فــي الكـوافــيـــر

مش عارفة ليه بحب زيارتي للكوافيره يمكن عشان فيها تجديد أو نيولوك جديد، ويمكن عشان حكاوي الحريم اللي بسمعها، ويمكن لإني بحس بأنوثتي في كل مرة بخرج فيها من عند نهلة الكوافيره.

بس مقدرش أنكر إني كل مرة بدخل لها بهدف معين بأخرج بألف هدف ايشي شامبو جديد ايشي دلكة ايشي صابون مزيل للبقع ايشي ليفة مغربي وهكذا .. لكن الصراحة استمتاعي الحقيقي في حكاوي الحريم باختلاف مستوياتهم..

النهاردة كان هدفي هو قص شعري خاصة بعد ما تقصف وضعف كتير

- صباح الخير يا نهلة

- صباح الفل.. يا أهلا وسهلا...

- كنت عاوزة أقص شعري شوية.. إوعي تاخدي منه كتير

- لا متخافيش هخلص الزبونة اللي معاية بس.. اتفضلي ارتاحي، تشربي حاجة؟

- لا لا لا متشكرة هقرا في المجلات دي

(مديت ايدي ع الترابيزة كلها مجلات فنية اللي ما فيها واحدة اجتماعية حتى... مش عارفة ليه دايما كده كأنها خطة لستيطح عقول الستات وجعلهم أكثر تخلفا... وأنا منتظرة دخل المحل بنتين من سني أو أكبر حبتين، جيرانا في نفس العمارة... تبادلنا التحيات والسلامات والذكريات الحلوة)

داليا : إنت جاية ليه؟

- كنت بفكر أقص شعري ... أصله قصف خالص

منى: وتقصيه ليه يا خايبة!! استعملي زيت الجرجير ده تحفة

داليا: ما تجربي اللي بتقولك عليه منى ده؟

- لا لا لا أنا عاوزة أقصه وأهو تغيير برضو

منى: إن كان كده ... ماشي

- أمال انتم جايين ليه؟

داليا: أنا جاية أحنّي شعري.. ومنى جاية معايا ونس

(أثناء حوارنا كان في زبونة بتعمل بادكير.. ولأني عمري ما جربته فلفت نظري الموقف وقررت أتابع بعيدا عن حوارات جيراني ... كانت سيدة فوق الأربعين تبدو شيك في لبسها وعلامات الأرستقراطية باينة عليها ... حطت عبير –إحدى العاملات- رجلين السيدة في طبق وبعد مدة مش طويلة "عبطت" إحدى الرجلين وهاتك فرك بالحجر والمبرد ... المشهد ده فكرني بلقطة بتكرر كتير في الأفلام العربي مشهد تزغيط البط)

- بالراحة يا عبير... هئ هئ ... يا بنتي بغيييير (ونسمع صوت كركرة وضحك)

- طب هسيب حضرتك تريحي شوية يا مدام

- لا لا لا بلاش أنا ورايا مواعيد ... خلاص اشتغلي بس براحة

- حاضر يا مدام.

(وبدأت شغلها تاني من جديد وبدأت المدام في وصلة ضحك اياها)

- مش بقولك.... هئ هئ هئ ... بالراحة يا بنتي

- أمال أشيل الجلد الميت ده إزاي؟؟؟ مش عارفة اشتغل كده

(قلت في نفسي هو البتاع البادكير ده مستاهل كل الهيئ والميئ ده!! شوية ميه سخنة وحجر وأديلة في البيت وخلاص... ناس مزاجات!!)

(قطع كلامي مع نفسي أن داليا ومنى اتفتح بينهم حوار ودخلوني فيه)

- داليا: .. لا يا منى ما يصحش لازم تهتمي بنفسك شوية... ولازم تخسي كمان.. أنتي بقيتي زي البرميل، عشان جوزك ع الأقل.

- منى: يا ستي هو كان اشتكالك!!

- داليا: من غير ما يشتكي .. يا منى إنت أمورة- ما شاء الله يعني- لكن هاملة نفسك ع الآخر... ده أنا يا صابرين عمري ما رحت لها إلا ولقيتها لإما بتنضف، بتغسل، بترضع.. كده

- أنا: طب مهو طبيعي.. واحدة أم لتلات عيال منتظرة منها اية؟!

- منى: قوليلها.. أهي اللي مش متجوزة ردت عليكي أهو..

(هنبدأ بقى في تلقيح الكلام... أسكت أحسن)

- داليا: مهو أنا برضو معايا عيلين... بس ما بعملش زيك كده

- أنا: أنتي مالك داخله فيها شمال كده!! بالراحة عليها..

- داليا: انا عاوزة مصلحتها

- منى: يييييييييي يا ستي أنتي عيالك صغيرين.. أما أنا ورايا مذاكرة وغسيل وطبيخ وتنضيف وجوز ما بيرحمش

- داليا: مهو عشان الجوز ده ... ما ينفعش يدخل عليكي يلاقيكي زي الشغالات كده رابطة راسك وفي ايدك منفضه

- منى: تصدقي هو لما بيشوفني بنضف بيقولي عرق الخدامين نأح

- داليا: شفتي!! مش قلت لك؟؟ عشان تصدقوني

(الحوار بما أنه كان بصوت عالي دخلت نهلة في الحوار معانا)

- نهلة: بصي يا مدام منى أنتي ما شاء الله عليك أمورة وعينك ملونة وشعرك – باين من الحجاب- لونه حلو .... يبقى أنتي محتاجة شوية رعاية، كريم شعر، قلم روج.. حجات بسيطة بس بتعمل فرق كبير

- منى: مهو مفيش وقت لكل ده ... ولو في وقت مفيش راحة بال

- داليا: بلاش هبل ... ما تسيبي البيت يضرب يقلب واهتمي بنفسك شوية.. ولا إنتي مستنية جوزك يفاجئك بجوازته التانية!!

- منى: لا لا مش للدرجة دي يعني..

- نهلة: أمال لأي درجة؟ هههههههههه

(حسيت بصراحة إن الحوار بقى يفرس ومش عايزة أكمل كلام معاهم خصوصا أن الكل تكاتل على منى وهي أصلا قليلة الثقة في نفسها... وكمان عشان عارفة أن داليا من زمان بتحب تعيش دور الفتكة وهي أصلا لا بتحل ولا بتربط...، يا ربي .. هي ناقصة فرسة كمان في الكوافير.. واستمر الرغي الثلاثي ما بينهم وما أنقذنيش من الحوار ده إلا أن دوري جه عشان أقص شعري.. وانتهت رحلتي بإني اكتشفت إن رغي الستات ده عجييييب).

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس

عريس حبيب

واحد متزمت

مفروسة في العمرة

مفروسة في الميكروباص

عريس رغاااااااي

عريس صاحب منصب

ننوس عين أمه

بنوتة بـتـحــب

عريس كلبـــوزة

ضيـق خلـق

عريس جاهـل

في السينما