واحـــد مـتـزمـت

(دخلت الشغل النهاردة لقيت زميلنا وزميلتنا في جدل حاد .. رميت التحية وقعدت على مكتبي واستعنت ع الشقا با لله ...)

- اية اللي انت بتقوله ده !! ده كلام ناس عاقلة يا أ. خالد!!

- وما يعقلش ليه؟؟ المفروض إنك صحفية ومتعلمة ومداركك واسعة

- أنت خليت فيها مدارك !! ده كلام ما يعقلش أبدا

(واستنجدت بيا زميلتنا حبيبة)

- اشهدينا إنتي يا صابرين

- نعم؟؟ معلش ما اخدتش بالي .... ومحضرتش كلامكم م الأول

- ياستي أ. خالد ... عاوز يتجوز تاني

(معرفش لية تنحت وفتحت بقي مندهشة... يمكن لإني عارفة ومن حكاوية هو قد أيه بيحب مراته وعيالة الأربعة.. ولا تكنش مراته ماتت ولا عيانة ولا ... ولا... وقبل ما أكمل عيلة ولا اياها... قاطعني عم خالد بسؤاله)

- ها قلتي اية؟؟

(يا نهار مش فايت ... هو أنا هبقى التانية ولا ايه!!... ازدادت فتحة بقي بزيادة ومن كتر اندهاشي ما حستش إلا ودبانة بتحاول تقتحمه... وبحركة عفوية)

- توف تووووف .. آسفة الدبانة كانت هتدخل بقي

- عاجبك كده يا أ. خالد ... كنت هتموت البنية

- يا ستي ما قصدكيش... أنا بقصد رأيك اية في الجواز التاني بصفة عامة

(بدات ألتقط انفاسي... وأخيرا استجمعت قوتي وبسؤال خجلان سألته)

- هي المدام .... موجودة؟

- آة الحمد لله، ومقدرش أستغنى عنها كمان

(ياسم كده، أمال عاوز يتجوز عليها إزاي ده)

- طيب ماشاء الله ربنا يهنيكم ... بس إية لزمتها طالما إنت بتعزها كده ومش عاوز تستغنى عنها

- إستغفر الله ... أهو انتم الحريم كده ... نظرتكم على قدكم

- حريم!!

(ردت عليه حبيبة)

- ما تبقاش تشاورنا لما إحنا محدودي النظر كده

- يا أم محمد مقصدتش... أنا أقصد أنكم بتبصوا تحت رجليكم ما بتشوفوش مثلا إن في موضوع الجواز التاني هيحل مشاكل كتير

(فكرته في الأول بيهزر... لكن ملامح وشه كانت كلها جد وبدأ يمسح بكفه على لحيته المتواضعة... ويبص لسقف الأوضة ويقول)

- تفتكروا يعني الدين شرع لنا أربعة ليه؟؟ أكيد له حكمة وهي أن الزواج المتكرر هيحل أزمة بنات كتير عنست ولا أرملة وراها عيال ومحتاجة عائل ولا مطلقة محتاجة ونيس ... كده يعني

(ونّزل عينه من ع السقف .. وبدأ يدور بعينه علينا بما إننا حريم زي ما بيقول... وأظن كده إنه كان منتظر تصفيق حاد ... لكن بالنيابة عن حريم كتير وبالأصالة عن نفسي كان نفسي أحدفه بالدباسة اللي كانت على مكتبي أو أحوله لهدف وأنشن عليه بالقباقيب.. أما أم محمد بما إنها متجوزة فأظن أنها كان نفسها تخنقه بإيدها وتشفي غليلها)

- إية اللي بتقوله يا أ. خالد... عشان أفك أزمة غيري، أتأزم أنا!!! عليا النعمة أنا لو أبو محمد فكر بطريقتك دي لأكون حطاه في أكياس قبل ما يكمل كلامه

- بتضيقها على بنات جنسك ليه؟؟؟

- بالله عليك تسكت وبلاش استفزاز ...

(حبيت ألطف حدة النقاش شوية)

- لو هتسألني عن رأيي شخصيا يا أ . خالد... فأنا معنديش أي اعتراض على الزواج التاني، بس يكون بسبب ومبرر مع العلم إن احتمالية ظلم واحدة من الإتنين واردة جدااااا

- طب مهو رأيي كويس أهو

- بتقولك بمبرر.... مهياش سبهللة يعني

- فعلا، هو ده قصدي .. إن الأولى تكون مريضة بمرض مزمن مثلا، حجات من دي..

- يا سلام ... يعني وجود بنات فاتهم سن الجواز مهواش سبب

(صرخت فيه حبيبة بحده)

- بقولك اية؟؟ مفيش داع تعيش دور المسعف مش لايق عليك ... وبعدين بأي منطق عاوز تأسس بيت جديد على حساب القديم

- فعلا إزاي؟

(رد علينا عم خالد ببرود مطلق)

- مش بقولكم نظركم محدود.. بتدوروا على مصلحتكم وبس

- مهو اقنعني يا أ. خالد إزاي؟؟ وبعدين كلام حبيبة صحيح ..... مش عارفة هيجيلك قلب إزاي تخرب بيتك هتظلم مراتك وعيالك

- هو أنا جايب الكلام ده من عندي.. مهو الرسول عمل كده، وربنا مشرع ده.. مش هعمل حاجة حرام!! وبعدين أنا في إمكاني أفتح بيتين

( مقدرتش أمسك نفسي أكتر من كده ورحت رزعته بكام كلمة في العضم)

- مهو ربنا برضو عرفوه بالعقل وإذا كان بإمكانك تفتح بيتين زي ما بتقول ما تقدر المبلغ اللي كنت هتتجوز بيه وإديه لشاب مش عارف يتجوز وأهو بكده هتعف شاب وتنقذ واحدة من العنوسة وفوق كده هتاخد ثواب عظيييييييييم

(لقيت حبيبة بتهتف بشماته ... فكرتني "بالخرنج" بتاع شاهد ماشفش حاجة وهو بيقول: "ينصر دينك يا أستاذ خليفة")

- أهو ده الكلام ولا بلاش مش تقولي بنقذ... وطالما نيتك إنقاذ فخلي النية زي ما هي وغير إتجاهك بس

(صاحبنا إرتبك وبقى يجيب لنا آية من هنا وحديث من هناك ويتلجلج ... وفي الآخر موصلناش معاه لحاجة... بس إتأكدنا بقى إن النية مكنتش لله زي ما بيقول والمعنى في بطن الشاعر).