يا فاطر رمضان..!!
في الأحياء الشعبية والأرياف شيء عادى جدا أن تجد في نهار رمضان مجموعة من الأطفال يهرولون خلف طفل أخر ويرددون بكل قوة في كورال جماعي (يا فاطر رمضان يا خاسر دينك كلبتنا السعرانة هتأطع مصارينك)..
وطبعا بتكون زفة عجب.. بطلها الرئيسي هذا الطفل الوحيد الذى تجرأ وأكل في نهار رمضان!
تذكرت هذا المشهد وتذكرت أيضا كلام والدتي التي كانت تحذرني دائما من عدم الصيام وتحاول أن تمنعني من الأكل بحجة أن رمضان (هايبطحني) لو خرجت في الشارع.
فضيحة بجلاجل
لذلك قررت "عشرينات" أن تعمل فضيحة بجلاجل للسادة المفطرين في رمضان، ولكن للأسف المرة دي مش عيال صغيرة بتلعب في الشارع لكن رجال كبيرة وبشنبات!
الحكاية ستجدها خلف أحد الأبواب المواربة لمجموعة من المقاهي الشهيرة بمصر والتي يختفي داخلها مجموعة من الرجال أو الشباب من عشاق الشيشة والذي منه.. في نوع من الإهانة المتعمدة لحرمة هذا الشهر الكريم.
ولا عجب وأنت تسير بجوار أحد المقاهي أن تسمع صوت الضحكات والقفشات الوقحة دون أدنى خجل.. بل إن بعض هذه المقاهي بعد أن كانت تقوم بإغلاق الأبواب أو تتركها نصف مفتوحة، ولكن لأنه من الواضح أن السادة المفطرين مش وش كسوف أصبحت هذه المقاهى تترك الدنيا مفتوحة على البحري.
وش كسوف
والسادة أصحاب العيون البجحه بيفطروا رمضان علشان خاطر سيجارة وطبعا مفيش مانع من سندوتش وحاجة ساقعة.
المهم أن المقاهي أصبحت كثيرة جدا ويكفي أن تسير فى ميدان رمسيس لتشاهد على الطبيعة داخل (الغرز) أوالمقاهى الصغيرة كم المفطرين، وكأنك مثلا فى بلاد ليس بها مسلمين.
ولعل أشهر المقاهي التي تستضيف السادة المفطرين مقهى (زهرة البستان) بمنطقة وسط البلد أو كما يطلقون عليها مقهى المثقفين.
ومقهى زهرة البستان يعتبر من الأماكن التي صممت خصيصا لهذه المناسبة فهو موجود داخل أحد الشوارع الضيقة ومختفي بعيداً عن أعين السادة المتطفلين.
أيضا هناك مقهى أخر بمنطقة وسط البلد وهو اسم على مسمى after 8 (افطر) وهو معروف بأنه المقهى الخاص للسادة أتباع الكرملين .
ادينى سيجارة يا عبد الستار
وطبعا الأكل داخل هذا المقهى فى نهار رمضان حاجة سهلة جدا في ظل وجود "عم سعد الحرامى" صاحب أشهر عربية فول فى تاريخ النضال الشيوعى.
طبعاً لازم الكل يأكل فول علشان خاطر التضامن الحلزونى القاعدي مع فئات الشعب المختلفة.
(وليه لأ.. إيه المانع إنى أفطر فى رمضان وأنت مالك يأخى دي حرية شخصية) هذه هي العبارة التقليدية جدا التي رددها بكل بجاحة أحد الرفاق عندما تجرأت وسألته عن سبب إفطاره في شهر رمضان الكريم.
وعندما سألت أحد الأصدقاء الذي كان يتدرب بأحد الجرائد الحمراء التابعة للحزب الذي يجاور "مقهى افطر".. فاندهش، وأخذ يردد كالمجنون (ادينى سيجاره يا عبد الستار...هو التدخين بيفطر ولا إيه ..هاهاها!!
هناك مقهى أخر موجود بميدان الجيزة – مقهى السمر- حاجة كده على قد الناس من عامة الشعب من السائقين والشباب العاطلين..الكل ينظر إلي الشارع برهبة، خوفاً من مرور "واحد معرفة". ولذلك تجد الجميع ينظر في المنضدة الصدئة أو على خيط دخان السيجارة أو الشيشة ولا يجرؤ على النظر إلي الشارع.
