هــدوم تـفــرس

(الصيف دخل ومجبتش هدوم صيفي، فضيت نفسي في يوم ونزلت أنا وماما وسط البلد.. همه محلين تلاته دخلناهم والباقي على نفس الشاكلة... في الطريق لمحنا واحدة جايه علينا وفي نص البندانا بتاعتها فرده حلق شكل الهلال بدناديش، ولإن الغاليه أمي مش سهل عليها متعلقش زغدتني وقالت):

- بصي بصي، شبه شاهبندر التجار.

(ملحقتش أضحك لأنها لما قربت مننا لقيتها فاطمة- كانت زميلة ليا في الكلية - سلمت علينا بحرارة ولما لاحظت إني مش قادرة أمسك نفسي من الضحك قالت لي):

- عاجبك ده يا صابرين؟

- أيوة صحيح يا فاطمة ايه اللي انتي عملاه ده؟؟ ... عاملة زي بطلات شهرزاد في ألف ليلة وليلة.

- هنتريأ يا صابرين ... بعدين انتي اللي مش ماشية ع الموضة.

- مهو مش كل موضة تليق علينا.

- بلاش فلسفة وبعدين ما تفهميش في الموضة.. تسكتي..

- سكتنا ...اخبارك إيه.. اتجوزتي؟

- يسمع من بقك ربنا، من البكالوريوس وأنا مخطوبة، لسة بنجهز يا صابرين.

- ربنا يعينكم ويتمم لكم بخير.

(تبادلنا أرقام التليفونات على وعد بالتواصل بينا .. ومشينا نكمل فرجة على الفترينات ... ووقفنا قدام محل كان على يمينا شباب في أول العشرينيات كانوا بيتفرجوا على بنطلونات جينز.. وفجأة وأنا مركزة على الفاترينه تعالت ضحكات الشباب وفهمت أن أمي كلمت واحد منهم وقالت له):

- يا ابني ما بتلبسش حزام على البنطلون ليه ... حجر البنطلون واصل لركبك.. هتبرد يا ضنإيه.

(للحظة تمنيت إني أختفي وكان بودي أنكر معرفتي بأمي خالص... أمي المسكينة مكنتش تعرف أن دي الموضة بنطلونات ساقطة وتشيرتات واسعة .. وما نكرش أني كل ما أشوف واحد منهم كان بيجي لي إحساس إني لازم أرفع له البنطلون... لكن الولد كانت روحه حلوة بصراحة)

- يا طنط ده موديل البنطلون كده

- إيهيييييييي!!! والنبي ده إسمه كلام!! موضة إيه دي يا ابني اللي تخليك عايم في هدومك كده.

(الولد وأصحابه أخدوا الموضوع بصدر رحب وبداوا يهزروا مع أمي ويتريأوا على صاحبهم وسلموا علينا ومشيوا)

- يعني لازم يا ماما تعلقي!!

- يوه... يا بنتي مش الدين النصيحة!!

- أيوة مقلناش حاجة بس ده منعرفوش... وبعدين فكرك يعني مش واخد باله أن البطلون واقع..

- يا صابرين ده لما وطى ضهره كله بان!!!

- خلاص يا ستي... الحمد لله أنه قَدر إنك في مقام مامته... كنا هننضرب واحنا في السن ده.

- آل موضة آل....

(وفجأة لفت نظرها محل ملابس محجبات... وبان على وشها كل علامات القرف قالت بصوت عالي وبحده)

- إيه الهبل ده... ده حجاب ده!!!

(الظاهر إن قلة خروجات أمي كان له أثر سلبي عليا .. كنت عاوزة اخبيها أو ادريها في أي محل... لكن أعمل إيه اللي بيجري فيا ده دم مش مية .. بصراحه كان منظر المانيكان غريب وكنت متخيلة أن بنات المحل لبسوه كده كنوع من الفانتازيا .. المانيكان كان لابس حجاب دورين كل واحد منهم لون وفي جزء من الطرحة مرمي على راسها بشكل غريب .. أما المانيكان التاني فكانت لابسة طرحة "إسبانش" وودانها الاتنين طلعت من الحجاب حاجة أشبه بـ "منقرع وخوفو" .. حبيت أهدي والدتي قبل ما تدخل لموظفين المحل وتكلمهم فقلت لها):

- يا ماما ده مش حجاب ده أي كلام كده عشان يلفتوا نظر الناس مش أكتر... فانتازيا يعني.

- والله، طب كويس أنا خفت ليكون حقيقي.

(ملحقتش أمي تكمل الكلمة لقينا في وشنا شابة حليوه من سني لابسه طارحة تريكواز واظاهر إنها محجبة جديد وصِعِب عليها أن "الحلق" ما يبنش من الحجاب فشبكته على جنب راسها مش عارفة ليه أول ما شفتها جت في ذهني "فضة المعداوي" في مسلسل "الرإيه البيضا"..... كنت متوقعاها تصرخ وتقول: واد يا حموووو التمساحة ياللااااااااا".... بصيت على امي لقيتها بتزغر لي حتة دين زغرة وقالت):

- فانتازيا برضو!!

- وأنا مالي ... ولا أعرفها.

(بصراحة لبس غريب بمناظر أغرب ..لا إحنا مشينا على الموضة ولا إحنا مشينا في حالنا.. مش عارفة الناس محيره نفسها ليه ما تلبس محترم يناسب دينا وتقاليدنا محيرين نفسهم على إيه، يارب استرنا دنيا وآخره).

حلقات سابقة :

مفروسة من التليفزيون

عريس في المصيف

تااكسي

عريس من الماسينجر

دماغ تفرس