عريس من الماسينجر
just sent you a nudge Abd allah
ــــــــــــ
Abd allah says:
إيه يا ست صابرين … محدش يعرف يكلمك غير لما يبعت لك إيميل الأول
Sabreen says:
ههههههه.. مهو أنت مخدتش معاد سابق يا أبو ياسمين…
Abd allah says:
بقى كده…دي آخرتها
Sabreen says:
لا طبعا ..هوه أنا أقدر.. بس والله مشاغل وأنت عارف الشغل واللي فيه… أخبار هبه إيه؟ وياسمين عندها قد إيه دلوقت؟ وعاملين إيه في حر الكويت؟
Abd allah says:
كلنا بخير ولله الحمد وهبة كانت جنبي (بس راحت تغير لياسمين) وسوسو بقى عندها 7 شهور …أما عن الحر فالجو عامل زي نار الله الموقدة
Sabreen says:
ياساتر يارب ..ربنا يعافينا.. المهم أنكم تكونوا مبسوطين وبخير…وخلي بالك من هبة دي صديقة الطفولة…مش هوصيك عليها
Abd allah says:
هبة بنت حلال ومشفتش منها إلا كل خير…المهم إنتي معندكيش جديد؟
Sabreen says:
ههههههههه..جرى إيه يا أبو ياسمين…هوه أنت ما تشوفش وشي إلا لما تسأل السؤال ده!!!
Abd allah says:
والله نفسي أنا وهبة نفرح بيكي…أنتي بنت حلال وجدعه ولازم تاخدي واحد كويس يستاهلك
Sabreen says:
ربنا يخليك.. ربنا يجعلني عند حسن ظنكم
Abd allah says:
دي معرفة قديمة يا صابرين.. غير أن هبة بتعتبرك أخت لها بالزبط
Sabreen says:
ربنا يخليك…
Abd allah says:
إنما إنتي ما قلتيش مواصفاتك إيه؟
Sabreen says:
مواصفات إيه؟ هو غسالة!!!
Abd allah says:
هههههه أقصد إنتي عاوزة جوزك يبقى شكله إيه؟
Sabreen says:
6 سلندر لو سمحت… في إيه ياعم …إنت عندك حاجة ولا إيه؟
Abd allah says:
ممممم يعني..
Sabreen says:
ياسلام … وبتسألني ع المواصفات بتاع إيه.. ما تقول اللي عندك وخلاص… ولو يناسبني…هقولك بصراحة.. أنت عارف إننا إخوات
Abd allah says:
أكيد إخوات طبعا…مش عاوزة كلام… بس قولي الأول اللي عندك
Sabreen says:
احنا ح نتعازم ولا إيه … ما تقول بقى
Abd allah says:
مش يمكن ما يعجبكيش؟
Sabreen says:
وإيه يعني؟ وممكن أنا ما عجبوش…بقولك إيه أنا خلقي ضيق.. ما تجربش العرق التركي معايا!!!
Abd allah says:
لا يا ستي.. هوه أنا أقدر!! بس الولد زميلي في الشغل ومش عاوز إحراج
Sabreen says:
إحراج إيه وبتاع إيه!!! ما أتقدم له أنا أحسن .... مهو ده اللي ناقص!!!!
Abd allah says:
ينفع؟!
Sabreen says:
يا لهوي ع الشلل… ما تقول اللي عندك وخلصنا… ورايا حجات كتير عاوزه أعملها… ولا جيب هبة أكلمها
Abd allah says:
هبة بتنيم سوسو
Sabreen says:
هتقول اللي عندك ولا إيه النظام؟
Abd allah says:
أصل أنا بصراحة معرفش عنه كتير…هوه زميلي في الشغل بس ابن حلال وطيب
Sabreen says:
يااااااااه، معلومات خطيرة فعلا… سيبني أفكر
Abd allah says:
بجد؟
Sabreen says:
جد إيه يا أبو ياسمين ..هفكر في واحد كل معلوماتك عنه أنه ابن حلال وطيب!!! معلش في الكلمة يعني لما أنت متعرفش عنه كتير جايبه ليه؟
Abd allah says:
ده واد لقطة يا صابرين…وسيم ومهذب
Sabreen says:
إيه الشخصية الهلامية دي … يا عم قول تفاصيل .. مش معلومات عامة… عنده كام سنة- منين أصلا- بيشتغل إيه… كلام من ده
Abd allah says:
طب ما تقولي انتي عاوزة إيه الأول … عشان ما يكنش في احراج
Sabreen says:
يا ختييييييييييييييييييييييي، يعني أصوت وألم الناس عليا!!! هوه مين اللي متقدم لمين!!!
Abd allah says:
افهمي بس … أنا ما قلتلوش عليكي.. هوه قالي لو تعرف واحده كويسة دلني عليها … أصله نازل مصر شهر وراجع
Sabreen says:
سبحان اللي مصبرني عليك!!!… يعني عاوز تعرف أنا عاوزة إيه؟ لكن ما تعرفش هوه عاوز إيه… وفوق كل ده الشهر ده هيعمل فيه إيه ان شاء الله!! هيتعرف ولا يخطب ولا يكنش ناوي يتجوز ..ده جواز take away
Abd allah says:
يعني.. انتي مش موافقة؟
Sabreen says:
مش مسألة مش موافقة… إنما مفيش معلومات أصلا.. أنت جايب "مستر إكس" وتقولي إيه رأيك!!! فوق كده ما تعرفش حاجة عنه.. لأ وإيه عاوز تعرف معلومات عني، تقلش أنا اللي هتقدمه له!! وفوق كووووووول ده جواز الـ take away ما بيعجبنيش .. شهر مش كفاية للتعارف والارتباط الرسمي خالص يا عم عبد الله
Abd allah says:
الواد خسارة يا صابرين…طب اسألي عليه هبة
Sabreen says:
هو أنا هتجوزه استخسار!!! طب أقولك .. جمع عنه معلومات وبعدين قولي
Abd allah says:
كنا عاوزين نفرح بيكي
Sabreen says:
يا خويا ..أنا كمان عاوزة أفرح ولا ملييش نفس …بس الجواز ده رزق ومكتوب لي هتجوز مين … يبقى اشغل دماغي ليييه؟؟
Abd allah says:
معاكي حق
Sabreen says:
بقولك .. مضطرة أقفل وخلي بينا ايميلات …ماشي
Abd allah says:
ماشي بس المهم ما تكونيش زعلانة مني
Sabreen says:
وأزعل من إيه بس …انت زي أخويا …بلغ سلامي لهبة وياسمين وخلي بالك منهم … يالا سلام
Abd allah says:
سلام
(إيه حرقة الدم دي… أي نعم الراجل عاوز يخدم بس مش كده ... جميل أن الواحد يخدم معارفه لكن الأجمل أنه يكون واثق من خدماته دي وما لهوش لزمه الاحراج ده .. هو أبو ياسمين طير العريس لسوء تقديمه ليا ويمكن يكون الشاب مفهوش حاجة أهو نصيب وخلاص ... لكن فعلا حاجة تخنق أنه ينطلب مني رد وأنا معنديش أي تفاصيل).
أقرأ أيضاً :
مفروسة من التليفزيون
عريس في المصيف
تااااكـســـي