المقطورة .. مع السلامة

اليوم هو اليوم الرابع على التوالي لإضراب سائقي سيارات النقل الثقيل احتجاجاً على قرار الحكومة بإلغاء "المقطورة" بحسب ادعاء الحكومة بأنها السبب الرئيسي في حوادث الطرق، إلا أن هذا الإدعاء لم يقتنع به أصحاب وسائقي سيارات النقل بزفتى بمحافظة الغربية وهي تعد من أكبر قلاع النقل على مستوى الجمهورية مما دفعهم للمشاركة في الإضراب العام الذي شمل كافة محافظات ومدن الجمهورية..

الإضراب نتج عنه اعتقال قوات الشرطة لـ 13 فرد من أصحاب وسائقي السيارات، مما أدى إلى تجمهر أسر هؤلاء المقبوض عليهم بالإضافة إلى عدد كبير من أصحاب السيارات والسائقين واعتصامهم أمام نيابة زفتى التي تقع على أطراف المدينة على الطريق بين بركة السبع وطنطا، مما أدى إلى قطع الطريق وعند محاولة الأمن تفريقهم بقنابل الغاز وإطلاق الرصاص المطاطي لتفريق المعتصمين الذين ردوا على طلقات وقنابل الأمن بالحجارة قام المعتصمين بحرق عدد من الإطارات ووضعها على شريط السكة الحديدي مما تسبب في تعطيل حركة القطارات لمدة ساعة كاملة مما دفع الأمن إلى التراجع لامتصاص غضب المتجمهرين الذين استمروا في الاعتصام أمام النيابة منتظرين الإفراج عن زملائهم الذين اعتقلوا ولم يتم الإفراج عنهم حتى الآن.

إزاي بتترخص؟

فرج بدوي، سائق نقل وأحد المشاركين في الإضراب، يقول: "إحنا عاملين إضراب عام، كل السواقين وأصحاب العربيات موقفين عربياتهم لأن الحكومة عايزه تلغي العربيات المقطورة وتشغل بدلها التريللات، والمقطورة بـحوالي 250 ألف جنيه، ومعظم أصحاب العربيات عليهم أقساط وماضيين شيكات ومديونين، الناس دي هتدخل السجن لو اتلغت المقاطير فجأة، لأن المقطورة مش هاينفع تتباع غير خردة بالكيلو ومش هاتجيب ربع ثمنها، يعني الخسارة هتبقى حوالي 75% من سعر المقطورة طيب الباقي هايتسدد ازاي؟".

وعن محاولة إجهاض الإضراب من قبل الأمن يقول: "الأمن حاول منعنا من الإضراب بتهديدنا أنه هيعتقل أي حد هيشترك في الإضراب، ولما عملنا الإضراب كانوا بيفكو نمر العربيات لإجبارنا أننا نروح نستلمها ويخلونا ننهي الإضراب، ده غير المخالفات اللي بتتلفق لينا والعربيات واقفة مكانها".

ويضيف: "الحكومة بتقول إن القرار ده من سنتين وباقي منه سنتين وإحنا أول مرة نسمع الكلام ده، وعلى أي أساس بيسمحوا بترخيص العربيات المقطورة في المرور لحد دلوقتي؟ المفروض لو القرار صادر من سنتين يبقى يوقفوا الترخيص من تاريخ صدور القرار ويعرفونا ويمدوا لنا في المهلة لكن أنهم يطلعوا القرار فجأة ده هيبقى خراب بيوت لناس كتير".

ياعزك يا عز

سائق آخر هو أحمد عبد اللطيف يتحدث عن المتضررين قائلا: "العربية والمقطورة بيشتغل عليهم حوالي 5 أفراد وكل واحد بيبقى في رقبته أسرة وفاتح بيت، ولو المقطورة اتلغت فجأة وأصحاب العربيات فلسوا الناس دي هاتروح فين وبيوتهم وعيالهم ياكلوا منين ؟، كدة يبقى الناس دي اتحكم عليهم بالتشرد وهيترموا في الشارع".

