ننوس عين أمه

كنت راجعة من الشغل هلكانة، دخلت البيت ورميت نفسي على أقرب كرسي ليا، وسألتني أمي الغاليه :

- تتغدي دلوقتي ولا لما تصحي؟

- لا لا لما أصحى.

(هميت أقف لقيتها بتقول):

- الدكتورة سامية صاحبة أختك جايبة عريس.

(قالتها وكأنها رمت في حجري قنبلة... لقيت نفسي برجع للكرسي بقوة الجاذبية وبصيت لها عشان تسترسل في الكلام.... ومن غير ما أطلب كملت لوحدها)

- بتقول أنه دكتور متخرج جديد وعنده شقة في فيصل وبتقول أنه مؤدب ومحترم.. قلتي إيه؟

- بس هي دي البيأنا ت اللي عندك؟

- مهو لما نشوفه هنعرفها.

- يعني هيجي خلاص؟

- يعني مش شايفين أنه يتعيب بصراحة!

- يا سلام... ما تعرفيش عنه غير أنه دكتور وعنده شقة ... وشيفاه ما يتعيبش!! طيب إعرفي عنه معلومت أكتر يا حاجة.. سنه، ارتبط قبل كده، مستواه ... وكده يعني.

- مهو هنعرف كل ده يوم السبت لما يجي إن شاء الله.

(وقع عليا الخبر كالصااااعقة)

- السبت إيه؟ هوه أنتوا حددتم المعاد كمان!!

- مش أنا ده أبوكي.

(قالتها بطريقة مضحة جدا وكأنها بتنفي تهمة عنها)

- أنا مش عارفة لما أنتوا محددين المعاد ... إيه لزمتي أنا في الموضوع!!

- أنتي عروستنا الغاليه ... وأنتي عارفة اننا بنعمل كده عشان مصلحتك.. و..

(خفت لتكمل القصيده اياها: نفسي أفرح بيكي قبل ما أموت... فقاطعتها)

- ما تشيليش هم ... مش خسرانين حاجة.

(قمت من على الكرسي بصعوبة وهي بتزفني بالدعوات والمباركات.. ونمت نوم عميق وبالليل صليت الاستخارة .. وجه يوم السبت).

- انزلي هاتيلنا طبق حلويات وكام حتة باتية وإذا لقيتي ساليزوه هاتي كيلو وماتنسيش الحاجة الساقعة.

- في إيه؟ هية حفلة!! وبعدين هوه صنفين كفإيه ..عشان ما يطولش

- انزلي بس وتعالي بسرعة.

(وطبعا قبل ما أنزل كنت عملت الطقوس إياها واللي بتم عند كل زيارة عريس بدءً من التنضيف الشامل وانتهاء بإعداد الكاسات والفناجين وغيره ... ونزلت وجبت الطلبات وكان أول سؤال أتسألي بعد وصولي):

- هتلبسي إيه؟

- هلبس الجيبة الكحلي والبلوزة دي.

- كويس بس يعني...

(سكتت شوية واتكلمت باحراج: يا سلام يا صابرين لو حطيتي من قلم الروج ده.. وطلعته من جيب جلبيتها ..بصراحة أنا صعقت).

- في إيه يا ماما ؟ ما انتي عارفة أنا ما بحبش المكياج أصلا... وبعدين أنا هطلع زي ما أنا .

- يا بنتي ... الحجات دي بتحطها البنات إشمعنى أنتي يعني.

- أهو مزاج بقى وبعدين أنا ما بحبش الغش.

- إنتي حرة.

(قالتها بغضب ممزوج بقرف... وجه العريس بعد معاده بساعة)

والدي العزيز فتح الباب سلم عليه ورحب بيه وقبل ما يقفل الباب تاني لقيته بيسلم على شخص كمان ودخله وشخص تالت ودخله .. كل دول عرسان!!.. صحيح الفقي لما يسعد تجي له موتين في ليلة.. وأخيرا اتقفل باب الشقة واستقرت الأشخاص اياها كل على كرسيه ... مين كل دول!!! فهمت من الكلام اللي سمعته - غصب عني طبعا- أن العريس جاي مع والده ووالدته... أي نعم الوالدين ع العين والراس بس أنا بصراحة ما بطقش العريس اللي يجي بولي أمره ولي وجه نظر في ده:

أولا: بحس أن العريس مش مسؤل ولا ناضج كفاية عشان يعرف نفسه ويتكلم بلسان حاله يعني مفيش داعي يجيب أهله معاه إلا لما يكبر.

ثانيا: إن مواقف العرض الأولي للعريس أحيأنا بيكون فيها أسئله محرجة أو يمكن القبول ما يتمش من أول جلسة فا مفيش داعي لحضور الوالدين حتى نجنبهم أي إحراج ولو بطريق غير مباشر.

المهم... لقيت نفسي أني قدام أمر واقع.. وقلت نمشيها وخلاص مش يمكن العريس قابل أهله بالصدفة في مدخل العمارة!!!...عديها يا صابرين ومتدقيش على كل حاجة.... وبالفعل عديتها ودخلت وسلمت وقعدت):

- يا أهلا بعروستنا الغاليه .

- اهلا بيك يا طنط.

