نبذة عن الحملة الخيخية للتبرع بالدم
البوست ده توضيح لفكرة الحملة الخيخية
علشان فيه اكتر من شخص بعتولي ايميلات
مش فاهمين قصة التبرع بالدم
الفكرة يا جماعة جت من انى قبل ما ادخل عالم التدوين
كنت باروح اتبرع بالدم فى كل مكان ممكن ان الواحد يتبرع فيه بالدم
اذا كانت مستشفيات او عربيات
او مركز التبرع بالدم التابع لهيئة المصل واللقاح
وبعد ما رحت مركز التبرع بالدم
استقريت على ان ده انسب مكان انى اتبرع فيه بالدم باستمرار
لأنه مكان نضيف جدا
ومابياخدوش دم كدة وخلاص
لاااااااااااااا
دول لازم يعملوا تحليل للهيموجلوبين
وبيدوا للمتبرع استمارة فيها اسئلة كتيرة ولازم يجاوب عليها
وعلى اساس اجاباته بيحددوا اذا كانوا يقبلوا تبرعه ولا لأ
لكن باقى المستشفيات والعربيات بياخدوا دم وخلاص
من غير اى تحاليل للهيموجلوبين ومن غير اى استمارات
هو اسمك وخلاص على كدة
وفى مرة من ذات المرات
رحت علشان اتبرع بالدم
بعد ما عملوا تحليل لنسبة الهيموجلوبين
لاقوه ضعيف
فرفضوا انى اتبرع
وقالولى تعالى كمان شهر
ولما رحتلهم كمان شهر
لاقوا ان لسة نسبة الهيموجلوبين ضعيفة
فقالولى تعالى كمان شهرين
وساعتها كنت خلاص دخلت عالم التدوين
فالفكرة جاتلى من انى مش عايزة اروح كمان شهرين
ويكون فيه احتمالية انهم مايلاقوش عندى دم
فقلت اعلن عن الفكرة على المدونة عندى
يمكن حد يحب يجى معايا ويشاركني اللحظة دى
على اساس لو مالقوش عندى انا دم
ممكن جدا يلاقوا عند اى حد من اللى متواجدين معايا
ساعتها حسبتها بطريقة انى رايحة ازور ناس ومعايا كيس فيه نوع فاكهة
وبتخيل ان الناس اللي انا
داخلة عندهم دول فتحوا كيس الفاكهة لاقوه فاضى
ساعتها بحس باحراج وبحس ان الناس دى جالهم حالة من الاحباط
فبالتالى كون انى اروح ومعايا اتنين تلاتة
لو انا معنديش دم يبقى ممكن جدا غيرى يكون عنده دم
ومن ساعتها والفكرة قائمة
وبقت كل اربع شهور
وكان اول تبرع بالدم كان فى شهر ابريل سنة 2008
وتانى تبرع بالدم كان شهر اغسطس 2008
وتالت تبرع بالدم كان نوفمبر 2008
ورابع تبرع بالدم كان مارس 2009
وخامس تبرع بالدم كان يوليو 2009
وان شاء الله سادس تبرع بالدم هيكون نوفمبر 2009
ومش انا اللى اطلقت على حملة التبرع بالدم
اسم الحملة الخيخية
ده كان واحد من المتحمسين للفكرة
كان ساعتها بعتلى ايميل بيشكرنى فيه على الخطوة دى
وعلى انى اول مدونة تدخل عالم التدوين
وتشجع باقى المدونين وتدعوهم لعمل خيرى
وفى وسط كلامه قال التعبير ده
الحملة الخيخية للتبرع بالدم
فعاجبنى المسمى واقتبسته منه
وبقيت بستخدمه دايما
فى الاعلان عن ميعاد التبرع بالدم
فكرة ان التبرع المرة دى يكون فى المنصورة
ده نوع من انواع توطيد اواصر الصداقة
بين مدونين القاهرة ومدونين المنصورة
لما تكون واحدة عزيزة عليا زى صبرنى يارب
تطلب منى انى اجى المنصورة
واخلى التبرع بالدم يكون عندهم هناك
لاقيت ان مافيهاش حاجة ابدا
بالعكس شايفاها خطوة كويسة
