أوقات كتير، و عندي يقين إن همه السبب في وجود الإحساس ده أو اختفائه.. أنا اتولدت صفحة بيضا، و همه إلي كتبوا عليها و ملوها.. و إلي همه كتبوه هوه إلي حيرجعوا يقروه على مر السنين... و فاقد الشيئ لايعطيه.. على الأقل للي حرمه منه !
يمكن مايكونش ليا رأي محدد في الموضوع ده ...!!
كل اللي انا عايزة أقوله ان الموضوع مهم قوي ويستحق الكلام فيه بشكل اكثر تفصيلا ...
وفاضل سؤال صغير ...البراء أشرف كتب عن الأخ والشغل مع الأب واخيرا كراهية الابن لابوه ...
هل هو متخصص..!!؟؟
المجتمعات الغربية أقرب لتطبيق نظرية فرويد القائلة بقتل الأب : لن تنجح إلا إذا قتلت أباك داخلك (معنويا بس) واستطعت تجاوزه وتحقيق ذاتك ... الغرب تجاوز الفكرة دي وادعى إنه قام بقتل الله (اعوذ بالله) أو أنه تجاهل وجوده وأسس للفكرة العلمانية .. ودي مجتمعات الحداثة وانت عارفها وعارف أمراضها كويس ...
لكن بصراحة مطلوب نحقق شئ منها هو سر النجاح : السماح للابن بتجاوز ما حققه الأب .. خطوة للأمام حتى ننجح ...
النهاردة بعدما توفى بابا عايزة أقول له هو فيه أبدا بنت بتكره باباها .. ونفسي أقول له كلام كتير وندمانة على كل خلاف حصل بينا ونفسي يفرح بنجاحي .. ويعرف أني كنت صح حتى لو هو ما كانش فاهمني أو كان خايف على زيادة
موش عارفة يمكن تكون دي سنة الحياة ...وممكن تكون دي طبيعة مجتمعات معينة زي ما "فلسفة "بتقول ..
لكن كل اللي أنا بفكر بيه أني استحالة اسمح لابويا انه يخطط لي حياتي مهما كان حتي لو انا واثقة اني غلط...!!!
وعلي الرغم من كده الموضوع حلو ياعم براء بس ياريت
كنت تغوص شويه في .................
علي العموم نصيحة النقد الكتير موش كويس للمعدة ..!!
وعلي الرغم من كده الموضوع حلو ياعم براء بس ياريت
كنت تغوص شويه في .................
بسم الله الرحمن الرحيم
أيها السادة مديري الموقع
أيها الجمهور الكريم
و أنتم يا أبناء جمهورية " معلقين بلا حدود "
إننا اليوم أمام ظاهرة "غريبة"
و إنني أطالب هيئة القضاء العليا
للمواقع والأحلاف الالكترونية
أن تتدخل لحل هذه القضية الـ"غريبـ"ـة
القضية باختصار ودون لف ودوران
أصل أنا راجل دوغري بخش في الكلام
من غير مقدمات طويلة زي مالناي التانية بتعمل
أصل ده حاجة وحشة
المهم :
نحن نطالب برفع قضية تعويض على
الأخ " غريب "
لأنه اتهمنا بالنفاق وشكرا ...
نصيحة يا أخ غريب
" بطل كلام كتير أصله بيجيب تهتك في الرئة " !!!
ترقبوا البيان التأسيسي للحلف الالكتوني الفظيع!!!
النهاردة بعدما توفى بابا عايزة أقول له هو فيه أبدا بنت بتكره باباها .. ونفسي أقول له كلام كتير وندمانة على كل خلاف حصل بينا ونفسي يفرح بنجاحي .. ويعرف أني كنت صح حتى لو هو ما كانش فاهمني أو كان خايف على زيادة
والله يا السوسة إنت اللي جبتيها بصراحة
كم أتمنا لو يمنحني الله ثوان قصيرة علني أستطيع التعبيرلبابا \رحمه الله \ ما لم أقله له في حياته
يعني الزمن اللي احنا عايشين فيه زمن لغته الاولي هي الفلوس والماديات فموش عيب ان الواحد يكون "بيحسبها"كويس حتي في علاقته مع الناس اللي حواليه..
انا عارف ان ده رأي غريب شوية لكن لو بصيينا حوالينا حنلاقي ان الفلوس هي اللي بتتحكم فينا بشكل اساسي .... فليه نحط راسنا في الرمل ومنحاولش التأقلم معاها .
