اليد البطالة.. نجسة!

"مستني جواب القوى العاملة" جملة قديمة قوي.. كنا بنسمعها زمان في الأفلام العربي.. ومعنى الجملة باختصار، إن الشخص ده منتظر شغل الحكومة..

اندثرت هذه الجملة الآن.. بل إن كثير منا لا يعلمون أصلا يعني إيه قوة عاملة..و تبعت لي جواب بتاع إيه!!

ما نسمعه الآن فعندما تسأل " وأنت بتشتغل؟؟" يرد عليك بابتسامة على وجهه وبهدوء شديد...و يقولك أنا مستني اشتغل شغل حلو...حلو قوي.. أعلي معاه...وأطلع فوق فوق فوق..... - وكأنه شايف رؤية- !!!

صح النوم؟؟

خير اللهم أجعله خير ...وإحنا موافقين..بس السؤال دلوقتي ليه ما يشتغلش أي حاجه مؤقتا.. و بعدين لما الرؤية تتحقق..يبقى يا دار ما دخلك شر؟؟

إيه رأيك الموضوع ده تعالي اسمع وشوف نماذج حلوه لشباب كافح وتعب في بلده وبرضه مستني الشغل الحلو ....

بائع " شاطر ومشطور وبينهما مثلج"!

محمد خميس- طالب بكلية التربية قسم اللغة العربية جامعة طنطا..يقول محمد: "أعمل طوال فترة الصيف علي "تريسكل" للآيس كريم ففي البداية رفض أهلي هذا العمل وقالو لي انه ليس من مقامك، ولكن أقنعتهم.. فأهلي علي قد حالهم ولازم أعمل علشان أوفر مصاريفي الشخصية وأمام إصراري وافقوا.

العجيب إنهم شجعوني بعد ذلك وراحوا يأكدوا علي انه بعد تخرجي سيوفقني الله عز وجل بعمل يكون مناسب لي ولتخصصي ويقول محمد انه استفاد كثيرا من عمله هذا فهو علي حد كلامه قابل نماذج كثيرة من الناس وبالطبع ده جعله يكون عنده خبرة كافية فهو الآن ينظر للحياة بشكل مختلف لم يعد ذلك الشاب الذي يفكر في الأمور بسطحية وينظر أن يأتي إليه كنز من السماء يحل له كل مشاكله وانما اصبح رجلا يتحمل المسئولية .

وفي نهاية حديثه تمني محمد أن يري نفسه في المستقبل مدرسا للغة العربية فهو عاشق لهذه اللغة ويتمني لو يعلمها للأجيال القادمة.

في الإعدادي..!!

أما محمد عبد الرحمن فهو لازال طالب في الاعداديه ويعمل بائع متجول للبلالين ولعب الأطفال فيقول اعمل منذ 3 سنوات في هذا العمل وذلك في فترة الصيف فقط حتى أستطيع أن أتابع دراستي، واكسب من عملي مكسب لا بأس به أستطيع من خلاله أن اصرف علي نفسي.

وأنا لي ثلاثة أخوه كل واحد فينا بيشتغل فأهلي ناس فقراء يادوب بيكسبوا قوت يومهم وعن الذي استفادة من شغله يقول طبعا الشغل علمني حاجات كتير منها اعتمادي علي نفسي أني لازم اكسب علشان اعرف أعيش.

ربك بيفرجها

منذ صغري وأنا أحلامي بسيطة هكذا بدأ أحمد مجدي حديثه حيث قال أنا طالب في كلية الحقوق عندي 20 سنه أعمل بائعا للشاي علي شاطيء الإسكندرية وذلك خلال فترة الصيف.

ويقول أنا طول عمري بحلم أدخل كلية الحقوق.. نفسي أكون محامي أدافع عن حقوق الناس، واستطعت أن احقق حلمي ودخلت الكلية لكن مع الكلية زادت مصروفاتي فكان لازم اشتغل وطبعا ما كنش فيه اختيار فقررت اعمل في أي مهنه مؤقتا لحد ما ربنا يفرجها.

