انتقل إلى المحتوى
عشريناتأرشيف موقع الشباب العربي ٢٠٠٤–٢٠٠٩

"إنها لم تكن النهاية"..!

قراءة في ٥ دبقلم هشام حمزة

دائماً كنت أحتقر التدخين والمدخنين ولم يخطر ببالي أن أدخن في يوم من الأيام. إليكم قصة شخص لم يدخن فحسب، بل أصبح مدمناً لفترة استمرت أربع سنوات إليكم القصة بنتائجها السلبية والإيجابية. لا تتعجب توجد نتائج إيجابية ومؤثرة في هذه التجربة. أتمنى أن تكون مثيرة و شيقة . و أتمنى أن تدعوا لي بدوام التوبة و الثبات.

اللحظة الأولي ودقائق ندم

كانت البداية في الصف الثاني الثانوي عندما كنت بمدرسة حكومية تجمع بين كل الأصناف والشخصيات والمستويات. وكانت الشلة المجتمعة لا تفكر إلا في الهروب من المدرسة وفعل أي شيء خطأ وغير قانوني. أحد الأصحاب الذين أتذكرهم حتى اليوم جلس بجانبي وقال ( يا عم ماتخدلك سيجارة و ظبط دماغك) طبعاً لم يكن هناك خيار إلا أني أسمع كلامه (وساوسه) ولم أتردد وقمت بإشعالها وبداية رحلة التدخين اللعينة. عندما عدت للمنزل كنت خائفاً جداً لأني فعلت شيئاً

أحسست بأني كنت (ممكن أقول لأ) وإحساس بالندم حتى اليوم التالي، ونفس الصديق يقابلني ويقولي إيه أخبارك دلوقتي. طبعاً وصفت له كم الملل والندم. وهو راح مطلع سيجارة تانية ومولعها وقالي أتفضل. وأنا أترددت لثواني معدودة لكن للأسف لم استطع التغلب على الشيطانين (الشيطان + صاحب السوء). و هكذا أستمر الحال في المقابلات. لم أكن أدخن مفرداً أبدا. لكن بعد فترة بدأت أدخن مفردي..وبكميات أكبر.

التطور الملحوظ في الانحراف

ثم كانت نتيجة التيرم الثاني من العام وكانت النتيجة غير متوقعة (وحشة جداً) بالنسبة للمستويات السابقة. فقررت الابتعاد عن المنزل والتفكير مفرداً وأنه لابد من التغيير والتطور وإصلاح النفس. بينما أنا أفكر في تلك الأشياء، إذا بالوسواس يعود مجدداً.

وبدأت أفكر أن أقلل من التدخين وأن أدخن كل يوم سيجارتين أو ثلاث. انتهت تلك الفترة التي والتي كانت لمدة أسبوع و بدأت في العمل مع والدي الذي لم يعرف حتى الآن ماذا فعلت. بدأ العام الدراسي الجديد وقمت بمصاحبة أناس جدد وأصحاب فكر أرقي. وكنت أدخن لكن مفرداً وكميات ضئيلة جداً والحمد لله تحسن مجموعي والتحقت بكلية العلوم .

ولم أكن أتخيل هذا الكم الهائل من المذاكرة والحفظ. فقمت بالتحويل إلى إحدى الكليات ببورسعيد وهناك كانت بداية النهاية. والشلة الضائعة فعلاً، وبدأت أشرب الحشيش والمريجوانا معهم، وذلك لابتعادي عن ثلاث أشيء أهمهم (الابتعاد عن الله) ثم (الابتعاد عن الأهل والأقارب) وأخيرا الابتعاد عن الأصحاب الحقيقيين.

المشكلة الحقيقية

(كل واحد فينا بيحب يعلق مشاكله والعوائق اللي بتقابله على شمعات كتير ومالهاش أي لازمة) ده التفكير اللي ماكنش في دماغي في ذلك الوقت. كل المشكلة عندي أن محدش يعرف المصايب اللي بعملها وخلاص، وطالما ماشي في الكلية كويس وبجيب تقديرات يبقى كله في السليم ومافيش مشاكل. ورجعت لفرع الكلية بالقاهرة وقابلت شلة زي الفل (كلها عيال ضريبة و مدمنين و حالته كرب) و استمرت الدوامة حتى سافرت أنا وأصدقائي إلى الإسكندرية بغرض التصييف والاستجمام (و ياريتني ما رحت) ..

المهم و إحنا مسافرين كنا عاملين حسابنا إننا مش هانشرب أي حاجة و نبقى في السليم. لكن للأسف وقعنا في شلة (ضياع بجد و حقيقي) كانوا جيراننا في الفيلا اللي جانبنا، وبدأنا الشرب (الضرب الجماعي) و استمرينا على الحال لمدة أربع أيام، وكانت المفاجأة في اليوم الخامس.

