فاكر أول مرة مصيف؟
"كان يوم ميتنسيش، لحد النهارده لسه فاكراه، وكان في رأس البر، قبل ما تختفي من الوجود في ظل وجود مارينا والساحل ، والدتي كانت محضره لنا السندوتشات من البيت و كانت أول مرة نأكل فيها سندوتشات بسطرمة بالبيض، وجبنة رومي، والغدا كان عبارة عن محشي ورق عنب وفراخ محمرة، وكان يوم خرافي جداً، وطبعا كان يوم واحد بس"..هكذا ردت منى سعد على السؤال وكأنها تعيشه الآن..
"كانت هادية جدا والناس فيها يتعدوا علي الصوابع"، هكذا تذكرت هاله مصيفها في مرسي مطروح مع عائلتها في أجازة الصيف من كل عام، عندما كانت الناس لا تعرف عنها سوي مشهد ليلي مراد وهي تجلس علي صخرتها بشاطئ الغرام، أما الآن فتصفها بأنها أصبحت مدينه صاخبة مزدحمة مثل القاهرة والإسكندرية.
محمد فخري يتذكر مصيفه الأول بأشياء أخرى:" ده كان يوم تاريخي وأقنعنا والدي به بعد واسطة من كل الشارع تقريبا، ووقتها كان واحد صاحبي طالع مع عائلته كلها ومأجرين ميكروباص وواخدين الأكل معاهم وبالعافية وافق وطلعنا، وكانت الوجهة إلى بلطيم لأننا من محافظة كفر الشيخ، ولعبنا وجرينا وفرحنا وكانت أول مرة أشوف البحر".
سلمى حامد عاشت تجربة مختلفة مع مصيفها الأول وهي واعية لأنها ذهبت في رحلات عديدة للمصيف قبل أن تفهم معنى المصيف وعرفت ذلك من صورها وهي صغيرة على الشاطيء بالبكيني وبجوارها ابن خالتها بالمايوة أيضا ولا مانع من بعض القبلات والأحضان الطفولية..
أما مصيفها الأول الذي تتذكره فكان في الأسكندرية أيام ما كانت نظيفة وجملية وغير مزدحمة، حملها أبوها على كتفه ودخل في عرض البحر وظلت والدتها تنادي عليهما وهي مرعوبة إلا أن سلمى كانت في غاية السعادة والفرح، لتقرر بعدها تعلم السباحة وتصبح ماهرة فيها ولكن بالمايوة الشرعي وليس البكيني"..
"هو مكنش مصيف قوي يعني كان يوم مختلف، قرر والدي العزيز أننا نغير جو واخترنا مدينة فايد لأننا من مدينة الاسماعيلية، واتفقنا مع خالتي وأولادها ولسه فاكر أن مكنش عندي عوامة ولا أي حد من ولاد خالتي، فكنا بنروح لحد أول المية نبل رجلينا ونطلع تاني وونجري ورا بعض مبسوطين جدا، والمايوة الحقيقة كان عبارة عن فانلة حمالات وشورت عادي يعني كأننا في البيت بالظبط، وكان أجمل مصيف عشته بانطلاق". بابتسامة دائمة حكي أحمد حسن حدوتة مصيفه الأول..
وانت فاكر أول مصيف كان فين؟، ورحت مع مين؟، واستمعت به ازاي؟
أول مرة عرفت الجنس
فاكر اول مرتب
فاكر اول شريط اشتريته