بسلامته.. بيخطب!
*(ملاكي القاهرة – فيات 132)
الراديو: إذاعة القاهرة الكبرى – برنامج ربات البيوت
هي: ما تعلي الراديو شوية يا محسن، موش كفاية الوقفة المهببة اللي احنا واقفينها من ساعة دي؟
هو: حاضر يا علية.. بس متشتميش الوقفة..
هي: يعني يا ربي احنا ذنبنا إيه بس نتركن عشان خطبة بجنابه في المناسبة المهببة
هو : ملناش ذنب، بس متشتميش المناسبة
هي: اسكت أنت، أنا بشتم الخطبة
الراديو: ودي وصفة هايلة لشربات الخطوبة، بنقدمها لكل زوجة عشان تقدمها في خطوبتها!
*(تاكسي – ريتمو- أجرة القاهرة)
الكاسيت: مبخافش وأنت عارف – شعبولا
السائق: الواحد لو يعرف أنه هيخطب النهاردة، كان حاسب الزباين بالساعة موش بالمسافة..
الراكب: وهو يا اسطى العطلة دي عليك لوحدك، ما انا كمان متعطل، يلا.. ربنا يزيحه..
السائق: هو ايه ده؟
الراكب: البرد... البرد اللي على صدري يا اسطى.. أصلي رايح أم المصريين عشان اكشف واخد علاج تبع التأمين..
السائق: والبيه شغال ايه
الراكب: بعيد عنك... قاضي!
شعبولا: إيييه إيييه إيييه
*(جمرك 88 الطائف – فيات 128)
الكاسيت: سنخوض معاركنا معهم
هو: الحمد لله، فزنا والقلق انتهى
هي: انتهى، ما هو بسلامته رايح يخطب، وكلنا متعطلين بسببه
هو: الصبر، المهم اننا اثبتنا وجودنا وكسبنا
هي: ماما كلمتني وفرحانة قوي باداءنا في البطولة
هو: متنسيش أن تفوقنا على الاهلي كان صعب، واتحاد جدة رغم انه نادينا الا انه بقاله فترة موش في المود
الكاسيت : ونعيد الحق المغتصب.. وبكل القوة نردعهم
*ملاكي (جدا) القاهرة – 76 – جيب شروكي
سي دي عمرو دياب الجديد
هو: ما توسع يا حمار، هو انا لازم اخبطك عشان تتعلم تسوق
هي: اهدى شوية يا تاكي، انت عارف الشارع كله واقف
هو: سيبك إنتي يا سوسن، انا اللي مصبرني المناسبة السعيدة، بابا كان هيروح فيها لو كان اتقلش
هي: وهو بسلامته يقدر يخطب من غير وجوده، هي الخطبة تحلى إلا بوجود الأكابر
هو: عندك حق، وولاد الأكابر كمان، هو احنا شوية في البلد
عمرو دياب: حفظت كل كلامك صم.. تحب أسمع؟
*(تحت الطلب – 2477 منوفية)
الراديو : نجوم أف أم
هو: تفتكري هنوصل؟
هي: لازم نوصل، لاني موش قادرة استحمل، ولإني كمان موش هولد في الشارع
هو: لو ولد هسميه جمال
هي: ولو بنت هسميها تشريفة
هو: موش كنا سافرنا ولدتي جنب مامتك
هي: يا حبيبي ما أنت فاكر من سنة لما سافرنا كفر مصيلحة، الخطبة اللي فاتت كانت قافلة الطريق وولدت عند كريمة الداية
هو: اهي الخطبة دي كمان قفلت الطريق، معاكي رقم كريمة
برنامج يوم: لازم الأب يكون قدوة للأطفال، عشان الولد سر أبوه، ولو ابوه سره انفضح، الواد هتبقى سيرته على كل لسان..
(تاكسي – أجرة جيزة)
الكاسيت: ألبوم الحزب الوطني في مصلحتك
الراكب : قلتك بلاش اكتوبر
السائق: وهو احنا عندنا غيره يا بيه.. ده هو اللي ساترنا
الراكب: يا اسطي ده طلع مقلب
السائق: صبرك بس، شوية والحال هيمشي
الراكب: الحال موش هيمشي طول ما اكتوبر موجود
السائق: الصبريا بيه، الكوبري في مرحلة اصلاح، ولازم نستحمله
الراكب: ما هو برضه بقاله سنين طويلة لما اتخنقنا
السائق: هو مين ده؟
الراكب: أكتوبر يا اسطى
الراديو: يبقى انت اكيد اكيد في مصر
سور الكوبري
هي: انا موش فاهماك يا اخي، ايه بس اللي ينزلنا من العربية
هو: يعني انت شايفاها ماشية قوين انا قلت ننزل نقف جنب العربية لحد ما بسلامته يخلص الخطبة
هي: ده أنت رايق قوي
هو: نفسي اقعد فوق السور
هي: اقعد يا حبيبي، بس اوعى تقع
هو: ولا اقع، هموت يعني، ولو مت، ساعتها ابقي خلي بالك من العيااااااااااااااااااال!