ويكمل الحديث سعد حلمي، قائلا: "العربية لما المقطورة تتلغي مش هتشتغل هي كمان لأن المرور مانع التعديل في محور العربية (طول شاسيه السيارة) ، لأن الديل (مقطورة التريللا الجديدة) بيتم تركيبه على طول أقل من طول صندوق العربية، فلازم يتعدل المحور ويتم تقصيره علشان يبقى مناسب لتركيب التريلا، لكن حتى ده ممنوع يعني العربية والمقطورة هيترموا أو يتباعوا خردة برخص التراب لأحمد عز، وده يعني إن أصحاب العربيات هيتخرب بيوتهم واللي عنده 5 عربيات هيبقى عنده عربية واحدة يعني لو بيشغل 25 فرد عنده هيشغل 5 بس والباقي هيتشرد خاصة يعني الناس دي يا تسرق يا تشحت".

أما محمود إبراهيم، صاحب إحدى السيارات، فيرد على استفسار حول إمكانية تشغيل السيارة بدون مقطورة بقوله: " المقطورة مينفعش تشتغل بدون مقطورة لأنها مش هاتعوض المصاريف اللي بتتصرف، لأن عندنا مخالفات بتتدفع ، وكمان الميزان وده بيبقى مش أقل من 500 جنيه على كل حمولة ، والكارتة ودي مش أقل من 100 جنيه في اليوم، غير أجور الناس اللي بتشتغل على العربية، وغير أقساط العربية لو عليها أقساط، ومصاريف العربية نفسها من زيت لجاز لصيانة، والعربية لو هتحمل 40 متر بالمقطورة يبقى هتحمل 10 متر يعني ربع الحمولة فمش هينفع تشتغل ومش هتكفي مصاريفها دي كلها، يعني إحنا بنشتغل وبندفع للحكومة كل شهر حوالي 15 ألف جنيه مصاريف من كل عربية ومش عجبهم وعايزين يوقفوا حالنا".

الحادثة

عن أسباب الحوادث وإن كانت المقطورة المتهم الرئيسي أم لا يقول بكر بسيوني، سائق: "معظم الحوادث السبب فيها عنصر بشري يعني عيب من السواق أو من الملاكي، لكن المقطورة عمرها ما بتفك لأن المقطورة بيبقى فيها اكتر من وسيلة أمان، المقطورة بتبقى متركبة في العربية عن طريق بينز (مسمار حديد رئيسي) ، وسلسلتين حديد من الطرفين بيتحملو اكتر من 200 طن، و 2 سلك واير بيجر اكتر من 100 طن، وكمان المقطورة فيها نظام فرامل ذاتي أول ما بتفك من العربية بتفرمل ومبتتحركش من مكانها، أما التريلا بيبقى ماسكها بينز (مسمار) واحد بس، وأنا بسوق على الطريق من أكتر من 25 سنة عمري ما شوفت مقطورة انفكت من العربية غير مرة أو أتنين بس".

ويكمل: "وكمان المقطورة بتمر على فحص هندسي من المرور قبل ما تشتغل ولو فيها أي عيب أو أي وسيلة أمان ناقصة مبتشتغلش، ومعظم الحوادث بتبقى من عيوب في الطرق والرصف لأن مفيش في مصر اهتمام بالطرق أصلا رغم أنهم بياخدو مننا ملايين كل شهر المفروض يتصرف بيها على الطرق وتتحسن لكن مفيش أي اهتمام بالطرق ودي أكبر سبب في الحوادث، ومن يومين كان فيه أكتر من تريلا عاملة حادثة ومقلوبة بسبب عيوب في الطرق".

هنفضل مضربين

عن مطالب السائقين واستمرار الإضراب يقول أحد السائقين: "إحنا هنفضل مضربين ومفيش عربيات هتتحرك ولا هتشتغل لحد ما مطالبنا تتنفذ وهي مد المهلة إلى 5 سنين على الأقل، والسماح بتعديل محور العربيات، وتعويضات بدل المقطورة والعربية اللي هيتباعوا خردة برخص التراب، وكمان من ضمن مطالبنا تقليل فترة استبدال رخصة السواق من درجة تانية إلى درجة أولى لأن الفترة الحالية هي 3 سنين بين كل استبدال واستبدال، إحنا عايزنها تقل على الأقل تبقى سنتين أو سنة ونصف لأن سواق النقل مينفعش يكون أقل من درجة أولى على حسب القانون".