Happy Valentine.. مع "حمادة سمير"!
(موسيقى لأغنية عاطفية شهيرة)
مساء الخير عليكم، طبعاً كلكم عارفيني، أنا المذيع المعروف والغني عن التعريف، حمادة سمير، اللي كلكم بتحبوه، وبمناسبة الحب، حنتكلم النهاردة عن عيد الحب أو بالإنجليزي اللي أنا طبعاً برابنت فيه الـValentine's Day ، مستني تليفوناتكم على الرقم بتاعي اللي مافيش داعي أقوله لأن كل ولاد وبنات مصر حافظينه صم ومحتفظين به على موبايلاتهم.
أنا مش عايزكم تفوتوا الفرصة دي وتستفيدوا من خبرتي الكبيرة والفظيعة في كل الأمور العاطفية لأني كنت دون جوان قديم، وده كله بدأ مع فيفي بنت الجيران لما كنت.....
(صوت التليفون يقطع كلامه)
ترررررن تررررررن ترررررن
- آه ه ه (مكبوس) معانا إتصال، آلو آلوو... عللي صوتك شوية.
(صوت بناتي يصطنع الرقة)..
- آلوو أيوة يا حمادة...
- أيوة يا أمورة مين معايا... ممكن نتعرف؟
- أنا هبة... Happy Valentine's Day يا حمادة.
- You Too ya Heba.
- أنا مكلماك مخصوص يا حمادة علشان أقولك إن البرنامج بتاعك وهمي، وإنك شخص رائع، وأنا فعلاً بحبك أوي أوي ولولا الإحراج على الهوا وفرق السن اللي بيننا أنا كنت.....
(تضحك ضحكة بلهاء قال يعني مكسوفة)
- عارف عارف... بس ياريت ندخل في الموضوع على طول علشان وقتي (السِمين) ووقت البرنامج، في بنات تانية حيموتوا يكلموني فبلاش تقطعي عليهم.
- Sorry يا حمادة، أنا كل اللي كنت عايزة أقوله Happy Valentine's Day لكل أصحابي، أحمد، محمد، هيثم، وائل، عبد الله، حسن، عادل، رامي، معتز، وليد.....وزميلتي باكينام، أحب أهدي لهم كلهم وبالتحديد واحد معين هو عارف نفسه كويس وأول حرف من إسمه (ر)، أي أغنية لماريا أو نانسي عجرم أو كاظم أو..........
(صوت صفارة، السكة تقطع).
- مرسي يا هبة على اتصالك، معانا إتصال تاني...
- آلوووووووووو... أنت مش جاي على العشا ولا إيه؟!
- مين معايا... عشا إيه حضرتك؟!
- أنا المدام يا خويا، يا كازانوفا عصرك وزمانك، قلت لك كذا مرة سيبك من الحاجات اللي مش من سنك دي...ناوي ترجع إمتى يا سي حمادة؟!
(يتلخبط وصوته يتغير)
- يا محسن.. حوِّل المكالمات المنزلية دي Off Air.
(يخفض صوته قال يعني محدش سامعه)
- عايزة إيه دلوقتي يا ولية؟
- عايزاك تجيب لنا معاك شوية فاكهة، 2 كيلو تفاح هولندي، و3 كيلو موز تايواني، وكيلو فراولة أزباني، و.....
(الخط يقطع)
- آسف يا جماعة كان فيه نمرة غلط وعطل فني عالجناه، ودلوقتي معايا اتصال تاني، آلوو.
- آلوووووووو... برنامج عيد الحب؟!
- أيوة يا بني، بس وطي صوتك شوية، ممكن نتعرف؟!
- أنت حتصاحبني... على العموم إسمي عبد العزيز وبكلمك من الزاويا الحمرا، فركز معايا بسرعو وحياة والدك عشان أنا بتكلم من كشك السجاير اللي تحت بيتنا وواقف بالبيجامة حتجمد من البرد.
- أنا سامعك.
- الحقيقة أنا مشكلتي في السريع كده إني كنت بحب بهيرة أخت الواد قدري تهييس صاحبي، بس هي خلاص سابتني واتخطبت للواد ريشة المريش صاحبنا بردك، ومش قادر أصدق لغاية دلوقتي إنها باعت حبنا (يتشحتف) وسابتني... أقضي عيد الحب لوحدي.. طاب كانت تستنى لغاية ما اليوم ده يعدي...هئ هؤ هئ.