هي: مدحت، قلتلك حاسب تقع يا حبيبي، مدحت، إلحقوني..
- يالا يا مدام، عربيتك موقفة الطريق، خلونا نمشي، موش هنفضل واقفين في مكاننا على طول!
*بتاع جرايد تحت الكوبري
- مانشيت رئيسي بجريدة الفجر القاهرية: عدد خاص بمناسبة خطوبة جمال مبارك
- الدستور : زفة أسطورية من الزاوية (بيت العروسة) لمصر الجديدة (بيت العريس) تشل المرور لمدة يومين
- الأهرام : البورصة تنتعش بعد الخطبة المباركة
- الأخبار: نظيف ينفي أن تستقيل الحكومة بعد الخطية
- مايو: صفوت الشريف والعادلي والشاذلي والألفي والدراملي يهنأون العريس
- روزاليوسف : جمال أعاد البسمة لوجوهنا بعد فوز الإخوان المؤلم
- آفاق عربية: الخطبة في الإسلام
- إخوان أون لاين: ارفع رأسك يا جمال، ولا تقبل يد عروسك
- عشرينات: بسلامته بيخطب!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
حلو قوي يا أنس ....
وجميـل ، أنا فيه مقاطع عجبتني قوي ، خاصة ( أكتوبر ) ،،، وحاجات تانية ....
لذيذ
سي دي عمرو دياب الجديد
هو: ما توسع يا حمار، هو انا لازم اخبطك عشان تتعلم تسوق
هي: اهدى شوية يا تاكي، انت عارف الشارع كله واقف
هو: سيبك إنتي يا سوسن، انا اللي مصبرني المناسبة السعيدة، بابا كان هيروح فيها لو كان اتقلش
هي: وهو بسلامته يقدر يخطب من غير وجوده، هي الخطبة تحلى إلا بوجود الأكابر
هو: عندك حق، وولاد الأكابر كمان، هو احنا شوية في البلد
عمرو دياب: حفظت كل كلامك صم.. تحب أسمع؟
ـــــ
الله ينور عليك يا أنس يا ابني ..
خلي بالك أصلي سيادته بيخطب دلوتئي ...
تخيل أسرة عمي كلها ... مراته وبناته حاولوا يتفرجوا علي سيادته وقعدوا أدام التليفزيون .... وعصروا علي نفسهم لمونة ...
لكن الحقيقة كافحوا ... استمروا أكتر من نص ساعى بسمعوا لسلامته تخيل ...
ربنا يكون في عون أعضاء مجلس سلامته ... من اول يوم كده ياخدوا طريحة تعذيب بالشكل ده ... وعايزينهم يشوفوا لنا مصالح بعد كده .... ده كفاية عليه سلامته
في صحة سلامته ....
لا للتمديد ... لا للتوريث ... نعم لتعديل الدستور المصري
mohamedmat@hotmail.com
صحيح ... أنا نسيت أسألك .
إنت قصدك مين بـ" سلامته " ؟؟؟
يعني بتتكلم عن شخص معين ولا واحد بتحبه ولا علي اي واحد ؟؟
أنا مفهمتش ممكن توضح ؟؟
وابقي طمني عليه ..... و علي سلامته
لا للتمديد ... لا للتوريث ... نعم لتعديل الدستور المصري
mohamedmat@hotmail.com
اخترناه اخترناه يوم ماعبر و قلوبنا معاه....أه يا لوكس
يقى جمال خطب .....يا ألف نهار أبيض .. و امه ال... دي مش كانت تعزمني
ده جمال ده روحي روحي روحي ... و قلبي من جوه... ياللا بخاطرها امه
إيه ده!
هو عملها واتجوز من ورايا!
خسئت يابؤله
بجد مش ممكن....جميلة اوى اوى
سلمت يمناك ربنا يبارك فيك..
عجبتنى اوى بتاعة الداية
ربنا يكرمك بجد
ya gd3an rbna m3ah weokhtob wetgoz kman,bas almohim ino lma egeb molod sogher haesmeh ieh?
fkro wana ha2oloko almra algaya 3lshan hakon lsa kharg mn almo3tkl.
lo 3ndk i3trad 3aal gowaz gmal plz add me and talk with me wana hakn3k ino most2blo wi7na mlnash d3ow.yuri_troy@hotmail.com
إخص عليك ياجيمي بقي تسيبني و تروح تخطب واحدة تانية
الكلام ظريف و خفيف والله 000
و المشكله أن الكلام ده ماشى فى الواقع فمثلاً انا اعرف ناس اصحابنا بعيد عنكم من مدينة نصر بينزلوا من البيت الساعه 10 يوم الخطاب المهبب ده عشان يلحقوا ميعاد الساعة 12 و بيوصلوا فى حدود 2 , 2 و نص وفى احسن الحالات بيوصلوا 1و نص
فبصراحه حاجه تقرف