لحد أمتى هانحضن المخدة؟
منذ أيام بدأت حملة برسائل SMS على أجهزة المحمول تدعو إلى تزويج الفتيات والشباب تحت عنوان "لحد إمتى هنفضل نحضن المخدة"، في إشارة إلى افتقاد الشباب للعلاقات الحميمية التي لا يمارسها غير المتزوجين، لتنتقل بعدها الحملة إلى الفيس بوك مع إنشاء مجموعة تحمل نفس الإسم.. لكن المفارقة الأكبر أن مؤسستي الحملة فتاتان!
وكما أثارت الحملة جدلا على أجهزة المحمول، أثار نقلها إلى العالم الإفتراضي على الفيس بوك نفس الجدل بعد إنشاء المجموعة التي حملت نفس الاسم "لحد إمتي هنفضل نحضن المخدة"، حيث قالت مؤسستها "ضحى حلمي" أن "الحملة كانت من البداية رسالة موبايل وسخرية من الوضع الحالى وكانت عبارة عن هزار فى هزار.. وبعدين قررنا ننقلها للفيس بوك.. يمكن تؤثر أكتر".
وجاء في وصف الجروب التي انضم لها 800 شخصاً حتى الآن: "وبقى فى النهاية الحل أن كل واحد وواحدة يحضنوا المخدة ويناموا وخلاص هيعملوا إيه يعنى.. يا إما يتجوزوا أي جوازة وكل واحدة تقبل بأي واحد أيا كان علشان تسيب المخدة بقى، وكل واحد يشوف أي واحدة يمشى معاها يومين ويطلع الكبت اللى جواه وتبقى كده الجريمة الكاملة.. الطرفين ضاعوا.. البنات أتجوزوا أى جوازة ومش حاسين بسعادة لا بالعكس دول كانوا سعداء قبل كده، والشباب مشيوا فى الطريق الغلط".
البنات بتحضن الدباديب
ورداً على ما جاء في الجروب قال:
أسماء: أنا مستاءة جداً من حصر موضوع الزواج في فكرة الجنس والرغبة والكبت.
عبد الله: أنا عارف الحل.. نتجوز جواز المسيار!
مروة: عندكم حق إن دي غرائز طبعية ربنا خلقها فينا كبشر.. بس أنا شايفة إن مش هي دي أساس العلاقة بتاعة الزواج، وإلا ما كنش هيبقي فيه عاهرات ولا بنات ليل".
رحاب: ده كلام أهبل.. إحنا فعلاً عندنا مشكلة منعكسة على الشباب ونسبة العنوسة عند الولاد والبنات عالية جدا، إنما ده مش مبرر إن حملة الجواز تبقى بس علشان ما نحضنش المخدة.. ففي رأيي أن استعمال الجنس كمبرر وحيد للزواج وخصوصا لما الدعوة تيجي من بنات ده معناه أن البنات دي عندها فراغ وأفلست معندهاش أي حاجة لا شغل ولا حياة تشغلها ولا فكر ولا أي حاجة.
ماجد: عايزين مبادرة يا جماعة.. الجروب فكرتها كويسة لكن الكلام ده بنسمعه كتير واقتراحات وحوارات ونقاشات وندوات.. إلخ، فين بقى المشكلة اللى لازم نحددها وبعدين ندور على حلولها.. لأن بدون تحديد المشكلة هيبقى كله كلام فى الهوا لا هيقدم ولا يأخر وكأنك يا أبو زيد ما غزيت.
منى: أنا عايز أتجوز آه.. بس عشان بناء أسرة وبناء بيت وحياة جديدة. مش علشان تفريغ الكبت.. وبعدين اللي بيحضنوا المخدة هما الولاد، البنات بتحضن دباديب!
بسمة: أنا شايفة إن الحل يكمن في تقليل الأهالي من المغالاة في الطلبات.. مش ممكن كل الطلبات دي مرة عشان العادات والتقاليد.. ومرة عشان فلان ولا فلانة عمل كده فلازم نعمل زيه؛ لأن مش كل الناس زي بعضها وكل واحد وظروفه ولا أنتوا هتفرحوا لما ولادكم يفضلوا قاعدين جمبكوا العمر كله".
أحمد: الناس أغلبها بتفكر إزاي تتجوز.. مش واخدين بالهم إن الحياة الزوجية بقت هي المشكلة.. يعني دلوقتي الأهالي بيتساهلوا المهور والطلبات.. لكن المشكلة بقت في مصاريف البيت الشهرية.. أجدعها شاب دلوقتي بيقبض 500 جنيه.. يصرفهم إزاي على بيته وعياله.. أنا عن نفسي حاسس إني هاحضن المخدة لحد يوم القيامة.
* وأنت/أنتي تفتكروا لحد إمتى هانفضل نحضن المخدة؟!