أبو الفتوح عطس.. الحقووونا (3)

الحصة الأولى كانت لأستاذ مجدي بلوتوث.. الراجل ده المفروض إنه بيدرس إنجليزي عنده 42 سنة.. قصير.. ولهجته صعيدي ع الآخر بس مش باين عليه.. بيقول إنه سافر أمريكا ورجع بعد ما البرجين وقعوا لأنه بيقول إن من وجهة نظره إن الكيان الأمريكي دمر.. إذن لا يوجد ما يستدعي وجوده في بلد كيانه مدمر.

الراجل دة منبهر بكل حاجة.. لو واحد جاب أي حاجة شكلها غريب.. حتى لو سندويتش لانشون بالزيتون يستغرب وكأنه جي من الفضاء.. باينه ولا راح أمريكا ولا حتى بلطيم..

المهم إنه بيجيب معاه شوية نغمات وحاجات جامدة كده وعلى طول حاطط السماعة في ودانه.. ويحسسك إنه منتظر السفير الأمريكي في بلاد واء الواء هايتصل بيه بس أول ما يجيب كارت شحن بعشرة..

هو على فكرة عامل لنا تسعيرة جامدة موت.. النغمة بجنيه رصيد.. والمقطع بثلاثة والصور باثنين.. بيقلب عيشه تمام في الحصة.. ويقعد يحكي حكاياته عن أمريكا وسندويتشات الهمبروجر الأمريكاني اللي غرقانة مايونيز وليزا اللي حبته وكانت عايزة تديله الجنسية واللى كانت بتوصفه بأنه فرعون.. وإنه محبهاش لأنها كانت حلوة اوي.. وإن من وجهة نظره إن الست الحلوة لا تدوم حلاوتها مع العمر، وإن يجب الارتباط دوما بامراة متوسطة الجمال.

حصته بتخلص على وصفة لسندويتش الهمبورجر والبطاطس السخنة، كأنه ظابط الحكاية ع الجرس.

الحصة التانية نطيت من ع السور كانت حصة أستاذ فؤش فوائد علوي.. لا لا مش قريب ليلى علوي ولا حتى كوبري علوي.. ده تشابه أسماء مش أكتر ده مدرس الفلسفة.. اللي ليه كلمة مأثورة بيبدأ بيها كل حصصه: "الفلسفة هى الإبحار في جوانب العقل ومن سيحضر لي سيصبح فيلسوفا في عصر لا يوجد به من يفكر.. ومن لا يحضر سيتحول إلى حمار".

في الغالب ما بيبقاش في الفصل دايما غير اتنين "روماني قلقاسة" اللى قاعد قدام و"راجح الرديفي".. والاتنين زى الفل هيشتغلوا كتبة في محكمة قريب الكشاكيل بتشتكي من اللي بيكتبوه.

ضربت سندويتش طعمية من عم سيد ورحت على مدرسة شوشو.. أنا عارف إنها موجودة النهاردة عشان عندها حصة ألعاب.. قعدت فوق السور واتفرجت عليها وهى كانت شيفاني بس زعلانة مني عشان امبارح بعتت لي "كلمني شكراً" ما ردتش عليها حاولت تتصل بي على رصيدي برضه ما ردتش.. أصلي أصلا معيش رصيد عشان أرن لها.. هي هاتزوغ الحصة اللي جاية وهنروح الجنينة اللي في الميدان اللي عند النافورة بنقعد نتكلم شوية وكده يعني.

شوشو أنا بحبها من تانية إعدادي وهي كمان.. أبوها عنده ورشة نجارة في الشارع اللي ورانا وأمها صاحبة أمي. أصل خالتها تعرف مرات خالي.. هانرجع بعد حصتين.. أنا معايا اتنين جنيه هاعزمها على عصير قصب بس ياريت ما تتنكش وتجيب عصير من أبو شفاطة دة بتنين جنيه إلا ربع.. لكن للأسف الهانم طلبت عصير من أبو شفاطة قال إيه ما بينقلش ميكروباطات..

الحصة دي قبل الأخيرة بتاعة عبعليم السكون التام.. س + ص = (س ص)2

حالة من الشرود التام لممدوح سنايبر وهو في حالة من التأمل في لمسة إيد حبيبته شيماء.. على صوت عطس مستمر من أبو الفتوح الجالس على اليمين إلى جوار حمدي من الجهة الشرقية للشباك المكسور..

وفي لحظات الفوضى والعطس المستمر من قبل أبو الفتوح والهياج والهرب من الفصل وتوقف عبعليم عن الشرح ونادى على الممرضة (أم عبير) التي تزن ما لا يقل عن نصف طن.. أتت أم عبير بعد فراغ صبر وشمرت ساقيها واستشعرت حرارة أبو الفتوح بيدها لعدم توافر ميزان للحرارة الترمومتر في عيادة التنميل الصحي.

أخرج الأستاذ عبعليم من جيب بدلته الصيفي ذات اللون الأزرق الباهت منديلا من القماش المحلاوي وجفف به عرقه ووضعه على منخاره الكبير الذي يملأ وجهه.. وتسائل من خلف المنديل

عبعليم: مالك يا أبوالفتوح

رد أبو الفتوح الذي يمتاز بجبنه وخوفه المستمر من أي شئ قائلاً بوجه شديد الاحمرار: أصل امبارح كنا عند جوز خالتي اللي رجع من العمرة ومن ساعتها وأنا حاسس إن عندي صداع ووجع هنا (مشيرا إلى منطقة الزور والحنجرة).

بادره عبعليم بقوله: لما أنت متنيل عيان.. إيه اللي نيلك وجابك

في هذه اللحظة تراجعت أم عبير بسرعة الصاروخ عن أبو الفتوح قائلة: ينيلك

بدأ جسد أبو الفتوح ينتفض ويقول بصوت نحيب أنه يشعر ببرودة.. وبدأت أنفه تسيل بالافرازات وأخذ يعطس ويسعل بدون توقف.. أخلى الناظر الفصل تماما عليه وظل كل منا يختلس النظر عليه من خلف الباب وهو ينتفض ويعطس.

تم استدعاء الطبيب من المديرية التعليمة من خلال اتصال من على موبايل الأستاذ عبعليم بسبب تعطل التليفون الأرضي للمدرسة بسبب عدم دفع الفاتورة.. شبكة واحدة بتعطلنا كلنا.. انتهى اليوم الدراسي وتوالت رنات شيماء على محمول ممدوح الذي تم احتجازه هو وباقي زملائه تبعا لأوامر الوزارة.. وبالرغم من أنها نبهت عليه ألا يفتح عليها الموبايل إلا أنه فعل فعلته وأغلقت معه الاتصال بانفعال شديد عليه دون أن تسمع شئ.

(يتبع)

اقرأ أيضاً:

- يوميات سنابر في المدرسة (1)

- سنايبر مش هايجيب كشاكيل (2)