الريس لما يلعب ويجا..!
لعبة... مجرد لعبة لا أكتر ولا أقل أكيد تعرفها ولو متعرفهاش أكيد الفيلم عرفك بيها وبتحاول دلوقت تلعبها، ويجا ... عفريت العلبة اللى بيطلعلك أول ماتنادى عليها يفتش فى الضماير والقلوب ويكشف عن الغيب من خلال أرقام وحروف ، هى دى ويجا أو تعريف بسيط للست ويجا ... دستووور ياسياد ، وسواء مصدق أو بتستعبط وتعمل نفسك مصدق أو بترفض إنك تصدق فهذا لن يغير من الأمر شئ..
فويجا قد انطلقت ولن يوقفها أحد وكلها يومين وتلاقى العيال بيلعبوها فى الجامعة وعلى الأرصفة وعلى عربية الكارو كمان، يعنى من الوزير للغفير ياباشا! مش بس الهاى كلاس، يعنى ممكن كمان تلاقى سيادة الرئيس قاعد فى جنيينة أى قصر من قصوره اللى هما أصلا قصورنا إحنا وجنبه المدام والأولاد والدكتور زكريا عزمى وكلهم إيديهم على القشاط بتاع اللعبة بيحركوه يمين وشمال ويقولوا فى صوت واحد " come wega… come wega" أو تعالى يا ويجا تعالى يا ويجا لكن يا ترى أول ما تيجى ويجا ممكن تقول للرئيس إيه؟
ويجا حاولت فى الأول تنافق الرئيس ما هو برضه الرئيس وله هيبة وشنة ورنة ياجدعان، علشان كده راح القشاط عند كلمة عظيم وعبور وخط بارليف والضربة الجوية نفس كلام الأغانى يعني.. بس ويجا ما استحملتش وخافت إنها تضر سمعة اللعبة وشرفها خصوصا ان المشككين فيها اكتر من الهم على القلب .. وفجاة قررت تقول الحقيقة واللى يحصل يحصل هو يعنى حد هيقدر يمسكها دى عفريتة برضه.
المهم حركت ويجا القشاط "بيلعبوها ببريزة ساعات بس اكيد الرئيس بيلعب بجنيه دهب.. الرئيس بقى " بتاع اللعبة وراح ناحية الرقم 9 أربع مرات .. فضحكت المدام وقالت " شوفت الأروبة بتفكرك بايام الاستفتاءات ونتيجة الـ99.99 الشهيرة والله كانت ايام حلوة ومكنش حد بيفتح بقه دلوقت خليت اللى يسوى واللى مايسواش عاوز يبقى رئيس الجمهورية .. اسمع كلامها وإرجع تانى للأربع تسعات على الاقل كانت منطقية.
صرخت ويجا وقالت: "أنا مقصدش كده أنا بفكره بالأيام السوده والكذب والتزوير ... بتحرفى الكلام ليه ياست"!
وممكن هنا تنزل موسيقى الناي الحزين على سبيل المؤثرات الصوتية؛ لأن ويجا بتتحرك دلوقت بكل دلع، أيوه أهى بتتحرك أهه، أيوه ج م ا ل .. بالضبط جمال نطق زكريا عزمى وقال "شوفت يا ريس ويجا بتساند رأيك الصواب بتسليم أمور البلاد للمحروس جمال رؤية ثاقبة يا باشا أنت ماشى صح.. صرخت ويجا كمان مرة وقالت مفيش فايدة أنا أأقصد إنه هيخربها ... الناس دى بتفكر إزاي!
بابا .. بابا لو سمحت ممكن نسألها إذا كان فى حد تانى نفسه فى السلطة ولا لأ علشان ناخد الإحتياط اللازم
اتحركت ويجا والعيون كلها حواليها وراحت ناحية "yes" يعنى نعم اتنفض الرئيس ودمعت عين ابنه .. الصغير طبعا وانطلق لسان زكريا عزمى قائلا " هدى نفسك ياريس وحياتك ماهيروح الكرسى إلا للى إنت عاوزه.. الكرسى كرسيك ياباشا" . طيب ممكن تقولى لنا ياويجا الناس بتحب الرئيس قد إيه؟
فجاوبت ويجا من خلال حروفها وقالت " حب ايه .. اللى انت جاى... تقول عليها " فصرخ زكريا عزمى قائلا شوفت ياريس بتقول إنه حاجة فوق الحب بمراحل " اتنهدت ويجا وقالت" الله يخرب بيوتكم والله ما أنا لاعبة ده إنتوا بتنصبوا حتى فى اللعب ، حب ايه ياحرامية يانور هى الناس لاقية تاكل علشان تحب، ده مستقبل أسود ومطين وعاوز الناس تحبه بأمارة ايه ياجدعان وشدت ويجا فى شعرها وحلفت إنها هتبطل تلعب اللعبة دى وهتروح تلعب "بلى مسافات طويلة" فى مركز شباب الحبانية .
