هاتتفرج وهاتضرب بالشبشب
تكلمنا من قبل عن نظرية عاجبنى وهاتضرب ، أما اليوم فوقفتنا مع الأحدث في معمل تكريم المواطن العربي وهى .. "هاتتفرج وهاتضرب" .
والنظرية الجديدة التي تستهدفك بصفتك مشاهد، قد خرجت من مبنى قناة "روتانا"، وبالأدق من خلال الـ promotion الخاص بالحلقة الجديدة من برنامج "السينما والناس" للدكتورة هالة، وبالخصوص الخصوص من فم الفنانة حنان ترك وهى بتقول: "أوعى تغمض عينيك وإلا هاتضرب بالشبشب على بقك"!!!.
لا اعرف إن كنت على حق في ما أقول وان كان الأمر يحتمل الاختلاف في الرأي، ولكن ما اعرفه جيداً أن فمي بعد أذني ومعهم كلى، يشعروا بالاهانة كلما سمعت هذا الفاصل وهو يعاد كما تعرفون ولا عشر مرات يومياً.
واعرف أن الحلقة كانت خاصة بمسلسلها الجديد الذي تم عرضه خلال شهر رمضان "أولاد الشوارع"، واعرف أنها قامت بتقليد أسلوب أولاد الشوارع والحديث بطريقتهم طول الحلقة، كما فعلت في حلقة مسلسل "سارة" العام الماضي، واعرف أيضا أن اغلبنا يروق له طريقة الترويج التي يتبعها البرنامج، وننتظر الطريقة التي ينطق بها ضيف كل مرة الجملة السحرية "مش ح تقدر تغمض عينيك"، وأتذكر لأحمد حلمي موقفه الرائد عندما رفض بطريقته انه يقولها.
لكن أن يصل الموضوع للضرب بالشبشب..فلا بد من وقفة!!
لماذا لم تفكر حنان أن الكلمة وبرغم السياق التي جاءت به قد تستفز قطاع من المشاهدين، وماذا لو تلقت حنان خلال الحلقة مكالمة من أي مسئول أو فنان آخر، هل كانت كلمته بنفس الأسلوب بمعنى أنها أهانته وشتمته؟ هل كانت ستسير على نهجها الذي لا يوجد مبرر كافى للتمسك به طول الحلقة؟، وسؤال آخر ألا يوجد في قاموس أولاد الشوارع غير الشبشب..الم يكن هناك ما هو أخف وطأً على مسامعنا وأفواهنا؟
مهما كان رأينا فى كلامها، هى بالفعل قالت كلمتها، ولكن أن تعاد على مدار أسبوع على الشاشة، أليست هذه مشكلة القناة، ألم يفكروا أنهم قد يخسروا عدد من مشاهديهم، أم هي ثقة في أنفسهم ولا في قدرة الناس الزائدة على التسامح والقبول بأي شيء؟.
هذه الأسئلة موجهة لكم بالأساس، لكن فكرنا أن نخبركم برد قناة روتانا والفنانة حنان ترك عليها قبل أن تشاركوا انتم برأيكم ..
فكرت أولا أن اكلم "حنان" يمكن يكون لها رد، أو ممكن تفهم كلامنا وتتفاعل معه كما نتوقع منها، المهم حصل وكلمتها وكان الرد وباسلوب من فاض به الكيل:
ـ "آه آه في ناس كتير كلمتني على الموضوع ده، بس مش أنا المسئولة عن الموضوع، وممكن تراجعي القناة في الموضوع ده ..اوك باباى يا جميلة "
** .. بس انا بتكلم عن حنان ترك وردها على جمهورها ؟
- بنفاذ صبر جعل طريقة كلامها أكثر سرعة قالت: "أنا قلت في البرنامج زينب بنت الشوارع يتقول لكم أوعى تغمض عينيك والا هاتضرب بالشبشب على بقك، هم عملوه برومو دى غلطتهم، وكمان حذفوا كلمة زينب بتقول، دى غلطتهم وزى ما قلتلك المفروض انكم ترجعوا لهم مش لى".