(صوت واحد من المارة جنبه، مش كده يا زيزو يا بني ما تموتش نفسك)
- معلش يا بني تعيش وتاخد غيرها.
- كلمة أخيرة يا أستاذ حمادة، كنت عايز أقول لها ولأمثالها منكم لله، وأحب أهدي لها أغنية صابر وراضي لسلطان الطرب جورج وسوف.
- شكراً لإتصالك يا أخ عبد العزيز، ربنا يعينك على قهرتك، وأحب أقول للأخت بهيرة إني مستني تليفونها اللي حتحكيلي فيه ليه سابت عبد العزيز واتخطبت للأخ ريشة، أكيد يا جماعة ليها وجهة نظر.
- آه ه... آسف يا جماعة المخرج بيشاورلي الظاهر كده إن وقت البرنامج انتهى، بس طبعاً ماتنسوش، إنتم معاكو نمرة موبايلي، يعني تتصلوا بيا في أي وقت، وياريت بلاش ميسدات وماسيجات لأني ما بردش عليهم.
وما تنسوش... بالحب نعيش ونموت وناكل ونشرب، فكل عيد حب وإنتوا كلكوا بتحبوا بعض وطبعاً..... بتحبوووني!!
(نفس الموسيقى الشاعرية).
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
والله اسامه منير ده مستفز جدا انا مش عارف هوه ازاي مش بيكسف ولا البنات مش بتكسف على العموم انا كنت كاتب حاجه زي كده وده سر اعجابي الشديد بالكلام ده وتسلم ايد اللي كتبه
يا جماعة عيشوا طفولتكوا بالطول و العرض و بلاش كبت و بعدين في فترة اسمها المراهقة و سموها كده لانها بترهق الاب و الام بس و لازم نعيشها برضوا و بعدين بقا كل سنةو انتوا طيبين خلوا الناس تاكل عيش
انا عمري مسمعت برنامج الاخ اسامة دى بارادتي الحرة بس انا شايف ان البرنامج ده متنفس لكتير من المراهقين خليهم يعيشوا عشان لما يكبروا يبقى فيه عندهم ذكرى حلوة ( او وحشة مش مهم ) المهم ان في ذكريات و احب اهدي اغنية ذكريات لعمرو دياب لكل اللي معندهمش ذكريات
انا برضه باتخنق منه طحن
وباكرهه
ومش عارف شعبيته الرهيبة بين البنات واخدهاعلي ايه يعني
Dabdoob
اول مرة اشوف برنامج يبرر الخيانة بكل انواعهاويحاول يجملها ويشجع البنات عليها ويملى دماغ الشباب بافكار معف؟؟؟ولا بلاش
محدش واخد منها حاجه
يــــــــــــــــــــــــ كتومونص ــــا
وتعيش وتهيس وأحنا نستهبل ونأرا
انا مختلفة مع هذه الاراء لاني اعتقد ان هناك شباب كتير محتاجين حد يسمع وبقدر مشاعرهم، فغالبا ما نجد الاهل ترفض هذه المشاعر فيلجوء الي صحابهم اللي بيكون في نفس سنهم تقريبا وبالتالي نفس التفكير واعتقد ان هذا البرنامج ينفس عن مشاعرهم لان الانسان في كثير من الاحيان يحتاج الي التحدث مع من لا لم يعرفه لانه لا ينفافقه
و الله موضوع اسامه منير دا قتل بحثا
اللى عايز يسمعه يسمعه و اللى مش عايز براحته
انا شخصيا ساعات كتير بسمعه حسب المود و الظروف
قاعد تفكرنا بحاجات حلوه يا اكرم
فكرتنا بقصيده بيقيس شكرا لكم و فكرتنا بحاجات عمرو القديمه التحفه زى ذكريات بس انا برشح للناس النهارده ف عيد الحب فيروز طبعا
مثلا اغنيه انا لحبيبى
اسمعوها و مش هتندمو
انا معاكو انو دا غلط ان اي واحد كده يعمل برنامج والشباب تقعد تكلمه وتحكي مشاكلها بس في حاجه مهمه اللي بيعمل كدا مش لاقي حد يسمعه او مش لاقي حد يقولله كلام يريحه فبيضطر انو يلجا للاسلوب دا عشان حل مشاكله والخيبه التقيله انهم بيقولو مش مشاكل دي فضايح في بعض الاحيان واللي اختشو ماتو
أنا معاكى ان فى شباب كتير عايزين حد يكلمهم وينصحهم ويحللهم مشكلهم بس اللى أنا معترض عليه وأظن ان الناس اللى كتبوا فوق دول ومنهم مريم كاتبة المقال ان يكون حل هذه المشاكل على الهوا ..