المفاجأة السارة فعلاً

الساعة 2 بعد نص الليل. حيث أني شربت كميات كبيرة جداً جداً. بدأت أحس بهبوط في الدم. وجلست أفكر، وكان الجواب (قم و كل) وبالفعل أحسست بالتحسن، ورجعت أشرب تاني وبكميات أكبر وأكبر. المرة التانية كان الهبوط أشد وأشد..

وبدأت أفقد توازني بشكل ملفت وكان الجواب (قم و أتمشى شوية يمكن تفوق) وبالفعل أحسست بتحسن. في المرة الثالثة كانت النهاية التي أتمناها وهي Overdose (جرعة مفرطة) ولا يقدر على تحملها الجهاز العصبي، ولم يكن هناك جواب في تلك المرة إلا أني أصبت بإغماء شديد أستمر لأكثر من ساعة. أصدقائي في تلك الأحيان كانوا يبكون لأنهم اعتقدوا أني قد مت ولم يفكروا أن يحضروا دكتوراً لخوفهم من السؤال والفضيحة.

وبينما يفكرون في أنني مت و طريقة إبلاغ أهلي. أما أنا فكنت أشاهد فيلما سينمائياً بطولة (أنا) وكانت بداية الفيلم من أول سيجارة، وكانت النهاية التفكير في مقابلة الله تعالى بهذه الحالة وانتهى بالبكاء الشديد الذي أفاقني تماماً و فتحت عيني وجدت أصحابي يبكون بجانبي، فسألتهم لماذا تبكون..فكان الرد أحنا أفتكرناك مت.

فقام أحد زملائي الذي أحس بي فعلا بالتخلص من باقي المخدرات، وكان آذان الفجر فقررنا جميعاً أن نغتسل ونصلي في جماعة وأن نعلن توبتنا من هذه الساعة وأن نساعد أنفسنا على ترك العادة والإقلاع عنها فوراً.

وفكرنا بالرجوع إلى القاهرة بعد تلك الليلة لكن كلنا كان مصاب بحالة من الذهول والخوف من تلك الليلة فقررنا جميعاً أن نكمل المدة المتفقين عليها دون أي مخدرات ولا مكيفات. وبالفعل كانت تجربة ذات نتيجة إيجابية، وهي إقلاعنا جميعاً ليس لاقتناعنا بخطورة المخدرات بل لخوفنا من سوء الخاتمة.

بعد العودة من الأزمة

وعندما عدنا إلى القاهرة اتصل بي أحد أصدقائي، وقال لي (أنت والله عيل كبير وماعندكش ذوق)، فسألته ليه؟!..قال لي أن أحد زملائنا مات في ظروف حادث غامض وأن التحاليل أكدت أنه كان تحت تأثير مخدر وإن أهلوا كانوا في حالة يرثى لها. لم يكن مني أي جواب إلا البكاء الشديد والدعاء لصديقي بالتوبة والمغفرة. ومرت الأيام والأسابيع والشهور وأصبح دمي خالياً من السموم تماماً و أنا ألان أحس بتحسن يوم بعد يوم .

** كتبت قصتي ليتعظ منها أصحاب العقول فقط..وأيضاً لكي يدعو الجميع الله لي بدوام التوبة والثبات على الطريق السليم.

الكتّاب

تعليقات القرّاء

تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.

