مفروسة من التليفزيون
بعد أول يوم صيام في زمهرير رمضان... دار الحوار التالي بين أبي وأمي وأنا..
- يااااااااااااه .. الحمد لله ... الفطار النهاردة جميل اووووي ... تسلم إيديك يا أم صابرين
- الله يسلمك .. بألف هنا وشفا
- إلا الأكلة دي اسمها اية؟
- آه يا ناااااري ...أكلت وشبعت وهضمت.. وجي تسأل أكلت اية؟... قومي يا صابرين شيلي الأكل قبل ما نتشل من أبوكي
- سلامتك م الشلل يا حبيبتي.. كل ده عشان سألك عن اسم الاكلة اية؟
- بيهزر يا حاجة
- لا والله الأكلة دي اية؟ أول مرة تعمليها؟؟؟
- ياختيييييييييييي... هقوم أصلي بدل ما أتشل جنبك
- وانا هعمل الشاي واخلص المواعين
( وأول ما لمحت أمي خرجت من الأوضة عشان تصلي )
- ده اسمه كلام يا حج؟؟ بقى الست واقفة على رجلها م الصبح عشان تحضر لنا فطار ومستنية مننا كلمة حلوة ... تقوم تقهرها كده!!
- انتي نكدية زي أمك ... قومي اعملي الشاي
(قلت بكل خفة ودلع وتداركا لأي عواقب وخيمة)
- أمرك يا باشا ... حالا
(جبت صينية الشاي وبدات أقلب السكر في الشاي..)
- اتفضل يا والدي العزيز... على فكرة اللي بتشربة ده اسمه شاي... عشان ما تسألنيش شربت اية بعد ما تخلص الكباية
- يا سلام عليكي يا صابرين ما تفوتيش فرصة إلا لما تنخوري عشان أمك تمسك في خناقي
(ردت عليه أمي بكل حدة وقمصة )
- ع العموم أنت كنت بتفطر داود باشا .. عشان لما حد يسألك في التراويح فطرت اية
- هات الريموت يا بابا ... لما نشوف التليفزيون جايب ايه في رمضان
(بين كل قناة وقناة كانت المأساة.. الآن نترككم مع المسلسل الخليجي جروح .. دموع وآلام ... العيون الباكية... دموع في عيون بجحة)
- ايه النكد ده يا صابرين ده أنا هعيط من اسماء المسلسلات
- ههههههههه أمال لو تابعتيها هيحصل اية؟ استني هحول تاني
(ويستكمل التلفزيون برامجه: نترككم مع برنامج ... اوعى تفكر.... اكسب معانا .. هلا بالجوايز)
- استغفر الله ...عاوزين يعودوا الناس على انها تلغي تفكيرها وتكسب بالساهل .. ربح سريع
- يا سلام على حكمتك يا والدي
- حولي تاني ياصابرين ... سيبي الاعلانات دي يمكن بعدها حاجة عدلة
(ويتابع التلفزيون اعلاناته... انصر نبيك من موبايلك ... اتصل على تلات تلاتات ... واختار رنتك اللي هتنصر بيها نبيك)
- هههههههه حتى دي ياربي ... هنصر نبينا برنه!!
- حتى الدين دخل في الارباح والتجارة ... حولي تاني
(سهرة مع فنان ... وضيفنا النهاردة (....) .. اهلا وسهلا بيك.. قبل ما نسألك عن آخر أعمالك.. فطرت اية النهارده؟؟)
- ايه الاسنخفاف
- واحنا مالنا اكل اية ولا صام ولا ماصمش
(الفنان: والله انا في الحقيقة انسان بسيط اوي في حياتي ... يعني ممكن أفطر على علبة تونة .. مكرونة مسلوقة ... ما بتفرقش معاية بصراحة)
- اقلبي يا بنتي ... دي ناس فاضية
- انا مش لاقية حاجة ممكن نتابعها، مفيش غير فوازير ومسلسللات ومسابقات ولقاءات مع فنانيين ... مفيش اي برنامج ديني بعد الفطار
- الصراحة بيجيبوا البرامج الدينية قبل الفطار ودي محدش بيتابعها
- انا نفسي أفهم اية علاقة رمضان بالمسلسلات والاعلانات والكلام ده
- والله ما اعرف... اية ده .. ده فيه رقصات كمان
(والدي في محاولة لاستفزاز أمي)
- فين ده؟
- وانت بتبص ليه؟ أنت مالك؟
- مش انتي اللي قلتي !
- أنا اقول براحتي .. انت اللي ما تبصش ... بقولك ايه ما تقوم تجيب لنا طبقين جيلي؟؟
- أنا اللي أقوم؟؟
- وماله؟ أنا بقولِك تجيبهم مش تعملهم .. التلاجة قريبة... قوم بققققققى
(والدي في محاولة منه لتلطيف الجو)
- على فكرة انت أمك كانت دعيالك... مكنتيش هتلاقي زوج متعاون كده
- استغفر الله .. يا حج كان زماني جبت الطبقين واكلتهم بدل اللوك لوك ده
- لوك لوك!!واية ده كمان؟
- بص انت بتعمل كده عشان أقوم انا في الاخر اجيب الجيلي ... ماشي يا سيدي .. هقوم اجيبهم
(بعد دقايق من التحويل بين القنوات)
- بص انا عرفت اية اللي يناسبنا يا ماما وميشيلناش ذنوب
- ها؟ خير؟؟
- اهو .. ده
(يعلو صوت التلفزيون بأغنية مسلسل كرتون "بكار" للأطفال غناء محمد منير.. أصحابه كتير كتير قده وقدهم .. طابور الصبح تضرب أجراسه تلمهم.. وموسيقى نشيد بلادي بتجري في دمهم.. من قلبه وروحه مصري والنيل جواه بيسري ...)
- أخرتها هنتفرج على بتاع الأطفال
- هو انتي لسه صغيره يا صابرين
(وما هي إلا دقائق حتى وجدت أبي وأمي في سبات عميق وهما على الكنبة وبدأت أصوات الشخير في الإرتفاع وطبعا السبب البرامج المملة في التليفزيون.. لكني لحقت نفسي قبل ما أعمل زيهم وقفلت التليفزيون.. وقررت ما أفتحوش تاني في رمضان.. ربنا يتقبل صيامنا).