سنايبر مش هايجيب كشاكيل (2)

أمس انتظرتهم عند السور.. والواد بازوكة بنطلونه اتقطع وكان خايف من أبوه أوي.. أصل عبعليم الناظر حط أزاز على السور عشان محدش ينط.. بس عادي عم منصور البواب محطش ازاز على السور كله..

أنا النهاردة في المدرسة وقعدت جنب نشأت أنتخة.. الواد ده بيجيب معاه شوية سندويتشات جامدة جدا.. أصل أبوه صاحب سوبر ماركت مكة اللي جنب محل العصير.. اللي عند موقف الموكروباص.. وفيه هناك ملعب كورة بس جامد آخر حاجة.

نشأت أنتخة بيشتغل مع أبوه في المحل طول الليل.. وبالنهار بيجي ينام وياكل في المدرسة وطبعا بياخد دروس في كل المواد بس هو جدع أوي وبيدي ورق الدروس للي عايز..

إمبارح اتفقنا لما اتقابلنا على إن المقالب في المدرسين لازم تتنوع وتختلف عن كل يوم عشان ما تكونش متكررة وإن ما يتكررش مقلب واحد أكتر من مرة كل اسبوع وإن التزويغ يكون بجدول محدد عشان ميحصلش لخبطة.. كفاية اللخبطة اللي عملوها في المدارس..

وعايزين نظبط حصة الالعاب كلنا عشان نكون موجودين.. أمال هنلعب كورة إزاي يعني ونغلب إزاي.. المهم نفس الإسطوانات المشروخة اللي سمعوها صحابي إمبارح أنا سمعتها انهاردة ونفس عدد الكشاكيل بتاع كل سنة.. بس أنا اتفقت مع علي الرفيع إمبارح إننا نقسم الكشاكيل علينا يعني هو يجيب نص الكشاكيل وأنا أجيب نصهم وكل واحد فينا يسيبهم في الدرج ويكون مع كل واحد فينا مفتاح أهو توفير عشان السايبر والبلاى استيشن.. أصل إحنا مصاريفنا كتير برضه.. وكل واحد فينا هيبقى موجود في يوم غير التاني.

دخلت علينا الفصل ست كده قالوا عليها مش عارف "زائغة صحية" تقريبا.. المهم قالت شوية تعليميات زي اللي بتتقال في التليفزيون.. مش ده المهم.. بس قالت حاجة جامدة موت إن اللى هايجيله دور برد لازم يبلغ.. قشطة اللى عايز أخلص منه من العيال الرخمة أبلغ عنه.. وأقول إنه بيعطس.

العيال الرخمة اللي في الفصل معانا كان معاهم مية بتاعتهم وشوية حاجات كدة لزوم البعد عن الميكروباتات..

اليوم قرب يخلص والنهاردة هانروح عند مدرسة البنات اللي جنبنا بس مش لاقي البت شيماء بس سألت عليها صباح قالت لي إنها جت إمبارح ومشيت بسرعة لان كان أخوها مستنيها.. ركبت وراه الفزبه.. واختفت وسط الزحمة

* اقرأ الحلقة الأولى: يوميات سنايبر في المدرسة