** وليه ما نقولش ان حنان ترك المفروض هى اللى توضح ده؟
- "انا مش هاضيع وقتى فى الرد على كل حاجة ده مش معقول".
**يعني أنا لو قلت انى باحب حنان ترك وكلامها بالنسبة لي مستفز وحسيت انها بتشتمنى ده حاجة عادية؟
- "لا طبعا، وعموما لأن فيه ناس كتير كلمتني في الموضوع ده، انا هاطلع اعمل توضيح قريب".
** طيب ممكن ايميلك عشان أبعت لك التعليقات على الموضوع من الناس المهتمة بك ؟
- إيه..لا مش مهم، أنا هاطلع في القناة وأوضح وخلاص..سلام يا جميل وميرسى على اتصالك".
انتهى الاتصال.. لا استطيع أن أقول أنه خاب أملى، ولكن أنتقلت للخطوة المفترضة وبدأت رحلة البحث عن المسئول داخل القناة..
كلمت الصحفية أميرة ملش ـ من أسرة تحرير البرنامج ـ لم تكن هي المسئولة عن إعداد هذه الحلقة، لكنها أوصلتني بباقي الفريق، لكن قالت لي "أنا عارفة آن كل واحد من حقه يفهم الموضوع بطريقته ويقول رأيه فيه، لكن أنا عن نفسي كمشاهدة لا أجد مشكلة أو استفزاز".
كلمت رئيس تحرير البرنامج الاستاذ "محمد هاني" قال "أنا معاكى أن الكلام مستفز، لكن هل نزل فعلا promo بهذا الشكل؟، بصراحة ليست عندي فكرة.. أراجع القناة وأعود لكم.."
مازلنا ننتظر الرد..شاركونا بالرأى وتابعونا.
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
اولا::يعنى انا عايز اعرف يا منى حنان قالتلك انها متقصدش انها تقول فى الاعلان كده وهما عملوا المقطع ده على مزاجهم وحذفوا منه وانا عارف انى اخلاق حنان ترك متسمحلهاش انها تقول كده عن قصد .
ثانيا: انتى بتقوليلها ايملليك عشان تشوفى التعلقيات بتاعت الناس اظن انى دى حرية شخصية انها تديكى الايميل بتاعها ده اساسا لو عندها ايميل هيا عندها موقع وبيتجدد حاليا وجروب اتوقف رسايله بعد ما تحجبت واظن انى مفيش ايميل وهيا قالتك هوضح قريب صح.
ثالثا: طريقة حنان فى التلفون كده بتتكلم بلهوجة وبسرعة كدا عشان بتبقى all time busy وكمان بتحضر دروس علم غير ندوات المسلسل .
رابعا: ياريت تخدى كلامى بصدر رحب بدون اى زعل لأنى حنان ترك شخصية غالية عليا اوى لانى اتكلمت معاها شخصيا كذا مرة ومنتهى الاخلاق اللى فى الدنيا
خامسا: اخر 3 ارقام من موبايل حنان ترك هما 438 واوعدكم انها تتدخل ترد على موضوعك ده يا منى وتشارك الناس فى رأيهم
وشكــــــــراا
كازانوفا
www.cazanoova.blogspot.com
جملة حنان مستفزتنيش قد ما موضوعك التافه استفزني....واضح انك مشش لقية حاجة تكتبي فيها فضربتى اي موضوع في الهوا....و المستفز اكتر ان بتوع عشرينات حاطين الأي كلام ده هوم باج !!!
كل بني ادم خطاء وخير الخطاؤون التوابون ,, وبعدين ياستي مش هي اعتذرت؟؟ وهتوضح الموضوع ده للجمهور ؟؟ يبقى ليه لازم نمسك عليها الغلط وخصوصا انها قالتها ببراءه وحسن نية؟؟
ولا عشان بس اتحجبت لازم نوقف في وشها ونشوه صورتها؟؟
عموما الكل يعرف اخلاق حنان ترك الراقيه
حاجة غريبة جدا هذا الدفاع المستميت عن واحدة بتشتمنا عشر مرات يوميا.. كأن مجرد انها محجبة ده بيعصمهامن الخطأ..