انا يا جماعة بكره ابويا جدا فعلا ..
موش طايق اسمه ....بكره اسمه اللي علي طول بعد اسمي في البطاقة .....
اسمه بينرفزني ...
ابويا فلعا شخص لا يطاق بكل الاشكال ...شكله اسلوب كلامه نظراته ..افكاره ومعتقداته ...
ابويا برضه عمل معايا اللي مايتعملش ...
بينقدني لاتفه الاسباب وبيستني الفرصة علشان يهزئني قدام الناس ..
بصراحة انا فقدت الامل فيه مع اني ببره وموش مقصر في حقه ابدا ..
لكن انا فعلا نفسي اتجوز واخلف علشان ادي لولادي اللي انا اتحرمت منه طول حياتي ..
وربنا يسامح ابويا علي اللي عمله ........
يعني انا ممكن اكره ابويا وابره في نفس الوقت ..؟؟
حد عنده أجابة يا جدعااااااااااااااااااان...!!
أقوله أيه بقي ؟؟
لكن في ناس أصحابي بيكرهوا أبوهم , هو صحيح الكراهية للأب بتاثر على البر و بتقلله و بتخلي ثوابه في الحضيض , لكن المعادلة ممكنة
إن الواحد يكره أبوه و يبره في نفس الوقت ...
لكن احنا كناس بتحب ربنا لازم نحب أبونا و قبله أمنا
ده حتى المقال بيقول:
" حب الأب من حب الرب "...!
الحب مش معناه انك تقتنع بأفكاره أبدا لأن الإسلام أصلا بيحض على الاستقلال بالشخصية ولكن مش معنى الاستقلال انك بتكرهه .. حاول تقنعه بالحسنى و إذا لم يقتنع خلاص بس ما نتعاملش معاه وحش , ونفتكر كلنا موقف أول سفير في الإسلام "مصعب بن عمير" مع والدته لما هددته إنها تقتل نفسها لو ما سابش دين الإسلام فرد عليها وقالهاإنه بيحبها وبعدين لما أصرت قالها أصر على موقفه و لكن بأدب و بحب وفي الآخر اقتنعت برأيه وما خسرهاش ...
أنت بجد حصل معاك كدة ولا شغل صحافة والذي منه ؟؟
السؤال التاني ....
أبوك عمل ايه بعد ما قرأ الموضوع ؟؟؟؟؟؟؟؟؟؟؟؟
صيغة أخري للسؤال
و الله أعلم...
حب ماما
علي قد ما تقدر حب !ّ!
اهلك يا تهلك
اهلك الممكن يغفرولك اي حاجة
لكن الغريب لا
تقبلي اعتذاراتنا ...!!!
وعندما عدنا إلى البيت ضربني علقة لن أنساها، ولم يمنعه في فورة غضبه أن يكسر رأسي لأنني عصيت أمره إلا أمي التي أرسلت له المجلة ليتصفحها، فلما هدأ قليلا تحدث عن أنه يحبنا ويريد الخير لنا؟! فدخلتُ غرفتي غير مقتنعة وأغلقت الباب وقضيت تلك الليلة أحتضن المجلات التي كرهها أبي دون سبب. وقد ظل يسألني فيما بعد عما استفدته من هذه المجلات فكنت أحضّر نفسي للإجابة المصطنعة
هو اصلا ايه وابوه ايه هما فى الاصل حاجه واحده
يعنى هو الكل وانا جزء منه
ازاى اكره نفسى
لو فكرت فى كل الحاجات الى عملها علشانك وبيعملهاوهيفضل يعملهايبقى ازاى تكره
صحيح ممكن نختلف ممكن ميبقاش فهمك بس مهما عمل فهو قصده مصلحتك وبيعمل كده علشان خايف عليك
عارف ليه خايف عليك؟
ببساطه علشان انت عمره ايوه هو ضيع عمره فيك حياته بتدور حواليك
وصعب اوى اوى انه يشوف عمره بيضيع
عارفه ان كلامى ممكن بيقى غريب شويه
بس انا عايزة كل حد مش بيحب ابوه يفكر فيه لأعايزاه يحسه بقلبه وبكده عمرك ماهتقدر غير انك تحبه وتحبه اوى
1- حين تلغى شخصيته
2- حين لا تستوعب رأيه 3- حين تهمله
4- حين تواجه تمرده الطبيعى بتمردك غير الطبيعى
5- حين تكون قاسى القلب
وحين لا تعرف معنى كلمة أب