ندالة امتحانات

بين الدحيحة والاندال ينقسم الطلبة أثناء الامتحانات..الدحيحه و هي الفئة المغمورة طوال العام تصبح الأكثر شهرة في فترة الامتحانات .

أما الفئة الأخرى فهم الباحثين عن الدحيحه في أيام الامتحانات بعد غياب عن متابعة الدراسة طووول السنة.

فإلي أي فئة تنتمي و ما طبيعة علاقاتك بأصدقائك أثناء الامتحانات و ما هي تجربتك مع الفئة الأخرى.

شايف مصلحته

(زينب) كلية دار العلوم تقول: "الواحد شاف نماذج كثيرة من صداقة المصلحة خاصة فترة الامتحانات فقبل وقت قصير من الامتحانات تبدأ تظهر بعض الوجوه و تبدأ معها الأسئلة علي الامتحانات و بعد كده الواحد ما بيشفش وشهم ثاني و طبعا ده يضايقني و يجعلني بعد كده أتعامل معهم بحدود فيعتمدوا علي أنفسهم شوية ففي ناس بتشرب كوبية الشاي كده و تقرا الملزمة طياري بدون بذل جهد فيها.

أما (طارق علي) تجارة القاهرة فيؤكد: "أنا معايا في اللجنة أصحاب من سنة أولي و إحنا أصحاب علي طول و مع بعض في حاجات كثيرة و في المحاضرات و علاقتنا أيام الامتحانات زي باقي أيام العام و أكيد في ناس الواحد بيعرفهم في الامتحانات أكثر من الأيام العادية بحكم إن الواحد يحتاج يعرف حاجات منهم عن الدراسة.

كله بيبان

مريم لطفي كلية اقتصاد و علوم سياسية تقول: "أيام الامتحانات أنا بشعر إنها معيار للواحد عشان يعرف الناس أكثر فالواحد بيعرف الناس بتوع مصلحتهم و الناس اللي أصحابه بجد..محمد فضل كلية دار العلوم يوافق مريم الرأي..فيقول:" نعم طبعا في بعض الأشخاص الواحد بيقرب منهم أكثر أيام الامتحانات ذي اللي بيحضروا و ويتبعوا المنهج و بعد الامتحان المعرفة بتقل شوية أو تنتهي أو تبقي في الطبيعي اللي هو إزيك.. إزيك لكن في الامتحانات بنقرب مع بعض اقوي.

صاحب صاحبه

فيه ناس تانية الصداقة عندها أهم من أي شئ كما يقول احمد العزازي –دار العلوم-

الصداقة تظل كما هي في أي وقت و لو غير كده تبقي مصلحة شخصية.. وعشان كده مابحبش أتعامل مع النوع الأخير ويبقي كلامي معاهم في أضيق الحدود.

لكن فاطمة موسي كلية الآداب تري أن هناك تغير في العلاقة يحدث بين الأصدقاء فتقول: " طبعا علاقتي بأصحابي أيام الامتحانات بتتأثر..مثلاً قبل الامتحانات بأبعد عنهم و اقفل علي نفسي علشان المذاكرة فينغلق علي نفسي أكثر.

تختلف دعاء عزت-اقتصاد و علوم سياسية في الرأي مع فاطمة فتؤكد: "هي العلاقة زي ما هي و بنشرح لبعض و لكن الفرق أن الواحد مش بيشوف حد كتير لكن فعلا في عناصر بتظهر للواحد و تدعي إنها "ضايعة في المذاكرة" و تبقي علي اتصال أوي معاكي و في الأخر بتلاقيها ناجحة و كويسة.

خليك مع زمايلك

هذا ما تقوم به دعاء من كلية اقتصاد وعلوم سياسية..حيث تقترب أكثر من أصدقائها " الأنتيم" وتتأثر علاقتها مع باقي الزملاء حيث تقول: "إحنا كأصحاب مع بعض في الكلية بنبقي مع بعض كثير و بنساعد بعض لما يكون واحد فينا محتاج حاجه يفهمها لكن طبعا أصحابنا اللي مش معانا في نفس الكلية بتتأثر علاقتنا بيهم أثناء الامتحانات فبنقطع مع بعض و كل واحد مع أصحابه في الكلية بتاعته أكثر.

وهو ما تؤكده إيمان عبد الرحمن كلية التربية فتقول: "عادي أنا و أصحابي مع بعض علي طوال أيام الدراسة و أيام الامتحانات بل بالعكس أيام الامتحانات بنشجع بعض علي المذاكرة و بنسهر مع بعض لكن ما بنعرفش ناس علشان المصلحة فعلاقتنا بتبقي علاقة تعاون طول العام.

يا تري أنته مين في دول..؟!صاحب صاحبك فعلاً.. ولا بتاع مصلحتك بتعرف الناس في الوقت اللي انته محتاجة فيهم وبعد كده بتقلب..؟!

اقرأ أيضا :

اللي ذاكر ذاكر

حتي المذاكرة بمزااااج..!!