راحت ويجا وفضل الرئيس والمدام وزكريا والأولاد حطين إيدهم على القشاط وبيصرخوا " come wega… come wega" والنبى قوليلنا الرئيس هيقبى مبسوط فى فترة حكمه التاسعة ولا هتبقى فى حاجة تضايقه؟ والنبى ياويجا قولى الرئيس قلقان على مستقبله!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
فكرة هايل واستايل كتابة كوميدى برافو للكاتب وبرافو ويجا
الرئيس عندما يلعب ويجا عنوان يشد الذي يقراة فهو يناقش ما عاصرناة و ما ننتظرة مثل هذه الكلمة البغيضة التوريث التي لا نعرف ماذا سيحدث لو تم التوريث فعلا هل سنتحرك ام سنكتم في انفسنا مثلما يحدث في كل مرة هل سنقف مكتوفي الايدي ام سنرد و ماذا سيكون ردنا اهو بالمظاهرات ام بالحرق ام بالصمت ام بماذا ...ما كتبة الاستاذ محمد الدسوقي يستحق علية الاحترام و لكن هناك بعض الكتاب الذين ينقدون الئيس بطريقةلا يحق لهم ان ينقدوا بها لماذا نقلل من شان الرئيس او عائلتة فلننقد الرئيس في حدودالمعقول اذا كنت ضد الرئيس فلتنقدة نعم فكلنا من حقنا ان ننقدة و لكن ... هو الرئيس رمز الدولة مهما حدث و مهما كان ملحوظة شديدة الاهمية في ردي هذا او تعليقي هذا انا لا اوالس او انافق فانا اكتب ما في نفسي و ما يملية علي ضميري و هذا رايي مجرد راي و اللة الموفق
أنا مع الزميل ( إنسان من مصر ) في رأيه .. ذهب كثيرون هذه الأيام لنقد الرئيس وأسرته ونجلاه بالتهكم والسخرية اللاذعة ..البعض ممن إنتقد كان موضوعياً والكثير أحب أن يُُُظهر مدى تفهمه للسياسة ودرايته العظيمة ببواطن الأمور .. أنا لست ضد ماكتب ( محمد الدسوقي ) ولكن .. أن ضد النقد (عمال على بطال) بمناسبة وبدون مناسبة لمجرد أن يحظى ماأكتب باهتمام القراء لأنه عن رئيس الدولة وزوجته ونجله .. هذا ليس من الدين في شيئ ..
وشكراً
السلام عليكم و رحمة الله
أنــأ مع الزملاء الســابقين في ما قـالوا، لابد أن نباعد بين أهوائنا الشخصية و بين النقد البنــاء ، فنحن اجتمعنا علي أن سيــادة الرئيس قد أخطأ في حق شعبه كثيـرا و بأخطـأء فـادحة ، لكن هذا لا يجعلنا نستهزأ به و بولديــه عمــال علي بطـال . و أيضا بأن نكون منصفين فمثلا أعجبني أن كلا من علاء و جمـال يحضـراالمبـاريـات وسـط جمـاهير الدرجة الأولي و ليس في المقصورة الرئيسية مع كبـار الزوار و لكن هذا لا يمنعني بأن أنتقد أن كلا منهما قد استغل سلطة أبيه بأن يغترف من ثروات البلد بدون وجه حق و بأن يسيطر جمـال علي الحزب الحـاكم بهذا الشـكل الفج.
ديننا الحنيف و أخلاقنـا تدعونا لأن لا نهين أي انسـان مهما كان دينه أو جنسه و في نفس الوقت أن لا نسكت علي الفسـأد و الطغيان حتي و لو كان الحاكم نفسه، و هذه معـادلة صعبه ضاعت في زماننا هذا
اللهم اهدناو اهد سـائر الأمة الي الطريق المستقيم .
انا اكيد مع الزملاء السابقين بس بمناسبه ما كتبه الدسوقى عايزه اقولوكو اخر رساه وصلتنى ف العيد اللى فات
الرساله بتقول
الرئيس هيثم جمال مبارك نجل الرئيس السابق جمال مبارك و حفيد الاسبق حستى مبارك يهتىء الامه المصريه بحلول عام 2075
و يطمئنهم بأن السلطه فى مصر لم و لن تورث
كل عام و انتم بخير
هو ايه النظام يا جدعان يا بتوع التعليقات اللي فوق.. هو احنا في عشرينات ولا موقع الحزب الوطني الديمقراطي.. ايه حكاية إنجازات الرئيس.. وحاسبوا على مشاعر الريس لحسن أصله رهيف قوي.. وآخرتها اللي بيقول كلمة على حاكم ظالم وحرامي طلعتوه كافر.. هو انتو مين بالظبط...
