مفـروسـة في الميــكروبـاص

بما إن مقر عملي في مدينة 6 أكتوبر وبما إن الأهم من هذا أن سيارتي المتواضعة لسه عطلانة كان لزاما عليّ أن أركب الميكروباص (خط رمسيس- أكتوبر) يوميا حتى ينعم علي الله ويأخذ بيدها وينصلح حالها .. ومحدش ينكر خطورة الميكروباصات على الطرق السريعة فكابتن المكيرباص أقصد السواق بتأخده الجلالة وينطلق على الطريق بسرعة متهورة خصوصا بعد ما يعدي الرادار... ما أنكرش أني أتعودت ع السرعة اللي بتلزقني في الكرسي وتعلي ايمانياتي بذكر الله والنطق بالشهادتين في كل مرة أركب فيها ميكروباص!!!

لكن هذه المرة ربنا أتحفني بكابتن ميكروباص عجب، وكان في الميكروباص أسرة من زوج وزوجة وولدين، وشابين وأنا وعدد من الركاب ركبوا معانا من الطريق، كانت بداية السكة غير مبشرة بالمرة فالكابتن كان يفضل تجاوز العربيات باستخدام نهج الـ "زجزاج" وكان بيستعمى عن أي مطب يشوفه ورغم استنجادات الركاب بيه بأنه يمشي على مهله لأن مفيش حد فينا مستعجل ... لكن الكابتن كان بيرد عليهم ببرطمة وتمتمة يُفهم منها انه بيشتمنا!!!

المهم في لحظة طيش حاول بالخطأ سواق عربية مجاورة "matrix" أنه يتخطى كابتنا في الطريق... لكن عزة نفس الكابتن منعت السواق " البيه" كما أطلق عليه كابتنا من أنه يتخطاه..

- فرحان بالعربية اللي جابتهالك أمك... ماشي يا روح خالتك ... لا أنا لا أنت.

وبدأت علامات الفزع تترسم على وجوه الركاب، ومسكت في شنطتي بإيد والإيد التانية في الحاجة اللي جنبي .. وبدأ الركاب يرطبوا الجو مع الكابتن.

- ياعم سيبك منه ... خليك أنت الكبير.

- سيب له الطريق وخلينا في طريقنا... الله يسهله

لكن بتكلم مين!!! ولا كأن الكابتن سايق العربية لوحده ... وبدا في مضايقة ومعاكسة الـ matrix"" " ويكسر عليها ذات اليمين وذات الشمال ... ومنفعش مع الكابتن توسلاتنا فبدأت أم العيال بالصراخ:

- امسك العيال يا محمد ... امسك في أبوك يا مصطفى... والنبي تسيبه ياعم ... عاوزين نروح سُلام.

راكب آخر:

- انت يا بني آدم ... بالراحة مش كده !!

- - كبر دماغك يا أسطى...أنت مش عاوز تروح لعيالك؟ أهدى كده ....

وكل اللي طالع ع الكابتن:

- " ورحمة أمي ما هسيبك"... فرحان بالعربية الجديدة... و..

وقبل ما يكمل كلامه سمعنا صوت تأوهات ألتفت كل من في الميكروباص للخلف فاكتشفنا راكب عجوز بدأ بالانكماش في الكنبة الورانية وبدا الاصفرار يكسو وجهه، لكن الكابتن لم يهتم وكل اللي عليه:

- بتتحداني !!! ورحمة أمي لأوريك.

- ياعم ما عاش اللي يتحداك ... امسحها فينا أحنا

مع العلم أن الـ matrix" سابت له الطريق وبدأت تهدي من سرعتها بعد ما لاحظت سواقة الكابتن المصون ... وبالرغم من ده فإن الكابتن كان كل همه أزاي يقهر الـ matrix" " ويكسر مناخيرها... هنا بدأت أم العيال بالصراخ من جديد:

- نزلنا ... بقولك نزلنا ...ق وله يا محمد ينزلنا.

- ننزل فين بس ... أحنا في الصحرا!!!

كان أملي الوحيد في النجاة أن الكابتن ينّزل الأسرة عشان أنزل معاهم، وبالفعل لقينا الكابتن ربنا هداه واستجاب لتوسلات أم العيال وركن فجأة على يمين الطريق وبدأنا نهم كلنا بالحركة للفرار من ميكروباص الموت، لكن كلنا توقفنا لوهلة ... بعد ما لاحظنا أن الكابتن نزل من العربية وبدأ يلم طوب من الأرض استعدادا لرجم الـ matrix" بها، وكان بيتمتم بقاموس من الشتائم المعتبرة..

بصراحة الذهول حجمنا كلنا من النزول من العربية خاصة بعد أن استكفى الكابتن بالطوب ورجع للعربية وحطه جنبه وبدأ يبحث عن الـ matrix" المستهدفة ... وأخيرا لقي الهدف وكمان بدأ الرجم .. ولا أنسى أبدا ملامح سواق الـ matrix" " وهو مذهول وشاحب الوجه وكل ما هدأ من سرعته كل ما استفزه الكابتن بالطوب أو بالكسر عليه !!!

وأخيرا أتشفى الكابتن لما شاف الهدف غير اتجاهه تماما وانسحب من الحلبة بدأ أخيرا يسترد أنفاسه بهدوء وبدأنا بمساعدته.

- صلي ع النبي ... روق كده مفيش حاجة مستاهلة.

- ايوة كده .. أنت العاقل ما تنزلش نفسك للمستوى ده!!!

وبدأ الراكب العجوز يسترد أنفاسه وبدأ الاصفرار يهرب من وجهه وبدأت أم العيال في لم شمل أولادها ونزلت وهي تصب اللعنات على كابتنا... أما عني فلساني نشف من الذكر... وأخيرا بدأت أنفاسي بالانتظام بعد أن توقفت للحظات.

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس

عريس حبيب

واحد متزمت

مفروسة في العمرة