خرجت بعد الموضوع ولا أعرف لماذا يفطر هؤلاء؟!! إحساس بالتميز مثلاً.. ولا فيه وجهة نظر ولا طفاسة والسلام.. ولا قلة إرادة أمام السيجارة وكوب الشاي أو فنجان القهوة.. ولا كل هذه الأسباب مجتمعة.. تعرف أنت لماذا يفطر الناس في رمضان؟! وهل هناك أماكن أخرى غير القهاوي.. سطوح المنزل مثلاً.. أو دورة المياه.. ممكن دورة المياه.. مكان مناسب للفعل والفاعل!!
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
فيها لطم .. أول مرة أشوف جنازة عليها القيمة..
سومة
لكن يعني ايه شيوعين كرملين ؟؟؟؟
أنا بيتهيألي والله أعلم من معلوماتي إن دي أسامي أماكن في روسيا ؟؟؟؟
ياريت تنوروني ، وإيه دخلها بمصر واللي بيفطروا ؟؟
ومفروض أي حد مش مسلم يراعي مشاعر المسلمين وياكل في بيته ، والعيب مش عليهم ، على اللي بيفتح مطاعم ويعمل أكل في النهار وللأسف حتى ممكن يكونوا الطباخين مسلمين
مادام مصر بلد إسلامية يبقى لازم كل اللي مش مسلمين يراعوا كدة وياكلوا في بيوتهم
وعلى رأيك هي فعلا فضيحة بجلاجل ، أنا مرة كنت في مول وشفت عيلة واخدة ترابيزة في ركن بعيد ومستخبين وبياكلوا ، طبعن خمنت إنهم ميكونوش مسلمين ، طيب لما انتو متدايقين أوي كدة لأن كل الناس بتبص لكم وبتبص لأكلكوت ماتاكلو في بيوتكم
ناس عيزة تتمنظر بقى تقول إيه
كلهم في الآخر نهايتهم مستشفى ونزلة معوية لأن ناس كتير كانت جعانة وبصت عليهم
ههههههههههههه
ربنا يشفيهم بجد على رأيك من (الهبل) :))
مرة تانية :) تسلم :)
رداً على سؤالك أعتقد أن السبب هو قلة الإرادة...
المقال حلو أوي وأسلوبه جذاب، وفكرته هايلة...ربنل يكرمك...
خدوا الايميل بتاعي وحطوه في قايمة المراسلات ما اعرفشي منين
مع اني لا شيوعي ولا عمري رحت هناك
مينيمام تشارج اربعين جنيه ليه
هو انا ابويا حرامي وباع القطاع العام
ولا واخد قرض من البنوك بدون ضمانات
ولا انا باشتغل منادي سيارات
ولا باشحت في الاشارات
المضحك انه جالي اول يوم في رمضان ايميل اعلان عن برنامج رمضان
وفي ذيل الاعلان وهو بالانجليزي طبعا
انه بمناسبة شهر رمضان لا نقدم الخمور الا للاجانب
طبعا اترميت على الارض من الضحك
خلاص يعني جت على دي ...
الموضوع فعلا محتاج وقفه
يعنى مثلا من باب الامر بالمعروف انا لازم اضرب الناس دى بالجزمه كده ولا ايه
نفسى اشوفك مره بتعلق على موضوع من غير مل تحكى عن نفسك وعن تارخ فخامتك المصون
عموما الموضوع ظاهره موجوده ومش لازم ينسكت عليه
يعنى فى ناس بتبقى واقفه ساعة صلاة الجمعه ومع ذلك مش بتصلى ربنا يستر علينا
وياريت لو عندك كلمة كويسة تقولها لو مافيش يبقى رمضان كريم
commanda_2008@yahoo.com
يا إما وائل يا إما مكسوفة
ولا نقول وائل مكسوفة احسن !!!!!!!
قلت ادخل اشوف
لم اجد غير اعلانات عن الاماكن اللي واحد مفطر يستطيع ان يروح هناك ويفطر براحته بس في نقطة ناقصة عايزين نعرف الاسعار أمال ايه علشان تكون الامور على بينة
وسلم لي على مدفع الافطار .
إن صاحب المقال أكيد مش كان قصده يعمل إعلانات على الأماكن الوحشة أعوذ بالله
هو نيته خير وبيقول كدة من باب التأكيد والوثائق بس وعشان كل الناس الي في مصر عارفة ، وأنا بنفسي كمان شفت ناس بتاكل في مول كبير مش في مطعم صغير ورا الباب
وكمان اللي عايز يفطر مش مستني اعلانات عشرينات عشان يفطر ، اللي مش بيخاف من ربنا بياكل في بيته حتى مش فارقة معاه
أرجو إنك متزعلش نفسك ومتكونش مضايق وربنا يسعدك
والموقع دا موقع كويس ومتدين ومش بيشجع الناس على الفطار ، مش أكتر من إنه بيبين السلبيات
وكل سنة وانتو طيبين