  1. والله عرفتك حُفظ في
    هو انت هشام حمزة بتاع السادات
    ايوة انت عرفتك من طريقة كلامك
    اعرفك بنفسي
    احد ابطال القصة المشبوهة
    سلام
  2. قشطة عليك يا مان حُفظ في
    الله يرحم يا عم أتش
    بقيت تكتب مقالات اهه
    المهم
    ربنا يعينك و يثبتك و يغفر لك ان شاء الله
    و خللي بالك من امتحانات التيرم ده
    خللينا يا بني نخلص و نشق طريقنا
  3. فيه حاجات ناقصة حُفظ في
    ماشي يا مان
    كده تفضحنا
    بهرج طبعاً
    يارب يهدينا جميعاًو يهدي باقي الشباب
    ياض يا هشام انت السبب و ربنا هيجازيك خير
    سلام يا معلم
  4. مبروك حُفظ في
    i read it
    this emphasises taht God loves us more than we love ourselves
    ity's true that they r hadr lessons , but it's the only way to learn
    so congratulations
    rasha
  5. الواد ده كداب يا جدعان حُفظ في
    انت كداب كبير اوي ياواد يا هشام
    انا مكنتش بعيط عشان افتكرتك مت
    انا كنت بعيط عشان انت الوحيد اللي كنت بتلف لنا
    و لما اغمى عليك كنت زعلان عشان مش هنكمل الليلة صح
    بس ممكن نعملها فيلم و نسميه (شباب لاسع و عاقل)
    تامرtamer_sams@yahoo.com
  6. يا سلام حُفظ في
    يا سلام عليك يا باشا
    هو انت عبيط و لا بتستعبط
    و لا انت بتعيش
    المهم انا متأكد أنك لسه مبطلتش
    و الدليل أنك لسه عايش
    إمضاء
    مدمن قديم أوي
    أشوفك في الاكاديمية بكرة
  7. هشام حمزة حُفظ في
    و الله انا عارفكم واحد واحد
    و ربنا يهيدينا جميعاً
    و ربنا يستر التيرم ده
  8. عندي قصة شبيهة حُفظ في
    يخرب بيت الهبل يا جدعان
    هو الكل بيشرب و مقضيها و لا ايه
    المهم
    انا برده مبطل بقالي فترة كبيرة بس مش عشان الموضوع اللي انت بتقوله يا هشام لكن عشان اخويا مات و هو بيشرب
    فياريت الكل يدعي له بالمغفرة
    و ياريت المجتمع يتعامل مع المدمنين على انهم ناس ضعاف و محتاجين عون و مساعدة
    مش ناس جاحدة و مش بني ادميين
    ياريت الكل يدعي و يستغفر
    ربنا رحمته واسعة اوي
    مؤمن بركات
  9. SLAMAMUSLM حُفظ في
    ربنا يثبتك على الخير والتوبة وربنا يتوب على اخوانا جميعا واباءنا وابناءناوجميع المسلمين آآآآآآآآآآآآآآآمين
  10. SLAMAMUSLM حُفظ في
    ونصيحة شوفلك شلة مسلمة مؤمنة تعينك على الخير لان البحر ياسيدى موجه عالى قوى والشلة المؤمنة هتربطك بالله بحبل متين
    والصلاة وطاعة الله هى النجاة الوحيد وكتاب الله النور الذى تركناه تحت مخدتنا ومدخلشى روحنا ومخنا لسه عليك بيه ينور قلبك ويثبتك وشيله فى جيبك علطول واقرا فيه ربنا يثبتك على الخير ويتوب على اهلنا جميعا انه ولى ذلك والقادر عليه
    "ربنا لاتزغ قلوبنا بعد إذ هديتنا وهب لنا من لدنك رحمة إنك انت الوهاب" صدق الله العظيم
  11. Salam Alikum حُفظ في
    firstlly i wanna to thank all youth who work and serve this website
    it is really good and nice, but need developments
    i read ur article Mr Hesham,
    and i have a comment
    Allah Loves you more than U love urself
    and u have to love him 2
    so try to be intouch with Allah by praying and reading Holey Quran
    then u will find it nice and wonderfull life
    Dr: Karima
  12. ايوة كده حُفظ في
    و الله نسيت كنت عايز اقول ايه
    المهم كل سنة و انتو طيبين
  13. سؤال لمن وضع المداخلة اللي فوق؟ حُفظ في
    كل سنة وإحنا طيبين بمناسبة إيه؟؟؟؟؟
  14. اين الشمحطجى ؟ حُفظ في
    كان نفسى الاخ الشمحطجى يقول رأيه فى الموضوع ده
    اكيد الشمحطجى ليه تجربة ثرية فى هذا الموضوع
    علشان نستفيد
  15. الشمحطجي بح حُفظ في
    بح يعني خلاص اختفى
    يمكن أبوه شاف فاتورة النت نااااار فباع الكمبيوتر
  16. تم حذف حُفظ في
    عفواً .. لقد تم حذف المداخلة المعنونة بـ "الشمحطجي..أيوة يا خفيف" .. وتم حذف كل ما يتعلق بها في المداخلات التالية ..
  17. هشام .. كمل مشوارك يا بطل حُفظ في
    انا عاوز اكلم هشام لوحده
    كمل مشوارك يا بطل .. ربنا اعطاك حبل النجاة .. وعديت .. من بعد ما دقت ملوحة البحر .. وشكلك مش ناوي ترجع تاني .. اوعى ترجع .. تجربتك هتكون مرجع لناس كتير يتمنوا يقابولك مرة واحدة.. ويتعلموا منك .. اتش يا جميل .. كمل مشوارك يا بطل
  18. بس قصة لذيذة حُفظ في
    معلش يا اتش
    انت كده احسن
    و ياريت تستمر و ربنا يهديك
    ياريت يا هشام تتعرف على شلى تانية تعينك على طاعة الله و البعد عن اصحاب السوء
    صديقك
  19. hey man حُفظ في
    i have a same story, but my story done in cairo
    and finished as ur one
    from this day i close my relations with thier friends
    now i have another group, all of them think in future and work hard to reach our goals
    thanx man for ur great story
    please i wanna to ask all workers in this
    website to publish stories about youth and problems they face
    thanx a lot hesham
  20. خذوا الحكمة حُفظ في
    خذوا الحكمة من افواه و مواقف اللصوص
  21. Boly حُفظ في
    الله يرحم زمن الضرب يا H
    فين ايام الكودا والسوماوالتخدير العالى يا ريس :)
    دلوقتى فرداية الترامادول ب 5 جنيه
    يا راجل دى حاجة تطهق
    ضريب قديم من اسكندرية
العودة إلى الأعلى