بـنـوتـــــة بـتـحـــب

وأنا داخلة الجورنال النهارده .. لقيت مروة زميلتي واقفة فى صالة الإنتظار زى ما تكون كده مستنية حد .. لسه حقول لها صباحك قشطة يا مرمر لقيتها بتشدني من دراعى على الأوفيس..

- ايه فيه ايه يا مروة مالك على الصبح .. اتسرقتي؟

- اتلهى انتي كمان اتسرقت ايه أنا واقفة من ساعة ما عرفت الخبر مستنياكي علشان ما تتاخديش على خوانة

(الكلمتين دول رفعوا كل الأرايل اللى على نافوخى وبرقت لها كده وطرطقت ودانى)

- خير يا مروة اللهم اجعله خير .. ايه قرار رفد ولا نقل واللا ايه ؟؟

- هو انتي مش فى دماغك غير الشغل .. لأ ياختى عريس

(غصب عنى فرقعت حتة ضحكة)

- الله يخيبك يا مروة بقى رايحة جايه فى صالة الأستقبال زى اللى حتولد .. وعماله تفركى ايديك ورجليك وخطفتينى من على الباب زى ما تكونى حتهربينى من عسكر الموساد علشان فى الآخر يطلع عريس ... يخرب عقلك ده انت طلعت مصيبة ..

- بتضحكى على ايه يا هانم .. مش تعرفى هو مين الأول يا فالحة قبل ما تستظرفى وتتريقى عليا

- مين يعنى .. الكونت شديد

- لأ يا يا حلوة ... بدر المسلمى

- يا لهوى !!!

(دي بقى كانت شهقة حقيقية تبعتها رزعة على صدرى اعتقد انها طبقت نص قفص ضلوعى .. وبرقت وتنحت وحسيت أني بعرق وبعدين الدنيا لفت بي شوية كده ومتعدلتش)

- يا نهارك مش فايت يا صابرين .. امسكي نفسك .. تعالي تعالي .. اقعدى .. مش قلت لك ...

- جبتي الكلام ده منين يا مروة؟ الحاجات دى مفيهاش هزار !! ودين النبى لو بتشتغلينى حيكون أخر يوم بينا

- اتنيلى وهو ده موضوع ولا شخص حد يشتغلك فيه ... الأستاذ بدر كلم الأستاذ عبد الهادى وعبد الهادى كلمنى

- بالراحة كده وواحده واحده لى .. الأستاذ عبد الهادى مشرف صفحة التحقيقات بتاعتنا؟؟

- أيوه يا ستى .. والأستاذ عبد الهادى كلمنى وسألنى اذا كنت مرتبطة ولا لأ علشان يرد عليه .. قبل ما يكلمك

(يانهار ازرق على فحلقي ... زمان الجورنال كله عرف .. عم عبد الهادى بيقوم بمهامه الصحفية على اكمل وجه .. مبيبطلش نشر اخبار طول النهار ... )

- يعنى حيحصل ايه دلوقتى ؟؟

- حيتصل بيكي ؟؟

- مين ؟؟

- هو احنا بنحلب فى تور .... بدر المسلمى

- فى التليفون ؟؟

- لاااااااااااااااااااه .. ده انت جالك عبط حيثى ... أومال لو ما كتش قلت لك كان جرالك ايه ؟؟؟ علشان تبقى تلمى لسانك اللى زى مضرب الدبان ده وتتلمى .. اتفضلى قدأمي على المكتب يا عرورة

ما بقتش عارفة أنا بفكر فى ايه ... وفضلت أشحذ - حلوة اشحذ دى- فى همتى وأقول لنفسى يا بت يا صابرين مالك .. ايه اللى لخبط حالك كده ؟؟ علشان كان عاجبك ؟؟ يا بت ما هو طلع واقع صبابة هو كمان وجه يخطبك اهه .. ما تلمى طراطيفك اللى بعترتيها دى وتركزى كده علشان تشوفى حيحصل ايه ؟؟... يا صلاة النبى يا صلاة النبى .. واللا صبرت ونلت يا صبرورة .. الصحفى اللامع بدر المسلمى على سن ورمح .. يا حلاوة يا حلاوة .. وده يا ختى ايه اللى لفت نظره فيا؟؟ جرى ايه يا بت .. هو انت شوية ولا ايه ؟؟ ذكاء وطموح وجمال .. يعنى مش جمال قوى يعنى بس مش بطال.. يا فرحتك ياماما .. ازغرط يا ولاد ولا يقولوا صابرين اتهبلت.. يظهر انى سرحت فى دنيا تانية علشان لما جرس التليفون اللى على المكتب رن اتنطرت زى ما يكون لدغنى عقرب ..

