دمـاغ تـفـــرس

فضيت علينا أوضتنا في الجرنان أنا ورانيا زميلتي، فانتهزت رانيا الفرصة وقربت مني تكمل لي حكاية العريس اللي متقدم لها.. واللي قالت لي مقدمة عنه إمبارح..

- زي ما قلت لك يا صابرين .. وكيل نيابة، ومستواه كويس وشقته في مدينة نصر ... م الآخر كده مستريح

- كل اللي انتي بتقوليه ده كويس ... بس المهم اخلاقياته أنتي لغاية دلوقتي مقلتيش حاجة غير مواصفات خارجية.. المهم اللي جوا ... المضموووون يعني

- هو مش بطال.. ولو إن فيه حجات مقلقاني كتير...

- يا بنتي فكرة إنه لقطة ومستوى والكلام ده ما تمشيش معايا

- بس تمشي معايا أنا!!... أنا عندي 29 سنة عوزاني أتجوز امتى يعني ؟؟ وبعدين أنا وأنتي عارفين كويس إن كل ما الواحده فينا بتكبر ... فرصها بتقل

- إيه النباهه دي ... يا أم العريف مش موافقاك في الكلام ده ..... لأن كل واحد بياخد نصيبه في الآخر ولو ربنا كاتب لك تعنسي .. يبقى هتعنسي من وانت في العشرين مش 29!!

- أنا ماليش في الكلام النظري بتاعك ده .. أنا ليا مواصفات وسن بيحكمني... والعريس مش بطال ... شغال يعني

- قبل ما تحكي لي عنه ... لازم تشيلي فكرة السن دي من دماغك .. لأنها لابسه دماغك ومش هتعرفي تاخدي قرار صح

- يا بنتي مش كده .. الفكرة كمان إن أمي وأبويا كبار في السن ولو قعدوا لي السنة دي مش هيقعدوا لي السنة اللي جإيه .. فاتجوز في حياتهم أحسن

- إيه الغباوة دي يا رانيا.... أنتي صحفية وأدرى واحده باللي بيجرى حواليكي ... ازاي تفكري بالطريقة دي.

- مالها الطريقة دي .. أولا العريس مش وحش أوي .. أهو أحسن من مفيش م الأخر كده، وظروفه مناسبة وأهلي موجودين .... ده اللي أنا بفكر فيه.

- جرى إيه يا رانيا هتتجوزي استخسار!! ولا هتاخدي العريس بدل ما حد تاني ياخده!!

- ييييييييييي ، بطلي فلسفة فارغة

(يدخل علينا المكتب زميلنا الثالث... فتلتزم رانيا الصمت، والتزم أنا مكاني وأنا في منتهى الدهشة.. معقول نفكر كده؟؟ معقول الواحده تتجوز لمجرد أن دي أحسن فرصة جت لها حتى لو ماكنش في توافق بينهم، أو لأنها خايفة تتجوز بعد وفاة أهلها!!... معرفتش أكتب ولا كلمة في التحقيق اللي كنت شغاله عليه، وأحقق في إيه... دي رانيا تمثل ليا قضية قومية فكرية اجتماعية كومبلكس)..

بعد كام ساعة طلبت من رانيا نخرج ونتغدى في أحد المطاعم الشعبية اللي أخدت عليها معدتنا..

- يا رانيا أنا مش عجباني طريقة تفكيرك.. أنتي نفسك كنتي بتقولي أن في حاجات قلقاكي في شخصية العريس ... يبقى تكملي ليه؟؟

- أكمل ليه؟ إيه السؤال الساذج ده!! قلت لك عاوزة أتجوز في حياة أبويا وأمي، وأن الراجل فعلا لقطة.

- لقطة من أنهي ناحية؟

- مهو أنا قلت لك .. مستواه ومنصبه محدش يختلف عليهم ... لكن بصراحة أنا قلقانة من حاجة تانية خالص

- خير؟

- حسيت من كذا موقف أنه ما بيعرفش يتصرف في حاجة من غير ما يشوار الست الوالدة، يعني حتى لما جه يحدد معاد الزيارة التانية سأل مامته مع أنها مش جايه معاه!

- يا سلام!

- أي والله.. ده غير أننا لما رحنا نشوف الشقة قال لبابا: الشقة دي متشطبة على أيد ماما من أول النقاشة لحد لسيراميك، ده غير لما جم يتكلموا في الشبكة والعفش وكده ... قال لبابا أنا ماليش دعوة، ماما هتيجي تتفق مع حضرتك

- هو والده متوفي؟

- لا عايش بس واضح كده أنه مُهمّش

- مش هو بس اللي مهمش، أنتي فكرة الجواز هي اللي مسيطرة عليكي، ومش عارفة تفكري كويس ابدا

- مهو كل صحابي وزمايلي اتجوزا وبقى عندهم عيال

- ده مش مبرر أن الواحد يرمي نفسه في جوازه عارف نتايجها مسبقا

- اقعدي بقى سممي ساندوتش الفول اللي باكله

- يا خفة، إيه يا بت المرح ده!!... ولك نفس تهزري!! ده أنتي خليتي الدم يغلي في نافوخي من الصبح

- ويغلي ليه؟ أنتي غريبة أوي

- بتهزري!! يا بنتي كلامك ده تقوله واحده مش متعلمة... مش أنتي..

- ليه ؟ مهو كلنا في الآخر بنات وكلنا لينا احتياجاتنا .. عاوزة يبقى لي بيت وجوز وعيال

- مش عيب بس مش على حسابك، ومش هتبقى عيشة طول ما أنتي جايه على نفسك للدرجة دي... وبعدين يا حلوة هتعملي إيه لو أتجوزتي في حياة أهلك ورجعتيهلم في حياتهم كمان!!... ومش بعيد يكون في بطنك ولا على كتفك عيل!!

- ييييييييي يا صابرين أنتي بقيتي مملة.. ما كنتش شورى دي... سيبيها على الله.

- أنا بكلمك كده من خوفي عليك... مش لأي سبب تاني

- طيب وفري بقى البقين الحمضانين دول ... ويالا نمشي، هنتأخر ع الشغل

(وفرت الكلمتين فعلا، لكني اقتنعت بعد كده أن خياراتنا بأيدينا وأن فكرة النصيب مرهونة بينا إحنا.. ومع إني قفلت بقي ووفرت الكلمتين زي ما قالت رانيا لكن مقدرتش ما أتابعش أخبارها .. واللي انتهت بطلاقها وهي حامل في التالت بناء على خناقة مع حماتها إياها اللي طلبت من ابنها تطليقها كنوع من التربية للي ما إتربتش في بيتها)!.

حلقات سابقة :

مفروسة من التليفزيون

عريس في المصيف

تااكسي

عريس من الماسينجر