وسؤال يا ريت إجابه عليه.....
هو مين أسامة منير ده ولا خريج إيه علشان يحل للناس مشاكلها المفروض الواحد لما يستشير حد يختار حد فعلا يعرف يرد رد صحيح دكتور نفسى مثلا.
فعلا كتير بحس انه ابو العريف..عامل زي الشيخ عزوز بيعرف كل حاجة
اللى عايز يسأل مفروض يسأل شخص قريب منه
شخص يعرف عنه كتييييييير
عمو اسامة منيل ده اقصد منير يعرف كل حاجة في كل حاجة..انا بحسده على معلوماته القيمة اوي...وكمان بحسده على كمية الهبط والهبل اللي بيشوفها كل يوم من معجبيه ومعجباته..لول
اكيد هتقولوا انا حاقد عليه عشان هو مشهور وانا لأه..بس د مجرد رأي..وكمان هو مشهور بين مين؟؟..كل اللي بيحبوه في الهجايص...اشوفكم على خير
انا مش مع التجريح في شخص الشخص اسامة منير و لا في شهاداته و لا في خبراته انا مع النقد للفكرة من اساسها و كل واحد حر يحط ثقته في مين ؟؟؟
بلد شهادات صحبح
علي فكره اسامه ده روش بجد وعلي فكره كلكم حاقدين عليه هو اه وحش جدااااا ومش امور وساعات بيستزرف بس بيحل وساعات مبيعرفش يربط بس ممكن نقول الشايب لما يدلع او لا تعليق لكن منجرحوش بالطريقه دي ولا ايه
انا حسين وبتابع برنامج اسامه منير بقالي اكتر من سنتين ونفسي اكلمه بجد وكل البيتكلم عليه وحش ده مش انسان ولايعرف معني كلمه حب ومالوش قلب ده راجل تمام بنستفاد منه بجد وفي ناس كتير بتتعلم منه وياريت يذيعوا البرنامج بتاعه كل يوم ومضنش اني في بنادم بيتكلم عليه وح عنده قلب او يعرف معني كلمه حب الانسان الي بيتكلم عليه وحش ده انسان معقد نفسيا مش هطول عليكم اسامه منير راجل تمام بجد
والله أسامة منير ده أنسان محترم جدا و آرئه دى فى جزء منها ناتج من تجاربه الشخصية و الجزء الآخر من عادتنا و تقاليدنا و أنا أستفادت جدا من البرنامج ده لأنه بيعرض تجارب الشباب و بيتحدث عن قضايا مختلفة فى الحب و أوقات بحب أكتب آراء أسامة منير لأنها بتفدنى جدا و بتخلينى أزاى أعرف أتصرف فى مواقف معينة و أكيد يا جماعة كل واحد فينا مر بتجربة بيحتاج فيها لنصيحة شخص عنده خبرة فى الحياة و انا شايفة أن أسامة منير مابيشجعش ع الفساد زي ما ناس كتير بتقول لكن هو كل اللى بيعمله انه بيقدم النصيحة المناسبة لأى مشكلة بيسمعهامن غير ما يخرج عن عادتنا و تقاليدنا
انا بحب اسامة منير موت ونفسى اعرف اية اخبار اهل حنين وانا بجد منهارة من المضوع دة
انا بشكرك علي البرنامج اللذيذ بتاعك يا اسامة وبشكر مروة حبيبتي الي انا في خلال اسبوع هكون متزوجها عشان انا بحبها مووووووت وعلي فكرة يا اسامة مروة حبيبتي هيا الي عرفتني علي البرانامج بتاعك واحنا بنحبك اوي يا اسامة وبنحب البرنامج بتاعك والله العظيم وانا اريد ان تهديلي هذا الاهداء لحبيبتي مروة مصطفي بالمعادي انا محمد عادل من المطرية وياريت تعرفها ان انا بحبها موت وبغير عليها من الناس كولها يا اسامة وشكرا جزيلا علي مساعدتك اليا اخوك محمد عادل من المطرية
هاي اسامة انا محمد عادل الي كتبتلك قبل كدة بس علي فكرة انا مش زعلان منك عشان انا عارف ان الضغط عليك كتير من المعجبين بس انا نفسي اقول لك ان انا بحبك اوي يا اسامة اناوزوجتي
البرنامج حلو جداوميتئئئلش التعليق السخيف دا الا من الحاقدين ودا لو مش برنامج ناجح مكنش استمر الفترة دى كلهاولا اكمنو نجم والشخص اللى يخوض تجارب كتير اكيد بيئدر يحل مشاكل الغيرزى مشاكل الحب والخيانة وغيرها كتير من المشاكل
والله اسامة منير ده مسهوك و مالوش ف البتنجان ملقيوش حد اصغر منه شويه يقدم البرنامج ده . على طول شايف نفسه لسه صغير . ده برنامج هايف و تافه و مالهوش اي لازمة و اللي زعل يتفلق طظظظظظظظ
انا عن نفسى بحب اسامه منير بس مش بحب الهيافه الى البرنامج فيهالا كن سعات بيتكلم فى مواضيع جد ومفيده يعنى البرنامج نص ونص
انا بشكر المذيع اسامه منير هو وحاتم منير على البرنامج الرائع وبقولهم ربنا يوفقكم
انا بجد معجبه ببرنامج اسامه منير وعايزه اكون صديقه للبرنامج بس ياريت حل المشكله اي مشكله يكون حازم
عن جد الشعب المصري تافه وبايخ .
