مذكرات بنوتة مفروسة -2
كنت غرقانة في سابع نومة بعد يوم مرهق في الشغل ...صحيت على صوت أمي العزيزة.
- انت لسة نايمة!!! الراجل قرب يجي.
- راجل مين؟
- راجل مين؟ العريس ياصابرين قومي بأه.
( رميت لحافي على جنب وأنا أتمتم بكلمات الامتعاض بصوت خافت خوفا من ان تسمعني أمي وانكد عليها في يوم زي دة)
- هتلبسي إيه؟
- العباية البيج بالايشارب بتاعها.
- عباية إيه !!! لا البسي التايير الفسدقي ...بلاش العباية بدل ما يفكرك معقدة وإرهابية!
- طيب بلاش.
- أبوكي جاب جاتوه وطبق حلويات شرقية... هنقدم معاهم الحاجة الساقعة والشاي بس؟؟؟
- بس إيه!!! ما تدخليه المطبخ معانا أحسن...هوه مش هيقعد ساعتين ويمشي؟ ولا ناوي يتعشى!!
- وماله يا بنتي ؟!
- ماله إيه؟!... استغفر الله العظيم ...هروح ألبس.
(بعد ساعة تقريبا رن جرس الباب وفتح له أبويا العزيز ووقفت من موقعي أترقب شكله شهقت شهقة كان قلبي هيقف فيها... إيه اللي لابسة ده)
قعد العريس مع أهلي يجي نص ساعة ودخلت وسلمت شفويا وقعدت وتفضل والدي بتقديم العريس
- ده مصطفى مغاوري مهندس في شركة .. وابن حلال وطيب بيواظب ع الصلاة معايا.
- أهلا وسهلا
(وطالت لحظة الصمت وسيادة العريس كما أبو الهول الرد على قد السؤال و كنت بتأمل لبسه كان لابس بنطلون كحلي وبلوفر مشجر بألوان زاهية والقميص كان كاروهات...طبعا الشكل العام للعريس كأن أقرب للوحة من الفن التشكيلي لفنان مبتدئ..)
وسأله والدي عن مرتبه فقال وكله فخر ونشوة:
- أنا يا عمي باخد 500 جنية بحالهم.
(بلعت ريقي من الدهشة لأني لما فكرت فيها لقيت أن لأهله نسبة من المرتب غير إيجار الشقة دة إذا كان معندهوش فما بالكم بمصاريف الحياة اليومية!!!)
- وعندك شقة على كده؟
( سؤال طرحته أمي ...وكان بودي أحط ايدي على بؤها ....شقة اية يا غالية بيقولك بيقبض 500 يادوب تجيب له شقة بطيخ)
- بصراحة لأ مجبتش ، بس محوش مبلغ أدفع بيه مقدم لشقق الإيجار الجديد.
- مش مهم يا ابني ... احنا بنشتري راجل.
( راجل !!! وأنا عاوزة أشتري استقرار، قلت لما أسأل أنا بأة لان الوضع مقلق حتى الآن)
- بتقضي يومك إزاي؟
- والله انا من الساعة 8 لغاية 4 ...قولي كده بوصل البيت 5 يادوب أتغدى وأنام وأصحى أشرب كباية الشاي مع الحاجة .وأنزل أشربها تاني مع أصحابي ع القهوة.
(قهوة!!! هو بيتفضل في المرتب حاجة عشان تصرفه ع القهاوي!!!)
- على كده مفيش أي موهبة أو رياضة بتمارسها؟
- هاهاهاهاها لا طبعا معنديش وقت.
- طيب إيه طموحك في الحياة؟
(رد ببلاهة) :
- هه!! يعني القناعة كنز.... بصراحة وأنا راضي بحالي كده.