خصوصا ان لما التبرع بيكون فى القاهرة
بلاقى ناس من محافظات تانية جايين يشاركونا اللحظة دى
طب يبقى فيها ايه
ان احنا نروح للناس زى ماهما بيجولنا
عارفة ان فيه ناس هاتزعل منى
ويقولولى واشمعنى المنصورة
ماحنا قولنالك تيجى اسكندرية
ومحافظات اخرى وانتى رفضتى
هارد عليهم واقولهم ياجماعة
انا كنت ومازلت متحمسة لفكرة التبرع بالدم
اكتر من اى عمل خيرى تاني
لسبب واحد
وهو ان التبرع بالدم لا يكلف المتبرع اى ماديات
يعنى الواحد بيعمل خير ببلاش كدة
لكن اى عمل خيرى تانى بيكلف الواحد ماديا
وانا عن نفسى مش دايما بيكون معايا فلوس
لكن فى نفس الوقت محتاجة حسنة تقربنى من الجنة
فبالتالى مابلاقيش احسن من التبرع بالدم
اللي ممكن يشفعلى عند ربنا يوم القيامة
ويمحو من سيئاتى وذنوبى او على الاقل يزود حسناتي
علشان كدة لما حد يدعونى
انى اسافر اى محافظة اخرى
للمشاركة فى عمل خيرى
انا بقيسها ماديا
تكاليف السفر هتكون اد ايه
لنفترض ان تكاليف السفر ومصاريفى الشخصية فى الرحلة
هتكلفنى خمسين جنيه مثلا
يبقى على الاقل لازم اتبرع قصاد مصاريفى دى بخمسين جنيه مماثلة
لكن مادفعش مواصلات واكل وشرب خمسين جنيه
واجى اتبرع بعشرة جنيه
ساعتها بحسبها انى قعادى فى البيت احسن
وماينفعش حد يقولى حتى لو مش هاتتبرعى تعالى وخلاص
دى حاجة انا مش بقتنع بيها
لان لو معايا فلوس لمواصلاتى واكلى وشربي فقط
ومش معايا فلوس اشارك فى العمل الخيري
يبقى الاحسن انى ماسافرش
واتبرع بالمبلغ اللى معايا لاى ملجا هنا فى القاهرة
فارجو ان محدش من باقى المحافظات يزعل منى
وعموما فكرة ان احنا نروح المنصورة علشان نتبرع بالدم
هى جت كدة
يعنى انا ماكونتش مرتبلها من زمان ولا حاجة
هى جت كدة فعلا
ولما لاقيت ان المشاركين الدائمين فى التبرع بالدم مرحبين بالفكرة
ولما عملت استطلاع رأي ولاقيت ان الاغلبية موافقين
قلت فى نفسى وايه المانع
اهوه تغيير جو
خصوصا انى بجد محتاجة أغير جو واشوف مناظر جديدة
الفكرة بقى ان انا سمعت كلام كدة
ان يوم المنصورة هايكون فيه تلفزيون وصحافة واذاعة وحركات كدة
ودى حاجة مش مريحاني نفسيا
انا مابحبش الكلام ده
وحابة اكتر ان فكرة التبرع بالدم تفضل بينا وبين بعض
لكن شغل البروبجندا ده مابحبهوش
من الاخر كدة ياريت وسائل الاعلام تبعد عننا
وارجوكم
دعونا نعمل فى صمت
علشان ربنا يباركلنا فى اللى بنعمله
اخر حاجة عايزة اقولها فى الموضوع ده
انى بوصيكم ان حملة التبرع بالدم تفضل قائمة
يعنى حتى فى حالة وفاتي
مش عايزاكم تكسلوا او تطنشوا الموضوع ده
عايزاكم دايما تتجمعوا فى المواعيد دى
اول جمعة من شهر مارس
اول جمعة من شهر يوليو
اول جمعة من شهر نوفمبر
تتجمعوا الساعة 10 صباحا
قدام هيئة المصل واللقاح
وتروحوا تتبرعوا بدمكم
ولما شريف يكبر
ابقوا خدوه معاكم
اظن انا كدة وضحت كل شئ متعلق بفكرة التبرع بالدم
مش عايزة بقى حد يبعتلى ايميلات تانى
او يسيبلى تعليقات
ويسألني عن اى حاجة تخص الموضوع ده