الحيوانات.. مستنياك في أكتوبر!
خلاص كلها سنة ولا اتنين وحديقة الحيوان بالجيزة تنتقل إلى مدينة 6 أكتوبر وتحديدا الحي التاسع.. هكذا قررت وزارة الإسكان منذ أيام قليلة دون حساب لأى شئ بدءً من كون الحديقة آثر تاريخي أو أنها المكان الأكثر زيارة من قبل فقراء مصر ممن لا يجدون "الفلوس" الكثيرة اللازمة للذهاب لأى مكان آخر!.
لعلك تسأل الآن كغيرك "هينقلوها ليه؟"، والإجابة لكي تستفيد الدولة من مساحة الأرض المقامة عليها حاليا، وتقوم ببيعها بالمتر فى مزاد علني لعدد من المستثمرين العرب والأجانب، رغم ما قيل من قبل عن إسناد الحديقة لشركة سياحية تتولى تطويرها.
قالوا عن القرار:
- الدكتور زاهي حواس، أمين عام المجلس الأعلى للآثار، صرّح بأنه سيعرض على اللجنة الدائمة للآثار الإسلامية والقبطية في اجتماعها المقبل نتائج تقرير اللجنة الأثرية التي شكلها لمعاينة الحديقة ومدى تسجيلها أثريا، وأوضح أن اللجنة قامت بتفقد منشآت الحديقة والتي تضم عددا من المنشات والمباني والمعالم المميزة وأن اللجنة رأت تسجيل الجبلاية الملكية والكشك الياباني لقائمة الآثار الإسلامية والقبطية نظرا لتفردها المعماري والأثري والتاريخي، وأنه سيتم اتخاذ الإجراءات الخاصة بالتعاون مع هيئة المساحة والجهات المعنية لضمها للمجلس الأعلى للآثار.
عدلي راشد- عضو محلى الجيزة: "الموضوع مرفوض تماما لأن حديقة الحيوان ثروة قومية للبلد، وهى دلوقتى موجودة فى مكان حيوى الناس كلها بتعرف توصله، لكن لو اتنقلت 6 أكتوبر محدش هايروح، واللى بيروحوا الحديقة غلابة مش هيقدروا يدفعوا مواصلات أكتوبر خاصة لو كانوا أسرة كبيرة، وقد رفضنا فى المجلس المحلى هذا القرار بإعتبار أن الحديقة أحد المعالم الهامة فى محافظة الجيزة وتجعل من المحافظة مزارا لكثير من المواطنين من جميع أنحاء الجمهورية، كذلك تعتبر الحديقة آثرا هاما لمرور أكثر من 100 سنة على إنشائها".
فؤاد عماد، مهندس زراعي: "لو الجنينة اتنقلت 6 أكتوبر مفيش ناس كتير هتروح إلا اللي معاهم عربية زى أي ملاهي هناك، وبعدين النقل هيخليهم أكيد يرفعوا سعر تذكرة الدخول وده هيخلي الإقبال يقل أكتر، وأنا مش عارف هما عايزين ينقلوها ليه هى الجيزة ناقصة مباني؟".
محمد سامي، طالب بجامعة القاهرة: "بالنسبة لي هيبقى صعب أروح 6 أكتوبر علشان أقعد مع خطيبتى ساعة ولا اتنين، لأنى دلوقتى بروح الجنينة لأنها جنب الجامعة ورخيصة والقعدة جواها مبتكلفنيش كتير".
خالد صلاح الدين، محاسب: "أنا مش عارف الحكومة ناوية تبيع إيه تاني؟، من أيام قالوا أنهم بيفكروا ينقلوا المدافن التي تحيط بالقاهرة القديمة إلى محافظتي حلوان و6 أكتوبر، وتحويل مكانها إلى مساكن ومشروعات عقارية!, يبقى ناقص إيه تاني يبيعوه؟!".
معلومات عن حديقة الحيوان:
- أنشئت في عهد الخديوي إسماعيل عام 1891، وهى أول حديقة للحيوانات في أفريقيا والأكبر في مصر والشرق الأوسط.
- تبلغ مساحتها 80 فدان، ويزورها أكثر من 2 مليون زائر كل عام.
- يوجد بها ما يقرب من 6 آلاف حيوان من نحو 175 نوعا، إلى جانب النباتات التي من بينها أنواع نادرة.