والله من اصلك يالنجديه تقولين ان الشعب المصري سخيف
هذا من كرم اخلاقك واحترامك وتربيتك
البرنامج هادف يوجه نظر الكبار إلى مشاكل أولادهم الشباب التى هم بعيدون عنها تماما
وهو بمثابة فضفضة للشباب والحمد لله إنهم وجدوا من يسمعهم
يا جماعه زعلانين ليه من اسامه منير دا يعتبر سمكري العواطف عامل برنامج بيشتغل به البنات والبنات فاضية مش وراها حاجه وهو فاضي . من ضمن المواقف بنت اتصلت به بتقوله انا صاحبي بيحبني وبيطلب منها حاجات وهي مش عايزه تعملها فبتضطر انها تعملها عشان متزعلهوش يقوم يرد عليها يقولها لا لا لازم تكوني مقتنعه بالشئ اللي بتعمليه بالله عليكم رد بيحل مشاكل ايه وبتاع ايه وقال ايه عاطفي مع انه شكله مش عاطفي خالص شكله كان بيشتغل صبي في ورشة عربيات سمكري يعني . فطور نفسه بقي سمكري عواطف . ولا تعليق
أنا متأكد إني أسامة منير لو كانت عنده بنت مكنش سامحلها بالكلام في البرنامج. و لا أعتقد أن أي بنت أو ولد محترمين و متربيين ممكن يرفعوا السماعة و يحكوا اللي بيحكوا. بالشكل دا بلدنا بتنحل و بناتنا في ضياع أكتر من مهما ضايعينز مش كلهم طبعاً لكن الأغلبية. يا أسامة منير خاف ربنا و على بنات الناس من إغراءك لهم بصوتك المعسول.
اسامة منير بجد احسن برنامجو بيحل لناس كتير مشاكلهم و انا عن نفسي بستفاد منه كتير و بقوله بنحبك موووووت كلنا يا اسامة انت و حاتم و نجوم fm كلها
اسامة انسان محترم ومش دة جزائة انة بيحل مشاكل ناس كتير وبعدين الى مش بيحبة ميسمعوش وخلاص بدل ميكتب كلام جارحوعلى فكرة مش البنات بس الى بتكلمة دة انسان كبير وواعى ومحترم جدا واللهوربنا يكرمة ويجازية خير
اسامة مش ليه ذنب لان فكرة البرنامج اساسا عن الحب عاما حب الاهل والاصدقاء الذنب ذنب المتصلين
انامن عشاق اسامه منير وصدق نت اطلق عليه اسم (امير الرومانسيه)انامضايقه جدا من الناس اللى بتجرحه عشان الناس بيحبوه وله جماهيريه كبيره الناس التانين يحقدوا عليه
اسامه راجل محترم وكل الى بيقول عليه كلام مش محترم عنده نقص ولا ايه يا حماده
كل سنه وانت طيب يا حماده انت فين مش باين
احب اقول فى اول كلامى انا محمد من الحدائق القبة طالب فى كلية الفنون التطبقية قسم ديكور كان فى حب قديم بس خلاص راح عايز ابدا احب من جديد يس حب صح وسليم قولى اعمل اية وعلى العموم دة رقم تلفونى 0108560433 ارجوك تكلمينى ضرورى