لأ طبعا حنان ترك فعلا شتمت الجمهور العربي.. وحتى الاعتذار بتتكبر عنه.. ودي مش أخلاق الإسلام اللي بتتمسح فيه حنان واللي زيها.. لأن المؤمن ليس طعان ولا لعان.. ومثقوليش بقى دي لغة الشخصية والكلام الحمضان ده.. أنا اللي بشوفه هو الست حنان وهي طالعة تهددني انها هتضربني بالشبشب على بقي...
بجد بجد دي لا أخلاق فنان ولا أخلاق مسلم. ولا أخلاق من أصله...
بصراحة البرمو مستفز جدا ومنتهى السوء حتى لو كان دى طريقة زينيب ولا مش زينيب بنت الشوارع دا كلام فاضى وربنا يهديهم ويهدينا ويهدى الست هالة
وحسبنا الله ونعم الوكيل فى اللى فاتح القنوات دى علشان القرف اللى بنشوفه كل يوم عموما الحمد لله مش بشوف القناة دى وكل لما بلاقيها بغيرها عند فى جملة مش هتقدر تغمض عينك لكن شفت البرمو لما اختى شغلت القناة الزفت دى
الله المستعان
الله يلعن هالة سرحان مليون مرة.. اميييييييييين
بص يا فرستونا حنان قالت انها بتقول كده على اساس انها زينب مش حنان ترك الممثلة بتجسد شخصية داخل حلقة وهما اللى عاملوا cut للبرمو ده وحطوه اعلان وده و ولا دفاع مستميت ولا حاجة بس اللى اعرفه انها مرتكبتش غلط وياريت فعلا تشيلوا ايديكم من على الفنانات المحجبات
اولا السلام عليكم
ثانيا
حنان شاركت فى برنامج هاله سرحان وقدمت حلقه لا توصف باقل من كلمه روعه
المهم فى العام الماضى عندما كنا نسمعها فى شخصيه ساره ونتذكر عذاب ساره كانت الدموع تسقط منا بدون وعينا لان حنان قد قامت بدورها على اتم وجه
وفى مسلسل اولاد الشوارع ايضا قامت بمناقشه قضيه هامه هى اولاد الشوارع وقامت بتقمص دور فى المسلسل وادته بدور رائع فما المشكله ان تقوم بتقمص جزء من المسلسل فى برنامج كبرنامج هاله سرحان
اليس نفس الاسلوب التى اتبعته فى اداء عبارتها نفس اسلوب المسلسل. اليس كذلك !
اذا فمن يرفض هذا الاسلوب انما يرفض مبدأ مسلسل تلفزيونى قوى ناقش قضيه تهمنا كلنا. فهل من معترض على المسلسل !
اذا فلا وجود لاعتراض على عباره
واذا وقفنا على كل عباره تقولها اى ممثله او ممثل
فنحن سذج فلا معتصم من الخطا الا الله
وهم بشر وانت بشر وكلنا بشر فلا داعى لهذه الحركات الهايفـ ... ولا بلاش
وبعدين لو انت بدوروا على عبارات بجد وبتهز الكيان العربى اسمعوا واقراءوا مقالات الكتاب الغربيين الذين يهاجمون الدين والوطن
مش كده ولا ايه !!!!!!!!!!!!!!!!
سلامى لحنونه وجميع محبيها وناقديها
البروفسير / احمد محمدى
profseer / ahmed mohamedy
http://freehost16.websamba.com/profseer1
يعنى الست المهزئة اللى بتخلى كل ضيف يقول روتانا زفت مش هتتنيل على عينك الضيوف بيقولها بنوع من الهزار واللى بيرفض بتقعد طول الحلقة تزن على ودانه ست لحوحة فعلا يبقى من الاساس كان المفروض حنان وغيرها زى جمال سليمان مثلا ترفض حضور برنامج معفن زى ده مكان واحدة زى ايناس الدغيدى ويوسف شاهين وامثالهم من الصيع.
انا مع كل المعلقيين ان القناة والبرنامج الزفت ده بيقطعوا فى كلام الضيف عشان يطلعوا جملة مثيرة تشد الانتباه .