بس ياريت حد فيهم يجرب يدخل قسم شرطه واللا اقولكم بلاش مش هايستحملو ، ياريت يجربو يقولو صباح الخير لملازم اول يكون مقريف وماعملش اصطباحه لسه ويشوفو ازاى هايتكلمو كويس عن الطاغوت واسرته اللى ياما اذلو المصريين بدون ذنب ، واكبر اذلال للمصرين هو توريثهم كالمتاع البالى
ايه يا جماعه زعلانين ليه احنا مبسوطين جدا فى ظل قيادة السيد رئيس الجمهورية وصاحب الضربة الجوية الاولى صاحب الفخامة وله كل الاحترام ربنا يخليه ويبارك لنا فى اياديه الممدودة ويمد فى عمره كمان وكمان مش كفاية انه مخليكوا تعيشوا فى ارض الفراعنة وارضه دا انتوا قليلى الزوق بشكل انا اؤيد واوافق كل قرارات سيادته الحكيمة من اولها لاخرها من اصغرها لاكبرها واؤيد قيادة السيد جمال وبعده بتلاتين سنة هيثم وبعدين ...... لانى لااطمئن على شعبى الا فى ظل قيادته الحكيمه ولان الذكاء ينتقل بالوراثة والغباء أيضا والسٌُُلطة والمنصب وكل كل حاجة فانى اؤيدوبشدة تناقل الرئيس ومن بعده احفاده واحفاد احفاده للسلطة _بفتح السين طبعا_ وسلملى على مصرورجالة مصر *التوقيع* موالسة لسه بتتعلم
ياسادة يا أفاضل .. قولوا واتقدوا كل ماهو خاطئ واكشفوا كل فعل تم التستر عليه .. انتقدوا كل شئ .. ولكن ببساطة لايجب أن نفقد النقد موضوعيته بأسلوب غاية في السطحية .. ولا داعي لاتهامنا بالموالسة ولا يجب أن يكون تعليقنا على المقال برأي يخالف رأيكم أننا أعضاء بالضرورة في الحزب الوطني .. ولا نقد يبنى على نوايا بل على أفعال تمت تقبل التحليل والمناقشة
وشكراً
لماذنرى كل ماهو سيئ فقط ونتجاهل اعمال ومواقف عظيمة قدمها لنا مبارك
ولماذ نعيب غيرناوالعيب فينا "ولا يغير الله قوما حتى يغيروا ما بانفسهم"
فتحية لمبارك ولو حتى من اجل عشرة 25سنة بحلوها ومرها
اللى كاتب المقال استاذ ورئيس قسم بس كان نفسنا يسئلة مصر حتاخد البطولة ولا هية الكراسى وجمال اهم من مصر
عمر اسود
عمر من تفشي الرشوة و الفسادو الواسطة و المحسوبية
عمر من المولاة للامريكان
عمر من اذلال الضعفاء و الغلابة و محاباة الاقوياء و ذوي النفوذ
نقول كمان ؟
والله العظيم احلي كلم واحلي شغل وتسلم ايدك يامحمد يادسوقي بس في حاجه كل الي احنا بنعماله ده واله هيغير اي حاجه والي هما عيزين يعمله هيعمله والي مش عاجبه يخبط راسه في اتخن ميدان وهيقلولك هيه دي الديموقراطيه انا كنت واقف في المظهرا بتاعت انهرده وعجبتني جدا الي انا عاوز اقوله انا احنا مش غلطنين بس ابويا وابوك جدي وجدك هما الي سيبلهم الجام علي البحري وربنا يعدينا منه علي خير
>> لرئيس مبارك لقي فانوس سحري قام دعكه
>> فطلعله منه ابليس
>> قاله : شبيك لبيك تطلب ايه؟
>> قاله: بص بقي يا عم ابليس انا عملت فى الشعب بتاعي كل حاجه..قوللي
>>بقي علي حاجة جديده اعملها !
>> ابليس قاله: بس كده..بسيطه..هات ودنك..وش وش وش وش وش
>> قام الرئيس قاله: ايه ياعم لعب العيال ده..ده كلام برضه
>> قام ابليس قاله: بلاش دي..هات ودنك...وش وش وش وش وش
>> قام الرئيس قاله: ايه يا عم ده ...انت شكلك ابليس نص كم ولا ايه
>> ابليس قاله : معقول الفكره دي مش عاجباك!!..طب خد دي بقي..وش وش وش
>>وش
>> قام الرئيس قاله : ياعم انت شكلك كده لا ليك في العفرته ولا
>>حاجه..هات ودنك بقي اقولك انا بعمل ايه في الشعب بتاعي....وش وش وش وش
>>وش
>> قام ابليس وشه اصفر و قاله: يا راجل اتقي الله!!
ياجماعه النقد مش كده
فى فرق بين الديمقراطيه والفوضى
اللى بيحصل ده فوضى قول رأيك زى ما أنت عايز من غير نطاول أو تجريح
جايز او ربما او ممكن ربنا يستجيب دعوة 75مليون ولية ساعة فجرية ويفرجها غلينا طالما احنا مالناش غير كدة