مذكرات بنوتة مفروسة 8

وقفت أترقب العريس كالعادة .. ولما والدي العزيز فتح الباب سلم عليه ورحب بيه وقبل ما يقفل الباب تاني لقيته بيسلم على شخص تاني ودخله وشخص تالت ودخله .. كل دول عرسان!!.. صحيح الفقي لما يسعد تجي له موتين في ليلة.. وأخيرا اتقفل باب الشقة واستقرت الأشخاص اياها كل على كرسية ... مين كل دول!!! فهمت من الكلام اللي سمعته - غصب عني طبعا- أن العريس جي مع والده ووالدته...أي نعم الوالدين ع العين والراس بس أنا بصراحة مابطقش العريس اللي يجي بولي أمره ولي وجه نظر في ده:

أولا: بحس أن العريس مش مسؤل ولا ناضج كفاية عشان يعرف بنفسه ويتكلم بلسان حاله يعني مفيش داعي يجيب أهله معاه غير لما يكبر.

ثانيا: إن مواقف العرض الأولي للعريس أحيانا بيكون فيها أسئله محرجة أو يمكن القبول ما يتمش

من أول جلسة فمفيش داعي لحضور الوالدين حتى نجنبهم أي إحراج ولو بطريق غير مباشر.

المهم ...أني قدام أمر واقع وقلت نمشيها وخلاص مش يمكن العريس قابل أهله بالصدفة في مدخل العمارة!!!...عديها يا صابرين ومتدأقيش على كل حاجة.... وبالفعل عديتها ودخلت وسلمت وقعدت)

- يااهلا بعروستنا الغالية.

- اهلا بيك يا طنط.

- إحنا والله يا ا. محمد جايين ع السيرة الحلوة...د. سامية شكرت فيكم كتير.

- الله يكرمك ...دة بس من زوقها وزوقك يا أ. عمر.

( كانت البداية كده...قعدة لطيفة هادية وكان كل الحوار بين 4 أطراف فقط وساعات بدخل أشارك معاهم كطرف خامس ...أما العريس فتهيألي أنه أخرس...وفضلت أترقب منه أي مشاركة أو مداخلة لكن في توقع كان بيخيب ظني وفجأة... رن الموبايل بتاعه واستنتجت لوحدي ... إنه طالما معاه موبايل إذن فهو ليس بالأخرس ولا بالأطرش).

- ألو ...أهلا أهلا... لا يا أيمن عندي معاد مع دكتور الرسالة بتاعتي ..مش هقدر أقابلك بكرة... خلاص خليها بعد بكره ... وهو كذلك ممكن نراجع الشغل مع بعض ....لالالا هتلاقيني موجود...مع السلامة.

(مش عارفة لية وقتها افتكرت أغنية عمرو دياب واللي كان ممكن تكون موسيقى تصويريه للحدث ومطلعها " خلاص بأة بيتكلم،.يرحم زمن السكوت، كبر أوام واتعلم،وخلاص طلع له صووووت " ... المهم إنه رجع للسكوت من تاني)

- والله يا مدام حال البلد بأة مزري ...تصوري إزازة الزيت بتزيد بـ 3 جنية وشوية...وكمان الصابون، حتى اللبن اللي مالهوش علاقة لا بدولار ولا استيراد وتصدير هوه كمان غلي.

(كانت دي أمي الحبيبة بتتناقش مع والدة العريس وضع البلد... وردت عليها والدة العريس وهية بتمد ايدها على طبقين للجاتوه والساليزوه اللي جبتهم...واستغربت بتاخد الطبقين ليه!!! فكان تصرفها بعدين رد لسؤالي... قدمت واحد لابنها والتاني خلته في ايدها .. وجوزها من كسفته مد إيده على طبقه لوحده...وهو بيوجه الكلام لوالدي العزيز وقال)

- هو حضرتك مالكش غير صابرين واختها الدكتورة بس؟؟

- لا، الحمد لله عندي سارة الدكتورة، ومصطفى بيحضر ماجستير في الهندسة من كندا وأصغرهم صابرين.

- ربنا يبارك ويخلي...وياترى بتدرسي اية يا صابرين ؟؟

(بدرس!!! محدش قاله أنى متخرجة من سنتين!!! )

- أنا متخرجة يا عمو من كلية إعلام من سنتين تقريبا.

- ماشاء الله ...وبتشتغلي على كده؟

(كانت دي والدة العريس)

- الحمد لله بشتغل في جرنان.

(هاموت وأعرف العريس مش بينطق ليه لغاية دلوقت... كل اللي عرفته عنه إنه اسمه محمد وأكبر إخواته ودكتور أطفال..يعني المفروض يكون نغش كده ويعرف يسايس العيال وياخد ويدي معاهم .. يمكن لانه شايفني كبيرة فمش عارف يكلمني ازاي!!- الله أعلم- أهي قاعدة والسلام وقمت أجيب طبق الفاكهه وقدمته ورصينا أنا وأمي الفاكهه فيه وقدمنا لكل واحد طبقه... فوجئت إن والدة العريس بتأشر البرتقان للدكتور محمد وبتحطه في طبقه ومش كده وبس إذا الدكتور كسل يمد إيده في بقه فكانت والدته بتتطوع وتحط فص البرتقان في بقه.. .للمرة التانية افتكرت مشهد في مسرحية وجه نظر للفنان محمد صبحي لما كان غني وقامت الشغالة بتأكله في بقه وهي بتقول: القطر رايح فين؟؟.ويرد عليها: جوووووه ...يالا افتح المحطة ويرجع يرد ...بسرررعة هم يا جمل، بصيت لأمي بعد المشهد ده لقيت العرق التركي بدا بالامتعاض فالإنكار وتحول لجملة واحدة )

- ماتسيبيه ياكل بإيده يا مدام!!!

- أبدا دة حمادة حبيبي ...تصدقي يا أم مصطفى ما بيعرفش ياكل غير من إيدي!!

( رديت أنا وأمي في نفس واحد... زي الكورال بالضبط)

- والله!!!

- طب ده حتى لو مأكلتهوش مايكلش خالص.

(الكورال مرة تانية)

- يا سبحان الله!!

- أمال لما يتجوز يا مدام هتعملي إية؟؟

- هأكلهم همه الاتنين.

(يا سم كده!!! مكنش ناقص غير اني ااقول للعريس :"إنكغ إنكغ إنكغ ننوس عين أمه يا ناس"... مهو احنا لسنا بناكل من إيد ماما لغاية دلوقت!!! ...القاعدة بانت خلاص وكملناها عادي وانا عاصرة على نفسي شجرة لمون بحالها وبعد ما مشيوا مكنش في داعي ان حد من أهلي يسألني عن رأيي ..أظن الرد كان واضحاً).