واذا كانت الجملة ضايقت يا ست منى لومى القناة لان الجملة لو مشيت فى سياق الكلام مش هتبقى مستفزة لا ليكى ولا غيرك .
وياريت بلاش تتدخلوا موضوع الحجاب فى الموضوع خلونا فى البرنامج احسن عشان مش كل واحد متعقد من الحجاب يطلع يزعق المحجبات مش ملايكة احنا معك بس اللى مش محجبات دول يبقوا ايه ملايكة يعنى، اغلبهم شياطين
واللة انااكره هاله واللة انا اكرهك فى اللة
يوم منايا يوم ما يقبضوا عليكي في قضية آداب يا هالة الشؤم
يعنى ايه الاستموات ده وايه الاحساس اللى انتى بتحسسهولنا ان انتى بايته معها فى البيت كل يوم ورقم موبايلها وما بتفتحش الميل و و واحلى حاجه موضوع ال تايم بيزى ده ياختى عليكى وعليها والمستفز بقا انها بيزى فى دروس علم وندوات المسلسل
بلا خيبه
طبعا القناة اللى غلطانه عشان جابوا الكملة خارج سيقها زى اللى يطلع من القران لا تقربوا الصلاة كده
وحنان مش غلطانه
بس الاخت كزنوافا دى مستفزه اوي محموقه اوى مش عارف على ايه
براح على نفسيك واركزى كده
قارنوا بين النبيلة المحترمة اليهودية (راشيل كوري) و الشمطاء المنحطة التي تدعي الإسلام (و هي سلولية منافقة) المتخلفة هالة سرحان
http://www.20at.com/article2.php?sid=1379
فالأولى تستحق التكريم و الثانية تستحق البصق غلى وجهها المشدود المغطى بالمساحيق
بص يا عم المعدى اولا شكل ثقافتك على ادك وطريقة كلامك غير لبقة اساسا كازانوفا ده اسم راجل مش ست دى حاجة الحاجة التانية ثانيا واحدة بتمثل قضية موجودة فى الشعب المصرى مبحهاش ليه ويبقى فى كلام معاها باحترام وايه اللى مضايقك اوى كده ريح انتا بقى عشان انتا ضيق الافق اساسا(متروحش تسأل حد على كلمة ضيق الافق دى يا مثقف لازم تعرفها لوحدك بقى))
خفي شوية يا منى ..الرحمة حلوة
معلش العتب على النظر
بس اصلى نادر اما الاقى معجب اوى كده وراجل فى الاغلب بيكونوا بنات بس ده خطأ واعتذرلك عليه لانه فعلا مش مقصود
بس مش فاهم ايه علاقة اتساع الافق والثقافة انى اعرف كزانوفا راجل ولا ست ولو انت متخيل انى ضيق الافق وضحل الثقافة فشكرا ليك وانا هحاول مع نفسى جاهدا انى ازيد من ثقافتى وواسع من افقى خصوصا فى الحاجات اللى انت بتتكلم عنها وهحاول اشوف معاجم الاسماء عشان اعرف كزانوفا وتراجم المشاهير عشان اعرف حنان
ولو اللى ما يعرفش كزانوفا وحنان جاهل وضحل الفكر والثقافة انا اول الجاهلين واحمد الله على جهلي واعتز به جدا
ربنا يخليك البتنجان اللى انت عايش فيه
تحياتي
الناس الي سابت الموضوع وقعده تشتم في بعض ...براحه شويه علي بعض مش كده
يعني انتوا محموقين علي الكلمه الي قلتها ست السنيوره حنان وانتوا بنفسيكم اهوه عملين تغلطوا في بعض
واللهي محدش هيحترمنا الا اذا احترمنا نفسينا الاول لازم يكون الاحترام نابع مننا ساعتها بس الناس هتحترمنا
يارب نفهم
وبالنسبه لهاله سرحان فالكلام خساره فيها واقولها علي رأي عمرو دياب خلصت فيك كل الكلام ....عجيبه من عجائب الزمن هاله دي