( حطيت لساني في بؤي وسكت وفتح أهلي كذا موضوع عام كشف عن مدى سطحية التفكير أقصد القشور الباقية من التفكير وعدت الساعتين تقال على قلبي....يا ربي واحد مرتبه يا دوب ع الأد . ومالوش طموح ولا حتى حلم وما يعرفش الدنيا ماشية إزاي وله نفس يخطب ويتجوز!!! وعجبي...قام العريس وروح)
الصدمة ماكنتش في العريس بصراحة... الصدمة كان في سؤال أهلي عن رأيي!!!
وكان الحوار ساخناُ و محتداً والحق يتقال كان واضح إنهم مش مقتنعين بالمرة بالعريس لكنهم في الأول والآخر أهل وبلتمس لهم العذر في إنهم نفسهم يفرحوا بيا... لكن الفرح بالعقل يا ناس).
( انتظر الجزء التالي)
تعليقات القرّاء
تعليقات القرّاء كما حفظها أرشيف الإنترنت. في التعليقات الأقدم لم يحفظ الموقع اسم الكاتب ولا وقت الكتابة: العنوان هو ما كتبه القارئ، والتاريخ هو أول لقطة ظهر فيها التعليق.
في انتظار المزيد
اتقوا الله بقى واقنعوا. غيره مش لاقي ربعهم.
وحبر نتمنى ألا ينضب ..
ننتظر المزيد لكن مختلف عن الجزئين فتقريبا الجزء الثاني متماشيا في الخط مع الجزء الاول - ناس عايزين يجوزوا بنتهم وهناك عريس غير مناسب ...لم يختلف الجزء الثاني كثيرا عن الجزء الاول سوى إظهار والتركيز على عيوب العريس
أتمنى أن يكون الجزء الثالث مختلف .
وعندي ايضا احساس ان القصه حقيقه وكتبت باسلوب ساخر.
عموما القصه جميله جدا وننتظر المزيد
الأسلوب جذاب و يخترق إلى القلب مباشرة ..
و بصراحة شديدة هذا الموضوع و بعض الموضوعات الأخرى ( القليلة ) فى هذا الموقع كالورود النابتة فى الصحراء القاحلة !!!!
واصلى رغداء و جددى نيتك ... جعله الله فى ميزان حسناتك ..
على فكرة انا اول من قراء هذة القصة ولكنى تاخرت فى التعليق
فانا نمت وانا بقرأها من شدة جمالهاحيث زكرتنى بقصص جدتى
ولسة صاحى حالا هوا انهردة كام فى الشهر؟
بس الى فكرة انى نايم و مفيش ولا تعليق على الرسالةعموما انتظر باقى كتاباتك
بس ربا يستر ومنمش تانى الى القاء
على العموم لسه لما نشوف الباقي والسلام ختام
محرر صفحة الشباب بأحد المواقع الإسلامية
إخواني واخواتي ...في البداية أود ان اعرفكم بنفسي"رغداء بندق" محررة باحد المواقع و بموقع عشرينات وأقوم بدور صابرين بطلة "مذكرات بنوته مفروسة".
في الحقيقة سعدت كثيرا بتعليقاتكم وسعدت أكثر بتواصلي مع البعض منكم ووجدتها فرصة جيدة أن أوجه لكم الشكر الجزيل وأن أوضح وجه نظري بالمرة.
أنا ليس لي اعتراض على الـ500 جنية إياهم وعارفة كويس إن أقل من المبلغ ده بيعيش عيلة كاملة، لكن الفكرة مش في المبلغ ولا الاعتراض كان ع المرتب بس ( والغريب ان الاعتراض على الفلوس كان من الشباب بس وكاني بشاور على كل واحد فيهم وبقوله انت ده) لكن القصة لو راجعتوها شوية هتلاقي الاعتراض كان على اللبس وعلى انعدام الطموح أو الهدف في العريس وآخر حاجة كانت الفلوس. ...يعني صابرين(البطله) مظلمتش الراجل.
أما عن أهدافي لعرض مسلسل مذكرات بنوتة مفروسة فكان لكذا سبب بصراحة:
1- إني أعيش الشباب تحديدا في مشاكلنا.
