مسحراتي النصر
مسحراتي
مغنواتي
داير ليلاتي على حيلي قايم
أحكي الحكاوي
وأقول غناوي
وأفكر اللي ناسي ونايم
ماشي ومعايا
طبلة وعصاية
بتعيد ندايا .. "اصحى يا نايم"
اصحى يا نايم
اصحى يا نايم
قوم من جمودك .. صحّي العزايم
أيام كتيرة
مرت عسيرة
والناس ف حيرة عاتب ولايم
وأنا كنت شاهد
ع الواد " مجاهد "
بايت بيحرس .. والخصم نايم
قاعد بناره
بالع مراره
مستني تاره .. من السخايم
ويقول لي يابا
قول ع الربابة
النصر لايح ويا النسايم
ده دينّا باقي
لكل رائي
ومفيش طواقي تغلب عمايم
وف عشرة منّه
زمجر كإنه
وحش ف عرينه كان برضه صايم
ماهو ف المعاد ده
لاخد ولا ادّى
كبّر وعدّى
وعدوه نايم
ورجع لي باسم
والنصر راسم
على وشّه هالة .. والفرح دايم
من يومها حقّة
مع كل دقّة
من حقي أفرح وأقيم ولايم
دا لولاش عمايله
هو وزمايله
ما كنت يا ابني دلوقتي نايم
اصحى يا نايم
اصحى يا نايم