عريــس علـي قد حـالـه

(كنت في المطبخ بعمل شاي لبابا وماما .. سمعتهم بيتكلموا في الصالة عن شخص حابيين يزحلقوه، بفضول مني حبيت أعرف مين الشخص ده.. قلت أكمل السمع.. ياااااااه ده واضح أنه شخص خانقهم أوي .. إيه ده دول بيتآمروا عليه كمان والظاهر أنهم بيحددودا له معاد يخلصوا فيه منه!)

- لا يا محمد الواد كويس آه، لكن مستواه مش قد كده!

- مستواه إيه !! مهو كل الشباب كده.. العيال هتجيب منين يعني؟

- مقلناش حاجة بس الكفاءه يا محمد!!! يعني يبقى لا شهاده ولا مال؟

- م الواد أخلاق برضو ... وكفإيه أنه متدين.

- يوه .. وهي بنتنا اللي كخه يعني!!!!

(هنا حسيت بجردل مية ساقع بيرن على أم رأسي.. كل الكلام ده عليا أنا !!! هو أنا مضايقهم للدرجة دي.. طبعا بكده إتلغى عنصر الفضول ودخل عليا عنصر حب الاستطلاع مشمر عن ساعديه.. خدت موقع استراتيجي وركنت فيه وآآآدي قاعدة لما نسمع أخر كلامهم).

- بنتنا مفهاش حاجة، وزي الفل بس إتأخر عدلها.

- هنعمل إيه بقى مهو أنت عارف .. البلد حالها واقف ومفيش شغل والعواطليه كتروا.

(ماشاء الله دي هدخلني في السياسة كمان!!! وأنا مالي أنا ومال العواطليه !!)

- أنا بقول نخليها تشوف الواد ده وخلاص يمكن يحصل النصيب ... ولو إن الواد تنح.

- والله ما أعرف يا محمد البت أخواتها كلهم اتجوزوا مافضلش غيرها...ونفسي أطمن عليها.

- هنعمل إيه يعني؟ ما انتي شايفة اللي بيتقدم شكله إيه؟

(حسيت بحركة بابا قايم من على كرسية ...جريت من مكاني ودخلت المطبخ أعمل الشاي من جديد... للدرجة دي أنا تعباهم؟ ولو وافقت على أي حد بيجي هيسترحوا يعني؟!)

(خلص الشاي ورجعت بالصينية لماما والدمعة هتفر من عيني ...مهو نفسي صعبت عليا برضو... وقررت أنكشها عشان تفتح الموضوع).

- عملتلك شاي مزبوط إنما إيه كده.. اشربي يا حاجة وروقي أعصابك.. أمال بابا فين (بستعبط طبعا).

- بيتوضى.

- ومالك مكشرة كده ليه؟

- ولا حاجة

(مدت ايدها على كبإيه الشاي وحسيت بسؤال هيتزحلق من لسانها...فقلت أسيبها هية مستوية جاهزة ... وهتتكلم لوحدها)

- بقولك إيه يا صابرين.. هوه مفيش شباب عندكم في الشغل؟!

- إيه السؤال العجيب ده يا ماما ... طبعا فيه ... ناوية تتبني حد ولا إيه؟

- يعني محدش منهم اتقدم لك؟

(تنحت بشكل مقرف .. وضربت بخيالي في محيط الجورنال .. لقيت الشباب زمايلي ما بين صنفين لإما شباب هايف لإما شباب بيئة... يعني م الآخر كده مفيش منهم رجا)

- ولو حد اتقدم يعني...هتوافقي؟؟

(حسيت بوشها بيتهلل استبشارا وابتسمت لغاية ما بانت النغزة على خدها اليمين)

- يعني في حد عايز يتقدم فعلا؟!

- هوه أنا عشان ما بحكيش يبقى حالي واقف ولا إيه!!

- مين بقى؟

- ما بلاش .... مش عاوزة أغم نفسك.

- لا لا لا قولي والنبي.

- واد كده زميلي ...بس حالته المادية طيييين مرتبة يا دوب ع الأد، ومعندهوش لا شقة ولا دياولو وبيعيل إخواته الاربعة زائد أمه طبعا.

(فجأة تحولت الابتسامة لتجهيمة غريبة وبصيت في عينها لقيت دمعتها محبوسة .. بصراحة أنا مش عارفة الدمعة دي كانت ليه؟ صعبت عليها ولا الموقف نفسه صعب.. مش عارفة)

- فكيها يام العيال ...مش قلت لك بلاش أغم نفسك... ما تلحييش عليا ف السؤال بعد كده

- ده إيه القرف ده؟

- هية الناس اتعمت ولا إيه؟ مهو بناتنا زي الورد وما بيجيش اللي بيقدرهم ليه؟؟ عندك فايزة بنت خالك أحمد دكتورة ومعاها عربية ومستواها حلو ...مش ليها زمايل دكاترة برضو؟؟ ولا اتعموا دول كمان!!! وعندك بنت الحاجة نادية جارتنا بنتها وصلت 28 ولسة ماتجوزش والبت بتروح النادي ولها صحاب كتير محدش بيجيلها برضو!!!! وعندك...

- خلاص يا ماما ...والنبي ما تزعلي نفسك كده... لو جه حد مناسب أنا على إستعداد أشوفه.

