تاااكسي

(اتفقت مع زميلاتي في العمل إننا نتجمع يوم الاجازة في كافية بعد صلاة المغرب، ونزلت أركب عربيتي اللي مسمياها "البعكوكة" وفوجئت بيها مش راضية تدور ... سبتها عند عم سيد الميكانيكي اللي قصاد بيتنا واللي اعتبر عربيتي زبون دائم عنده)..

وقفت تاكسي وحاولت "أستنضف" وأخيرا وقف لي تاكسي ...

- المهندسين؟

- فين في المهندسين؟

- شارع شهاب.. أول سوريا

- اتفضلي

(كان السواق شاب مشغل أغنية للست أم كلثوم.. أفتكر إنها كانت "بعيد عنك".. وبدأت أسرح مع الأغنية وكلماتها وفي الزمن الجميل زمن السلطنة.. وفجأة انقطع الصوت.. بصيت ع السواق لقيته بيبتسم لي في المراية وقالي):

- للدرجة دي مش سمعاني

- آسفة، مخدتش بالي... خير؟؟

- كنت بسألك أدخل من الدقي ولا سفنكس؟

- أي حاجة.. مش هتفرق

( ورجعت أتفرج ع الناس م الشباك ... لكن السواق رجع وقطع سرحاني من جديد)

- تحبي أشغل لك الست ولا حاجة تانية؟

- مش مهم

- أصل انا شفتك سرحانة مع الأغنية

(لقيته هيبدأ يستظرف وهيبدأ المرح يشر منه.. فقلت أقصر الشر ونقفل ع السيرة)

- لامش فارقة، خد راحتك

- راحتي!! بايني مش هرتاح ... إنت عارفة إني شغال ع التاكسي ده من الساعة واحدة بالليل.. عشان أدفع لصاحبه فلوسه..

(وبعدين بقى .. وانا مالي بالموال بتاعه ده... مالوش قافلة ده)

- ويقولك الشباب لازم يجتهد ويتعب.. عليا النعمة أنا ما برجع بيتي إلا على وش الفجر عشان أروح الشغل... أصل أنا موظف، ما يغريكيش يعني إني شغال على تاكس.

(طب وده أقفله إزي ده بقى!!... استحمله وخلاص، شويه وهوصل مش مستاهلة أنزل وأركب تاكسي تاني ... خاصة إني في أخر الشهر)

- حاسب ... خلي بالك من الطريق

- ما تخافيش ... ده أنا واد جدع وأعجبك أوي

(تعجبني!! ده اللي ناقص)

(إلتزمت الصمت وحطيت سماعات الموبايل في وداني مع إني مشغلتوش... بس قلت يمكن يسكت شوية... فضل ينده وينادي وأنا عايشة دور الأطرش.... لغاية لما وصلت لشارع شهاب ... نزلت من العربية ومديت إيدي أحاسبه... لقيت الخفة ساق هو كمان "الحول" وراح ماسك إيدي بدل ما يمسك الفلوس... طبعا اتخضيت ورحت ساحبة إيدي بسرعة ورميت له الفلوس ع الكرسي اللي جنبه ورحت منولاه في دماغه بالشنطة بتاعتي اللي كانت أقرب سلاح قريب لإيدي.. وألحقته بشوية شتايم على ما أوسوم كده.. ولقيته فر بالتاكسي فرار الحُمر المستنفرة فرت من قصورة... ده إية القرف ده ... لا أنا لابسة محزق ولا ضيق ولا لابسة كت وشورت... بس يالا ساعات النفس بتحن لحتة طرشي برضو).

أقرأ أيضاً :

مذكرات بنوتة مفروسة..حصرياً

مفروسة من التليفزيون

عريس في المصيف(2)

تاااكسي(3)