بعد المكالمة اللى استمرت دقيقة ونص قمت من على مكتبى اتحرك زى الفراشة.. بالييرينا يا اخواتي!! .. مش لايق عليا اكيد .. ده أنا عادة بمشى أدب زى العسكرى الروسى ... اخدت اذن من رئيس القسم وروحت .. اصل الأستاذ بدر حيشرفنا النهارده ..

أمي بقى بقها من ودنها دى لودنها دى ... وكل شوية ترقع زغروتة ... ما بلاش يا ماما .. داري على شمعتنا علشان تقيد الله لا يسيئك .. انما الحاجة ايه ؟؟ الله ينور

الساعة سبعة كنت واقفة فى الشباك مستنيه البدر يهل علينا.. بابا اللى فتح الباب .. وسمعت أمي بتقول بفرحة ولا كإنها تعرفه من ميت سنة

- اهلا اهلا اهلا يابنى ... شرفتنا ... اتفضل .. اتفضل

لما جبت الضيافة كانت شبورة الترحاب مستمرة .. وحلفان بأغلظ الأيمان ليدوق الكيكة اللى عاملاها صابرين .. ويشرب العصير اللى دوبته صابرين .. وأنا بينى وبينكم لامة فصوص مخى كلها فى حجرى ومركزة معاه .. مقالش حاجة مفيده .. ولا كأنه جي يخطب .. ولا يكنش كان معذور في كبايه شاي وحته جاتوة!! لا لا لا أستاذ بدر متريش مش بتاع توفير ولا بخل ولا كلام من ده ... طب هوا جي ليه ؟؟ ده حتى معرفش بنفسه ولا اتكلم حتى عن أهله.. أومال مشرفنا بالزيارة ليه ؟؟... لولا إني عارفة ان امي مالهاش علاقة بالجرنال ولا بعم بدر ده لكنت فكرت إنها اللي جيباه بتهديد السلاح عشان يخطبني... عاجبنى آه ... بس برضه الأصول أصول... ولا يكنش جي عشان نتحدتت شوية!!! .. ده مكلمنى فى التليفون الصبح وقايل لى بعضمة لسانه (الأستاذ عبد الهادى اداكي فكرة يا أستاذة صابرين .. قلت أيوه .. طيب اقدر آجى اقابل الوالد النهارده الساعة سبعة ؟؟ .. قلت طبعا طبعا ...)

تفتكروا كان لازم اقول له مينفعش .. استنى لما اسأل بابى ؟؟ ما أنا عارفة ان ابويا بعد الشغل ما بينزلش تانى إلا فيما ندر .. ولا كان لازم أعمل حركات .. أنا خايبانه وماليش فى القرع ده

خلصت السهرة .. ولقيته بيسلم على أبويا وبيقوله :

وبعدين اتلفت بحركة شيك كده لأمي وقال لها تسلم ايديك ياتانت ..

أمي برضه فاتحة بقها قوى مش عارفه ليه وقالت له فرصة سعيده قوى يا فندم

- تسلم من كل ردى يا استاذ بدر ..

وبعدين برقة شديده راح قايل لى : تصبحى على خير يا استاذة صابرين

الله !! وانت من اهله يا خويا .. يعنى ايه طيب ؟؟ اروح أنام واحلم ؟؟ اتلفت لأمي يمكن اكون أنا اللى مش فاهمه .. لقيتها بتقول لأبويا بصوت واطى علشان مسمعهومش .. انتم اتفقتوا على ايه يا خويا ؟؟

- ولا حاجة ... أنا عارف يا وليه الراجل ده لكفتنى ازاى

- لكفتك

- ايوه من موضوع لموضوع ومن حكإيه لحكإيه .. ومجبش سيرة هو جي ليه ولا اهله مين ولا اي حاجة ..

- يووه ..طب ماقالكش حيزورنا تانى امتى ؟؟

يزورنا ايه يا غاليه .. ماقالها بالفم المليان .. تصبحى على خير

المنحوس منحوس .....