عالأنفلونزا رايحين طلبة بالملايين
أنفلونزا خنازير .. يعني مفيش مرواح جامعة، ولا أقولك يا عم روح وخلاص وسيبها على الله.. لأ لأ مش رايح.. وبعدين بقى؟.. أروح ولا ما أروحش؟!.. أروح ولا ما أروحش؟!...
لو كنت طالب جامعي أكيد دار في دماغك الحوار ده، والسبب طبعا أنفلونزا الخنازير اللي من المتوقع أن تزيد خطورتها وانتشارها مع بدء الدراسة حيث أعداد الطلبة الكبيرة.. والحيرة أكيد أكبر لو كنت لسه "مستجد" في سنة أولى ومنتظر تدخل الجامعة على أحر من الجمر.. قولنا بقى حتعمل إيه؟!
- أحمد علي، طالب بكلية دار العلوم جامعة القاهرة: أكيد حاروح الجامعة، أنفلونزا خنازير إيه؟!، أنا سايبها على الله، ما هو كل الأكل بتاعنا كله مسرطن وكمان أكلنا لحمة الحمير وزي الفل، يعني مش شوية أنفلونزا هم اللي هيفرقوا معانا!.
- مني سالم، طب عين شمس: خايفة من أنفلونزا الخنازير والخطورة أنها بتتنقل بالتنفس، عشان كده هلبس الكمامة في المترو وأنا رايحة الجامعة، لأن صعب ما أروحش لأن الدراسة بتاعتنا صعبة جدا وعندنا سكاشن كتير، سمعت أن وزارة الصحة مشددة الإجراءات وأن حيبقي فيه حجر صحي ولو أني معتقدة أنه مع الأعداد الكبيرة صعب تطبيق أي إجراءات وقاية.
- دينا طه، ثانية إعلام القاهرة: أنا السنة اللي فاتت كان المحاضرات مكثفة في 3 أيام بس ولو السنة دي جدول المحاضرات كان كده برضه فده حيبقي شيء كويس وأكيد هيقلل من نسبة الإصابة بالمرض.
- محمد عبد العال، طالب بالفرقة الأولى آداب القاهرة: أنا لسه داخل الجامعة جديد وحموت وأعيش الحياة الجامعية بعد ما ربنا نجاني بالسلامة من محنة الثانوية العامة، بس لو المرض انتشر أكيد حقعد في البيت، والكليات الأدبية عامة ما فيهاش أزمة مع الغياب أوي وممكن نقضي السنة من منازلهم مش ناقصة أنفلونزا الخنازير.
- وليد السيد، آثار القاهرة: لا طبعا مش حاروح الجامعة ده المرض خطورته في الأعداد كبيرة، يعني أكيد أكيد حنتعدي لأنه صعب مع الأعداد ديه تنفع أي إجراءات وقاية، وزارة الصحة تقول اللي تقوله لكن الواقع أن مصر ما فيهاش غير مستشفيتين حميات بس.. يعني يا روح ما بعدك روح!.
- رشا يوسف، هندسة عين شمس: أنا مرعوبة جدا من أنفلونزا الخنازير بس لا يمكن طبعا ما أروحش الجامعة، إحنا بنروح وندح طول السنة عشان نعدي بمادة ولا مادتين ما بالك لو غبنا حيحصل إيه؟.. الطريف في موضوع أنفلونزا الخنازير أن الحكومة خايفة ومرعوبة وأول مرة أشوفها خايفة على الشعب أوي كده لدرجة أنهم أجلوا الدراسة.. الظاهر الحكومة خايفة لحسن الشعب ينقلها العدوى!.
وأنت.. حتروح الجامعة؟!