عـريـس صاحــب منصــب

- إنتي عاوزة إيه تاني؟! مهو أنا جايبة لك عريس لقطة أهوه.

- ده لو حسبيتيها بالمسطرة والقلم... لكن أنا عندي الراحة والقبول أبدى وأولى.

- طب شوفيه الأول ...وبعدين أبقي احكمي.

كان ده حوار بيني وبين خالتي رباب اللي جت تزورني بعد ما رجعت من العمرة.. جايبة لي عريس حسب كلامها لقطة يبقى ابن صاحبتها في الشغل، هيا ماشفتهوش صحيح لكن بتقول أن والدته بتقول عليه هادي ومش بتاع مشاكل... طبعا مهو القرد في عين أمه غزال.. وكل اللي عرفته عنه أنه مدير في إدارة ما في إحدى السفارات الأجنبية، وعنده شقة وعربية ومستريح وسنه مناسب، خالتي بتقول إنه ابن ناس أوي ووالدته ست هادية ومهذبة..

حددوا موعد الزيارة.. وكالعاده قمنا بالطقوس المعتاده لاستقبال العريس المنتظر.. بدءً من هلبس إيه وحتى هناكل إيه.. وجه العريس في الموعد المحدد بالزبط واحترمته بصراحة لما احترم الموعد لآن احترام الموعد يعني بالنسبة لي احترام لأهل البيت.. ولمحته من بعيد واحد ملو هدومه صحيح.. بدلة شيك وجزمة بتلمع إيه الشياكة دي؟!.. ومن ساعة ما دخل العريس الشقة وفي ريحة برفان تحفة عبقت المكان..

- هو بابا حاطط برفان إيه يا ماما؟.

- (ردت عليا بحده): هوه أبوكي بتاع برفأنا ت برضو!، أبوكي مابيعرفش البرفان إلا لما ينزل يصلي الجمعة...ده العريس يا فالحة.

- ياسلام!! دالق على نفسه الإزازة ولا إيه؟

- هو إنتي محدش عاجبك خالص!! حتى الراجل الكبارة ده!!

- انتي عملتية كبارة خلاص... يا خوفي يا بدرااااان.

- خدي صينية العصير وقدميها وبلاش رغي ... يارب يطلع كويس يا صابرين ويحصل نصيب.

المفروض في المواقف اللي زي دي أحس بالفرحة لكن كلام أمي الغلبانة حسسني بالشفقة عليها، مهي من ساعة ما طلعت على المعاش وهية ما اختلطتش بشبابنا ولا عرفتهم عن حق وحتى الآن متخيلة إن كل الرجالة زي جوزها طيبيبن ومكافحين وأصحاب طموح .. ما تعرفش الغاليه إن الصنف ده إنقرض من زمان وكلها كام سنة ونشوفهم في المتاحف جنب الديناصورات...على العموم ما حبتش أقطع عليها فرحتها وقلت أدخل الصينية ونشوف مش يمكن ألحق حاجة من العصر الحجري إياه...

(.. بعد عشر دقايق تقريبا من التعارف الأولي..)

- والله يا عمي الشغل في السفارة عندنا مرهق جدا خاصة بعد أحداث 11 سبتمبر.

- ربنا يعينك يا ابني ... على كده أنت بتسافر كتير؟

- يعني حسب الشغل ومتطلباته، ساعات بسافر بالشهر وساعات يومين تلاتة وأرجع كده يعني.

- (ماما بكل تعاطف): يااااه كتيرعليك يا ضنإيه.. بس يالا ناس كتير مش لاقية شغل أصلا.

- الحمد لله يا طنط، ربنا أنعم عليا بنعم كتير يعني المرتب كويس والمنصب كمان ...مش فاضلي غير أكمل نص ديني.

(قالها وبص لي حتة دين بصة مع ابتسامة ظريفة ... كنت هنصهر في الكرسي من الكسوف وبلعت ريقي بصعوية خاصة إني حسيت بحرارة بتفط من وشي، وفجأة رن التليفون وكان خاص بوالدي فدخل يتكلم من جوه ... شوية كده وقامت أمي تجيب باقي الضيافة.. وفضلت أنا والعريس في الصالة)..

- شغلك فعلا متعب ومسؤليه مايستهانش بها.

- معاكي حق، بس أنا مبسوط بيه ومستمتع بيه كمان.

- والله جميل .. ربنا يوفقك.

- وإنت شغلك عاملة فيه إيه؟

- والله كويس. انت عارف ان الصحافة مهنة المتاعب.. لكن الحمد لله مستمتعة بيها.

- ممممم عظيم.. على كده انتي مش ناوية تسيبي الشغل بعد الجواز؟

(طول عمري من أيام ما كنت بنوتة بضفاير وأنا بحلم إني أشتغل حتى لو اتجوزت وخلفت... لكن ما أعرفش إيه اللي خرج الكلام ده من بقي)

- لا بصراحة، كنت زمان بقول إني حابة أشتغل لكن دلوقت مع الظروف اللي بنعيشها شايفة إن دوري في البيت أهم... أظن إني مش هشتغل وحتى لو اشتغلت فهيبقى بالمراسلة من البيت.

- (بص لي بذهول وقال): بس اللي أعرفه من خالتك إنك عاوزة تشتغلي!!!

- ده حقيقي.. أنا كنت بقول كده زمان لكن غيرت رأيي دلوقتي.

- بس أنا شايف إن الشغل بيضفي على الواحده جدية واجتماعية وده المطلوب حاليا.