- إحنا والله يا أستاذ محمد جايين ع السيرة الحلوة... دكتورة سامية شكرت فيكم كتير.

- الله يكرمك ...ده بس من ذوقها وذوقك يا أستاذ عمر.

(كانت البدإيه كده... قعده لطيفة هادية وكان كل الحوار بين 4 أطراف فقط وساعات بدخل أشارك معاهم كطرف خامس... أما العريس فتهيألي أنه أخرس... وفضلت أترقب منه أي مشاركة أو مداخلة لكن في كل توقع كان بيخيب ظني... وفجأة... رن الموبايل بتاعه واستنتجت لوحدي ... إنه طالما معاه موبايل إذن فهو ليس بالأخرس ولا بالأطرش).

- ألو ...أهلا أهلا... لا يا أيمن عندي معاد مع دكتور الرسالة بتاعتي.. مش هقدر أقابلك بكرة... خلاص خليها بعد بكره... وهو كذلك....لا لا لا هتلاقيني موجود...مع السلامة.

(مش عارفة ليه وقتها افتكرت أغنية عمرو دياب واللي كان ممكن تكون موسيقى تصويريه للحدث ومطلعها "خلاص بقى بيتكلم،.يرحم زمن السكوت، كبر أوام واتعلم، وخلاص طلع له صووووت" ... المهم إنه رجع للسكوت من تاني)

- والله يا مدام حال البلد بقى مزري... تصوري إزازة الزيت زادت 3 جنية وشوية... وكمان الصابون، حتى اللبن اللي مالهوش علاقة لا بدولار ولا استيراد وتصدير هوه كمان غلي.

(كانت دي أمي الحبيبة بتتناقش مع والده العريس وضع البلد... وردت عليها والده العريس وهية بتمد ايدها على طبقين للجاتوه والساليزوه اللي جبتهم... واستغربت بتاخد الطبقين ليه!!! فكان تصرفها رد لسؤالي... قدمت واحد لابنها والتاني خلته في ايدها.. وجوزها من كسفته مد إيده على طبقه لوحده... وهو بيوجه الكلام لوالدي العزيز):

- هو حضرتك ما لكش غير صابرين واختها الدكتورة بس؟؟

- لا، الحمد لله عندي سارة الدكتورة، ومصطفى بيحضر ماجستير في الهندسة من كندا، وأصغرهم صابرين.

- ربنا يبارك ويخلي... ويا ترى بتدرسي إيه يا صابرين؟؟

(بدرس!!! محدش قاله أنى متخرجة من سنتين!!!)

- أنا متخرجة يا عمو من كليه الإعلام من سنتين.

- ما شاء الله ...وبتشتغلي على كده؟ (كانت دي والده العريس)

- الحمد لله بشتغل في جرنان.

(هاموت وأعرف العريس مش بينطق ليه لغاية دلوقت... كل اللي عرفته عنه إنه اسمه محمد وأكبر إخواته ودكتور أطفال.. يعني المفروض يكون نغش كده ويعرف يسايس العيال وياخد ويدي معاهم .. يمكن لأنه شايفني كبيرة فمش عارف يكلمني ازاي!!- الله أعلم- أهي قاعده والسلام .. وقمت أجيب طبق الفاكهه وقدمته ورصينا أنا وأمي الفاكهه فيه وقدمنا لكل واحد طبقه)

فوجئت إن والده العريس بتأشر البرتقان للدكتور محمد وبتحطه في طبقه ومش كده وبس إذا الدكتور كسل يمد إيده في بقه فكانت والدته بتتطوع وتحط فص البرتقان في بقه.. للمرة التانية افتكرت مشهد في مسرحية وجه نظر للفنان محمد صبحي لما كان غني وقامت الشغالة بتأكله في بقه وهي بتقول: القطر رايح فين؟؟.ويرد عليها: جوووووه ... يالا افتح المحطة ويرجع يرد ... بسرررعة هم يا جمل، بصيت لماما بعد المشهد ده لقيت العرق التركي بدا بالامتعاض فالإنكار وتحول لجملة واحده)

- ما تسيبيه ياكل بإيده يا مدام!!!

- أبدا أصل حماده حبيبي ما بيعرفش ياكل غير من إيدي!!

(رديت أنا وماما في نفس واحد... زي الكورال بالضبط):

- والله!!!

- طب ده حتى لو أنا مأكلتهوش ما يكلش خالص.

(الكورال مرة تانية):

- يا سبحان الله!!

- أمال لما يتجوز يا مدام هتعملي إيه؟؟

- هأكلهم همه الاتنين.. هههههههههههههه

(يا سم كده!!! .. ما كنش ناقص غير إني أقول للعريس: "إنكغ إنكغ إنكغ.. ننوس عين أمه يا ناس"... مهو احنا لسنا بناكل من إيد ماما لغاية دلوقت!!!)

القاعدة طبعا بانت خلاص.. وكملناها عادي وأنا عاصرة على نفسي شجرة لمون بحالها.. وبعد ما مشيوا مكنش في داعي إن حد من أهلي يسألني عن رأيي.. لأن الرد كان واضح زي الشمس.

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس

عريس حبيب

واحد متزمت

مفروسة في العمرة

مفروسة في الميكروباص

عريس رغاااااااي

عريس صاحب منصب