2- اني انقل اللي بيحصل في البيوت لما بيجي عريس لصفحات الويب.
3- يمكن عرضي دة يكون فيه سبب او مبرر للسؤال التقليدي (فلانة ما اتخطبتش لية لغاية دلوقت؟).
4- وهو اهم سبب بالنسبة لي...اني نفسي اسمع من شاب لية هوه كمان بيرفض فلانة ويطلع القطط الفاطسة في علانة!!!...فقلت يمكن بالحواديت دي استفزززز حد فيهم بل وانتهز الفرصة وادعو الشباب لطرح مذاكرته ويعرض الواقع بحياد يمكن القصص دي تلفت نظر الشباب لنقطة مش واخد باله منها أو ممكن تؤثر فيه تأثير ايجابي أوأو أو...وكمان العكس صحيح بالطبع.
أكرر شكري العميق لكل من شارك بتعليقه على المذكرات وانتظروني في الحلقات القادمة.
رغداء بندق
طالما هو واد طيب و ابن حلال و بخصوص المرتب و الحاجات دى كلها بتيجى بعدين او ماتجيش مش مهم و على رأى المثل " ضل راجل و لا ضل حيطه"
اما بخصوص ان اهلك عايزين يفرحو بيكى انا ماأظنش الموضوع موضوع فرحة
هما عايزين يخلصو و السلام اصل قعدت البت فى البيت وحشة و اهى جوازة و اقلب " و جوازة تفوت و لا حد يموت
اتجوزيه و اشربى وراه كوبيتين ميه ساقعة.
على فكرة يا رغد الموضوع جميل جداً
( كلهم قالو كده) و باين عليه طالع من القلب
و ربنا يستر بنتنا كلهم
قولى آمين
والله للأسف الشديد .. هذا الشاب الذى يتقاضى 500 يعتبر لقطه فى هذا الزمان .
الا اذا كنتى تبحثين عن واحد مرتشى أو حرامى او وارث على الجاهز .
وحتى لو فرضنا ان فيه شباب ناجح وبياخد مرتبات عاليه ، فمن غير المقبول أن يكون طموح الفتاة هو المادة وفقط ..
أعتقد أن هذاالمقال ييارك ما تفعله الفتيات من مبالغة فى الطلبات ، وعلى أى حال همه اللى خسرانين
خليكوا قاعدين معنسين كده
أما بخصوص انه غير متفتح ، وليس له طموح فأنا اتفق تماما معك بهذا الشأن
اما بخصوص الهوايات ، فالناس خلاص نسيت يعنى ايه هوايات ، وربنا يخليلنا الحكومة .. فيه ناس بقت هوايتها انها تقف فى طابور العيش ، او انه يقعد يحسب طول الشهر ازاى المرتب يقضى المصاريف ..
وشكرا
ناقشت الكاتبة مشكلة واقعية جدا ..
وهي اختلاف الآراء بين الفتاة وعائلتها في اختيار العريس ...
فهم يفكرون من منظور الستر والاطمئنان على البنت في ظل اي ظروف ((( معقولة ))
وكأنهم يحرمونها من الحق في أن تحلم ...
وتختار بحسب المستوى الذي تريده لها ولأطفالها في المستقبل ....
ولكن ... الحلم قد يقودنا الى طريق المالانهاية ...
فلنحكم العقل والمنطق ...
وليكون الواقع هو الأرضية الصلبة التي نقف عليها ...
لا التي نقع عليها بعد وقوف مطول على ارض الأحلام الهشة ...
كما تفضل الاخوة الراتب لا يمثل مشكلة .... لأن اي شاب في بداية حياته سيكون في مثل هذه الظروف ...
ولكن اشارك الكاتبة في اعتراضها على حالة الرضا بالواقع دون التفكير في الارتقاء بدافع الطموح الذي يقود اصحابه الى القمة ...
تحياتي العطرة للكاتبة المبدعة ....