عــريـس رغـــاااااااي

كلمتني إمبارح صديقتي الغاليه رشا ودي كانت زميلة لي في الكليه وكانت بنت جدعة ومحترمة.. م الآخر كده بنت ناس.

- والله زمان يا رشا... فينك يا بنتي محدش بيشوفك من زمان

- فعلا والله يا بنوته آخر مرة شفتك كان في فرح هبة (صاحبتنا).. إلا بالحق هي أخبارها إيه؟

- عقبالك...على وش ولاده أهوه.

- ياااااااااه يعني أنا مشفتكيش من 9 شهور!!!

- أيو ة يا ستي... إنما إيه سر المكالمة الغامضة دي؟

- عرييييس

(قالتها وكأنها جايبة لي هدية... بلعت ريقي وقلت في سري يا خفي الألطاف نجنا مما نخاف)

- والله ... خير يا وش السعد؟

- طيار.. وعنده 30 سنة صاحب مصطفى خطيبي، وعنده شقة في مساكن شيراتون.... قلتي إيه؟

- قلت إيه!!! هوه أنتي قلتي حاجة عشان أقول رأيي.. ما تقولي باقي التفاصيل.

- له أخ وأخت أكبر منه وأبوه متوفي من زمان .. والواد كويس مش وحش يعني مستواه المادي معقول... بس هوه طويل حبتين.

- ممممم ياريت تيجي ع الطول ... أهي محلولة بكعب عالي وخلاص، والله مش عارفة يا رشا، أنتي رأيك إيه؟

- أنا بقول شوفيه مش هتخسري حاجة... بس لاحظي أن سفرياته كتير.. يعني لو هتشوفيه يبقى خلال الاسبوع ده... قلتي إيه؟

- مممم وهو كذلك بس هقول لأهلي الأول وهكلمك آخر النهار.. ماشي؟؟

- ماشي... أسيبك دلوقتي لأن عندي معاد مع مصطفى ومش عاوزة اتأخر عليه... مهو إنتي عارفة قد إيه قماص.

- ولا يهمك يا رشا ومتشكرة أنك افتكرتيني... يالا مع السلامة وسلمي على مصطفى.

- الله يسلمك ، مع السلامة.

(يا حلاوة يا ولاد طيار مرة واحدة.. يالا على كل لون يا باتيسطة.. لما نشوف... ومكدبتش خبر ورحت وحكيت لأهلي ع المكالمة .. طبعا انشكحوا الاثنين وقالوا على بركة الله.. على آخر النهار كلمت رشا زي ما وعدتها واتفقنا على مقابلة في النادي يوم الأحد الجاي ع الساعة 5... ويوم السبت اللي قبل الميعاد سألتني أمي الغاليه ):

- هتلبسي ايه؟

- إيه رأيك في التايير الفسدقي إياه؟

- لا لا لا بلاش.. إلبسي الطقم ده ( ولقيتها محضرة ليا الطقم بالإيشارب!!!).

- وكمان محضراهم ... طيب مش هكسفك وهو كذلك.

- إسمعي... ما تضحكيش بصوت عالي وخليكي رقيقة وناعمة... ده طيار يعني الصنف الناعم معاه في السما والأرض.

- حد قال إني راجل... وبعدين أنا هبقى زي ما أنا ... إن كان عاجبه.

- هية رشا هتكون معاكم مش كده؟

- أيوة طبعا أمال هقابله لوحدي!! ومصطفى خطيبها كمان.

- ربنا يقدم إللي فيه الخير .. (وهية موليه الأدبار سمعتها بتمتم بدعاء وبتقول : يارب والنبي يطلع عِدل المرة دي).

(وجه يوم الأحد ولبست الطقم اللي حضرته ليا أمي وطبعا قبل ما أنزل صليت الاستخارة كالعادة وطول السكة وأنا في العربية أكرر دعاء الاستخارة ومن حسن حظي لقيت ركنة للعربية ولسة هدخل بضهر العربية لقيت واحد ظريف حشر بوز عربيته في مكان الركنة، ضربت له كلاكس بص لي وابتسم ابتسامة صفرا وشاور لي وقال):

- أنا اللي لقيته الأول.

- ما أنت شايفني بركن بعربيتي... بتدخل ببوز العربية ليه ؟

- ههههههههه نصيبك كده بقى... شوفي لك ركنة تانية.

(طبعا اتخنقت منه وقلت أقصر معاه مهو أنا مش ناقصة تأخير.. ولفيت حوالين النادي حوالي 3 أو 4 مرات على ما لقيت ركنة بطلوع الروح... ودخلت النادي وأنا متغاظة من الظريف اللي أخد مكاني وكان سبب في تأخيري عن الموعد... وصلت للتراس ودي فسحة كبيرة فيها ترابيزات وكراسي.. وكانت المفاجأة!!!!)