وطقت في دماغي حكاية الشاي دية ورحت علي كافتيريا كنت اعرفها من زمان.. وطلبت من صاحبها إني اعمل لديه بالكافتيريا.. فوافق واشتغلت..وبصراحة المكسب مش وحش وبيكفي مصاريفي..وساعات كتير بساعد والدتي في مصروفات أخواتي، وبصٌبر نفسي علي الشغل ده وبفتكر دايما قول الله عز وجل في كتابه الكريم" ولسوف يعطيك ربك فترضي".

الحياة صعبة قوي

الكلام ده علي لسان أيهاب الشلقاني 23 سنه بكالوريوس خدمة اجتماعية ويعمل في محل للأدوات الكهربائيه ويقول إيهاب ما كنتش فاكر أن الحياة صعبة قوي كده!!! أنا كنت فاكر إني أول ما هتخرج هاعمل في المجال المناسب لدراستي ولكني ظللت ابحث عن هذا العمل طيلة عامين بلا جدوى!!

لم يكن أمامي سوى أن أعمل في هذا المحل فهو الوحيد المتوفر لدي فاشتغلت لأني بصراحة نفسي أكون نفسي وأتجوز ، نفسي في حاجات كتيرة.. صحيح أنا وصلت للثلاثين.. لكن حاسس إني معملتش حاجه ماحققتش حاجه..

لكن ارجع وأقول أنا أحسن من غيري علي الأقل أنا بأشتغل.. بدل الجلوس علي القهاوي.. ويختتم حديثه بقوله أنا لازلت ابحث عن العمل المناسب فأنا نفسي اعمل في مجال تخصصي لكن نقول إيه ما باليد حيله.

بنت بستين " بنت"..علشان محدش يزعل!

ونترك العمل الرجالي ونأتي للعمل النسائي فعندنا نهي رحيم 19 سنه كلية آداب تعمل بائعة في محل للمفروشات فتقول : في البداية كنت أخاف العمل وما اكدبش عليك كنت اخجل منه فأنا متعلمة... أزاي اشتغل في عمل كهذا لكن بعد فترة وجدت فتيات كتيره مثلي متعلمات يعملن في مهن مشابهة.

أنا الآن أحب العمل ولا أستطيع أن أتخيل نفسي جالسة في البيت بلا عمل فأنا الآن مسئوله عن نفسي وكل شيء محتاجه له بجيبه.

هتجوووووز..مش هيجوزوني!

أما علي إبراهيم 20 سنه كلية هندسة يقول: " أنا أتعلمت منذ صغري إني لازم اعتمد علي نفسي في كل حاجه وعندما كبرت ودخلت الجامعة قلت لازم اعمل قبل ما أتخرج علشان اقدر أكون نفسي وأنا عندي أحلام كتير وكان أول حلمي لي إني اعمل مشروع واستطعت أنا ومجموعه من الشباب أقاربي عمل مشروع نت كافيه والحمد لله المشروع كويس.. المكسب بيتوزع علينا بالتساوي ..وبكره اقدر اخطب وأتجوز من غير مشاكل.. مش احسن ما استني بعد ما أتخرج والله اعلم اشتغل ولا لا.

التاكسي و فوايده

ونأتي ليوسف عزت طالب في معهد الخدمة الاجتماعية..استطاع يوسف العمل كسائق تاكسي..فيقول: استفدت كثيرا من عملي كسائق تاكسي وهو مشروع مربح ولا أنكر إني أفكر حاليا في الاستمرار كسائق تاكسي حتى بعد تخرجي والتحاقي بأي وظيفة ، فهي تجريه مفيدة من جميع النواحي .

وفي النهاية...هتعمل ايه بعد ما شفت احمد ومحمد و إيهاب وعزت و نهى....هتقعد في البيت حاطط أيدك علي خدك..؟؟ طب ما تجرب تعمل زي ما الشباب دول عملوا... هتخسر ايه صدقني مش هاتخسر حاجه اكتر من كونك شخص ما بيعملش حاجه والأيد البطالة ايه ...؟؟

شغل فلوسك في البروصة!!