(مش عارفة ليه حسيت من كلامه أنه لا يقصد لا الجدية ولا الاجتماعية فقلت أحاول أستفزه وأعرف ميته إيه)

- معاك حق ... بس أنا استكفيت بكده.. وبعدين مع الجواز والأولاد – ده لو ربنا كتب لنا الارتباط- أنا شايفة إني ممكن أقصر في بيتي والبيت هوه اللي باقي ليا.

- (تنح بذهول غريب وقال): بصراحة كده .. أنا شايف إن إيد على إيد تساعد.

( أوباااااااااااااا ... أخينا وقع في المحظور ولبتك بانت يا حلو)

- يعني إيه؟

- يعني ممكن الست تساعد جوزها في مصاريف البيت... يعني مثلا تشيل مصاريف مدارس العيال، تدفع بنزين عربيتها، المناسبات الاجتماعية، و.. و.. و..

( المرة دي أنا اللي تنحت وأصبت بالذهول والإندهاش وحسيت إن في علامة تعجب كبيرة جدا بتحُلق فوق نافوخي)

- (قلت بعفوية): لما أنا هعمل كل ده .... أنت هتعمل إيه؟

- لأ، أنا هيكون عليا أحافظ على بريستيج العيلة.. أدخل مشاريع، أجيب شاليه ، أغير العربية والموبايل ... كده يعني.

(إتمنيت للحظة أن أهلي كانوا علموني الردح أو إني اقتبست ولو شيء بسيط من قواميس القباحة اللي بسمعها في شوارعنا المصرية.... هوه يا ربي اللي نقول عليه موسى يطلع فرعون!!! ولابس بدلة ومتشيك ومنصب كويس.. على إيه ده كله؟، المهم ابتسمت ابتسامة صفرا وتعمدت استفزه أكتر لما نشوف آخرته إيه)

- بس على كده الجوازة دي هتقف عليا بخسارة، ما أنا قاعده في بيت أهلي معززة مكرمة ع الاقل شايلة نفسي مش شايلة عيلة!

(ابتسم ابتسامة صفرا هو كمان ورد عليا بكل بلاده وغطرسة وقال):

- الموضوع ما يتحسبش كده.. احسبيها صح.

- إزاي مش فاهمة؟

- يعني بالعكس إنتي لو حسبتيها صح هتلاقي نفسك كسبانة ... وكسبانة كتير كمان.

- والله إزاي؟ قولي؟.

- كفإيه إنك هتحققي حلم بنات كتير بتحلمه.

- حلم إيه؟

- إنك هتتجوزي وتكوني أم خاصة إنتي شايفة حال البنات واقف اليومين دول.

(يا نهارك زي بعضه... ده هيمن عليا كمان!!! وهيشيلها لي بجميلة!!! مفكر نفسه هينقذني من مستنقع العنوسة ده ولا إيه ... لأول مرة في حياتي أندم على إني اتربيت بما يرضي الله وحسيت كده بقرف وغممان نفس غريب... قطع وصلة القرف دي دخول والدي الصالة ولاحظ على وشي كل علامات الإشمئزاز والقرف، ودخلت بعدية ماما بصينية الشاي وقالت لي):

- هاتي الجاتوه من جوه يا صابرين.

قمت وأنا حاسة بدوران البر والبحر الاتنين سوا ...فيه إيه يا ربي!! وصلنا لدرجة أن الرجالة تشوف نفسها علينا!! وعلى أي أساس أصلا وبأي معيار!!! ده القيامة قامت يارجالة ولا إيه... حطيت أطباق الجاتوه ع الصينية ولتاني مرة اتمنيت لو أني املك حبة زرنيخ عشان أدلقها على طبقه وأخلص البشرية من نماذج غبية ومتغطرسة زي دي ... ودخلت قدمت الصينية وابتسامة الموناليزا تعلو وشي ومقدرتش أقعد أكتر من الوقت اللي بمضية في شرب كبإيه الشاي.. انسحبت من القعدة وقمت دخلت أوضتي والغضب بيشيل ويحط فيا .. شوية وسمعت صوت الباب بيتقفل واستنتجت أن العريس مشي ... وحسيت برجلين أمي الغاليه جإيه باتجاه أوضتي... ودخلت بالفعل..

- (قالت في حده): ده يصح يا صابرين تمشي من الأوضة من غير ما تستأذني؟!

- (وكمل عليا والدي العزيز): يعني يصح تحرجينا كده!!! حتى مكنتيش موجوده وقت ما كان ماشي.

( يااااااااه، فعلا والله غلابة.. علمونا اللي يصح واللي ما يصحش ومتخيلين الناس كلها زي عيالهم اتربوا على الدين والأخلاق .. فلاقيت إني لازم أحكي لهم عن الخمس دقايق إياهم ... ولما حكيت لاحظت وشوشهم تذمرت واضايقوا جداااا)

- بابا: هية الدنيا حصل فيها إيه؟

- ماما: طيب يا رباب (خالتي) حسابي معاكي بعدين... وأنتي ولا يهمك يا صابرين ... وطالما إنك مش مستريحة يبقى الموضوع انتهى.

- بابا: اسمعي يا صابرين.. إحنا عاوزين نفرح بيكي صحيح ...لكن عمرنا ما هنرميك الرمية دي!! ويهمنا رضاكِ واقتناعك.

(ملأتش غير دموعي بتجري على وشي ورميت نفسي في أحضانهم بعد ما دعيت ربنا يعوض عليا بعوض الصابرين).

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس

هدوم تفرس

عريس حبيب

واحد متزمت

مفروسة في العمرة

مفروسة في الميكروباص

عريس رغاااااااي