أول ما حطيت رجلي في التراس لقيت رشا بتشاور لي من مكانها... رحت لها وأنا بدندن "واثق الخطوة يمشي ملكا" للست أم كلثوم... وأول ما قربت ناحية الترابيزة فوجئت بأن العريس هوه نفس الشخص اللي أخد مكاني في الركنة.. ومن زيادة ظرفة لما رشا ومصطفى بيعرفونا على بعض قال:

- مفيش داعي للتعريف... سبق واتعرفنا.

(كان نفسي ساعتها أدلق كبإيه العصير عليه اللي سيادته طلبها أثناء ما كنت أنا بلف حوالين النادي بدور على ركنة في عز الحر.... وبما إني مفروسة منه حبيت أحرجه قدام صاحبة)

- أصل الكابتن حشر عربيته مكان ما كنت هركن

(كنت متخيلة إني فعلا بحرجه... لكن الظاهر أني قلت له نكتة)

- هههههههههههههههههههه أيوة ده حصل صحيح... هههههههههههههههه أصل الدنيا فرص يا آنسة ما بتتعوضش... شفتي أنتي اتأخرتي إزاي على ما جيتي!!!

(كنت عاوزة أقوله إن قلة ذوقك هي اللي أخرتني مش الفرصة... لكني افتكرت وصايا ماما ليا.. وحبت رشا تلطف من الجو فطلبت لي حاجة ساقعة .. وأتكلمنا في موضوعات كتير عامة.. كان الجدع الصراحة مثقف إلى حد ما لكن كان إستعراضي بشكل يعل لدرجة إني فكرت أقوله يقدم في فرقة "راشن شو").

- لما كنت في إيطاليا دخلت الفاتيكان وبرج بيزا و... و...، أما لندن فشعبها بارد صحيح لكن...... ، وأما باريس ....،. ولما حجيت قابلت.....

(يااااااااااااااااااه ما لهوش قفله ده ولا إيه !!! الله يسامحك يا رشا ده أنا ما تكلمتش خالص ولا رشا ولا مصطفى كمان.. هيسكت إمتى ده!!.. وأدن علينا المغرب فوجدتها فرصة أستأذن عشان أخد رشا ونروح نصلي وبالفعل أخدتها..)

(وإحنا في السكة)..

- ها يا صابرين إيه رأيك ؟

- إنت تخرسي خالص... إيه الراديو ده!!

- ليه يا بنتي! دي أول قاعده بتبقى تعريف ببعض.

- أيوة يا ستي نعرف ببعض مش يعرف بنفسه بس .. ده مش ناقص غير أنه يحكي لنا يومياته... والنبي بعد ما نصلي ..حاولي تقصري يا رشا أنا صدعت.

- يا بنتي الواد كويس ...طب إدي نفسك فرصة تانية.

- فرصة إيه بس؟ تعالي بس نلحق الصلاة.

(صلينا ورجعنا للترابيزة.. فسألت رشا خطيبها)

- صليت يا مصطفى؟

- لا قايم أهو... مش هتقوم معايا يا خالد؟

(طلع اسمه خالد... ما كنش عنده وقت يعرفني باسمه لكن مش ده الغريب.. الأغرب أنه قال لمصطفى):

- روح إنت وأنا هحصلك.

(وصلى مصطفى ورجع.. والعشا أدنت وأخينا مقامش من مكانة.. واستعدينا نمشي وفي المواقف اللي زي دي ... كنت أتوقع أن العريس يقوم بدفع الحساب لكن المفاجأة لما قال):

- لا يا جماعة ...إحنا نمشي نظام إنجليزي.

(طبعا مصطفى وخطيبته شكلهم كان وحش جداااا وحاول مصطفى يداري الموقف... لكن البعيد صمم أنه يدفع ع الأقل لنفسه... لأنه تربية إنجلترا والحق ما يزعلش حد ده حسب ما قال... وروحنا بيوتنا وحكيت للغاليه اللي حصل فاتجرعت ألمها وقالت جملة واحده

- حسبي الله ونعم الوكيل.

(الجملة فعلا عادية لكن الغير عادي حرقتها وهي بتقولها.. وفعلا صعبت عليا أمي وصعبت عليا نفسي مهو الإنسان طاقة برضو... واتصلت بيا رشا تعتذر)

- أنا آسفة يا صابرين.. الصراحة أنه صاحب مصطفى من بعيد.. مش صاحبة أوي يعني..

(طبعا تقبلت إعتذارها بصدر رحب.. وقعدت أفكر في أحلامي اللي طيرها الطيار)!.

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس

عريس حبيب

واحد متزمت

مفروسة في العمرة

مفروسة في الميكروباص