(حسيت بأني رميت لها حبل الإنقاذ .. خدت نفس عميق رد لها الروح وقالت)

- في واد بيصلي مع أبوكي في الجامع، عنده 28 سنة ومهندس وساكن في آخر الشارع.

- خلاص .. هاتوه لما نشوف آخرتها

- إيه رأيك في الخميس اللي جاي بعد العشا؟

( رديت بقرف):

- خلاص يا ستي هاتية.

(شربت كبإيه الشاي بصعوبة وقمت على أوضتي ...لما نشوف آخرتها إيه.. يا مهون هوون).

(في اليوم الموعود، وبعد يوم مرهق وطويل في الشغل دخلت نمت نوم عميق جداا... وفجاة صحيت على صوت أمي العزيزة)

- انتي لسة نايمة!!! الراجل قرب يجي.

- راجل مين؟

- راجل مين؟ العريس هو فيه غيره.. قومي بقى.

(رميت لحافي على جنب وأنا أتمتم بكلمات الامتعاض بصوت خافت خوفا من أن تسمعني أمي وأنكد عليها في يوم زي ده)

- هتلبسي إيه؟

- العبإيه البيج بالايشارب بتاعها.

- عبإيه إيه !!! لا البسي التايير الفسدقي ...بلاش العبإيه بدل ما يفكرك معقده وارهابية.

- طيب بلاش.

- أبوكي جاب جاتوه وطبق حلويات شرقية... هنقدم معاهم الحاجة الساقعة والشاي بس؟؟؟

- بس إيه!!! ما تدخليه المطبخ معأنا أحسن...هوه مش هيقعد ساعتين ويمشي؟ ولا ناوي يتعشى!!

- وماله يا بنتي.

- ماله إيه... استغفر الله العظيم ...هروح ألبس.

(بعد ساعة تقريبا رن جرس الباب وفتح له أبويا العزيز ووقفت من موقعي أراقب شكله.. شهقت شهقة كان قلبي هيقف فيها... إيه اللي هو لابسة ده؟)

(قعد العريس مع أهلي يجي نص ساعة ودخلت وسلمت شفويا وقعدت.. وتفضل والدي بتقديم العريس)

- ده مصطفى مغاوري، مهندس في شركة (....) وابن حلال وطيب بيواظب ع الصلاة معايا.

- أهلا وسهلا

(وطالت لحظة الصمت وسياده العريس كما أبو الهول، الرد على قد السؤال وكنت بتأمل لبسه كان لابس بنطلون كحلي وبلوفر مشجر بألوان زاهية والقميص كان كاروهات.. طبعا الشكل العام للعريس كأن أقرب للوحة من الفن التشكيلي لفنان مبتدئ.. وسأله والدي عن مرتبه فقال وكله فخر ونشوة).

- أنا يا عمي باخد 300 جنية.

(بلعت ريقي من الدهشة لأني لما فكرت فيها لقيت أن لأهله نسبة من المرتب غير إيجار الشقة ده إذا كان معندهوش)

- وعندك شقة على كده؟

(سؤال طرحته أمي ...وكان بودي أحط ايدي على بقها ... شقة إيه يا غاليه بيقولك بيقبض 300 يادوب تجيب له شقة بطيخ)

- بصراحة لأ مجبتش.. بس محوش مبلغ أدفع بيه مقدم لشقق الإيجار الجديد.

- مش مهم يا ابني ... احنا بنشتري راجل.

( راجل !!! وأنا عاوزة أشتري استقرار، قلت لما أسأل أنا بقى)

- بتقضي يومك ازاي؟

- والله أنا من الساعة 8 لغاية 4 ... قولي كده بوصل البيت 5 يادوب أتغدى وأنا م وأصحى اشرب كبإيه الشاي مع الحاجة وأنزل اشربها تاني مع اصحابي ع القهوة.

(قهوة!!! هو بيتفضل في المرتب حاجة عشان تصرفه ع القهاوي!!!)

- على كده مفيش أي موهبة او رياضة بتمارسها؟

- ههههههههه لا طبعا معنديش وقت.

- طيب إيه طموحك في الحياة؟

(رد ببلاهة)

- هه!! يعني القناعة كنز.... بصراحة وأنا راضي بحالي كده.

(حطيت لساني في بقي وسكت، وفتح أهلي كذا موضوع عام كشف عن مدى سطحية التفكير أقصد القشور الباقية من التفكير.. كانوا ساعتين تقال على قلبي .... يا ربي واحد مرتبه يادوب ع الأد ومالوش طموح ولا حتى حلم وما يعرفش الدنيا ماشية إزاي وله نفس يخطب ويتجوز؟ ..عجبي.. المهم قام العريس وروح.

الصدمة مكنتش في العريس بصراحة... الصدمة كان في سؤال أهلي عن رأيي!!! وكان حوار ساخن ومحتد، والحق يتقال كان واضح إنهم مش مقتنعين بالمرة بالعريس لكنهم في الأول والآخر أهل وبلتمس لهم العذر في إنهم نفسهم يفرحوا بيا... لكن الفرح بالعقل يا ناس!!.

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس

عريس حبيب

واحد متزمت

مفروسة في العمرة

مفروسة في الميكروباص

عريس رغاااااااي

عريس صاحب منصب

ننوس عين أمه

بنوتة بـتـحــب

عريس كلبـــوزة

ضيـق خلـق

عريس جاهـل