يا تري أنت فين يا أبونا
تمت أحداث هذه القصة في أواخر عام 2007 لما جالي تليفون من واحد إسمه بيتر في شركة.........(مشهورة جدا جدا بالمناديل..عروستي)..وقالي عندك إنترفيو في 6 أكتوبر
طبعا أنتوا عارفين من الحلقة اللي فاتت أن 6 أكتوبر بالنسبة بتفكرني بذكري الشغلانة بتاعة الراجل السوداني
المهم رحت هناك في الميعاد وعامة كانت أول ملحوظة سريعة بالنسبة لي أسماء الناس اللي شغالين هناك من كلامهم مع بعض في التليفون أو في المكاتب..كلها أسماء قبطية وش..ما علينا ..ماليش دعوة بالحوار ده..أكيد صدفة
بدأنا الإنترفيو وكانت الوظيفة في ال
hr
قشطة..دراسها تخصص فرعي بجوار التخصص الأساسي سياسة
عم بيتر ده بدأ يدردش معايا دردشة عادية..وماله كنت برد بثقة وإقتدار لأني كنت إكتسبت خبرة طويلة جدا في الانترفيوهات من 2005-
2007
لقيته بيسألني أنت بتدخن..قلتله لأ.
بتشرب شيشة..قلتله لأ..بكره ريحة الدخان..من الاخر أنا صديق البيئة
طب بتروح كنيسة إيه
ساعات بروح كنيسة العذراء جاردن سيتي وساعات ممكن أروح مع أي حد من صحابي أي كنيسة إنجيلية ولو فيه كاثوليك مفيش مشاكل برضه
لقيته بيقولي بتتناول يا مايكل
اللهم طولك يا روح..وده ماله بس بالشغلانة.لأ يا سيدي بقالي فترة مرحتش
طب مين القسيس اللي عندكوا
لأ بقي هو أنا دخلت فين بالضبط..ده أنا لو الكنيسة نفسها محدش حيقعد يلت ويعجن معايا كده..قلتله في أبونا كذا وكذا
المهم بيتر ده جاله تليفون وسابني في الأوضة شوية وكان قدامي كومة سيفيهات مرصوصة علي المكتب،ومش عارف إيه اللي شجعني وجرأني أني أقلب في السيفيهات دي بسرعة قبل ما أجي،وفعلا لقيت اللي في دماغي
السي فيهات تقريبا كلها اللي قلبتها أسماء قبطية لا تقبل القسمة علي إتنين حتي يعني ما بين كريستين لماريان لفيفيان لجورج لبيشوي..وهكذا
قلت في سري:كده يبقي البطريركية فتحت فرع جديد في اكتوبر
رجع بيتر بعد كده الأوضة وكنت رجعت السيفيهات مكانها ولقيته أخيرا فتح معايا في إنترفيو الشغل شوية وبدأ يسألني عن فكرتي عن
hr
والحمد لله جاوبته واتكلمت معاه بتمكن..مش خبرة بقي..أصلي بقيت حاسس أني عامل زي شريط الكاسيت..يعني يا اما روحت أماكن ودلقت البقين دول وكنب بسمع دايما في النهاية الجملة التاريخية الشهيرة حنكلمك كمان اسبوعين عشان دلوقتي المدير أو المسئول عن التعيين مسافر ولكن المرة دي حصلت المفاجأة وبيتر قاللي حتخش دلوقتي حتقابل المديرة الكبيرة عشان إنترفيو نهائي
أحمدك يا رب أخيرا لقيت مدير مش مسافر لألمانيا أو سويسرا أو إنجلترا
دخلت مكتب أنيق فيه ست في الثلاثينات من عمرها أو يمكن 40 بالكتير ولابسة صليب كبير
الست بصراحة وشها كان بشوش جدا وعليه إبتسامة تريح أي حد
لقيتها بتسألني
بتدخن..قلت لأ
بتشرب شيشة..قلت لأ
بتروح كنيسة إيه
يوووووووووووه حنعيده تاني...جاردن سيتي
لقيتها غيرت السؤل بإختلاف عن بيتر
أصحابك هناك كتير.؟
قلتلها لأ..تقريبا ماليش أصحاب هناك ومعظم أصحابي المقربيين مسلمين
بدأت البشاشة تنطفي شوية وشكلها يقلب جد..أوبااا
قالت لي إيه نشاطاتك في الكنيسة
قلتلها نشاط بمعني إيه؟
قالت لي :يعني أنت شماس ..بتقول كلمة في إجتماعات الشباب..بتطلع رحلات معاهم..مشترك في جروب ترانيم
لأ معنديش نشاط خالص في أي كنيسة بصراحة
الست وشها إنطفي وقالت لي:فرصة سعيدة وحنكلمك كمان أسبوعين
أنا خرجت بصراحة كأني مصعوق بتيار كهرباء 120 فولت..الولية دي مسألتنيش خالص أي حاجة ليها علاقة بالشغل ولا الوظيفة..ده أنا كنت فاكر نفسي داخل أمضي العقد زي الشغلانة إياها بتاعة الراجل السوداني
المهم بعدما خرجت جالي تليقون من واحدة زميلتي بتطمن عملت إيه في الإنترفيو
وبصراحة هيست كمية تهييس غير طبيعية من شدة الصدمة لدرجة أن الناس في الميكروباز كانوا بيبصولي أني مجنون
سألتني عملت إيه يا منيل المرة دي
قلتلها:راااااااااااااح..أصلي نسيت أجيب ابونا معايا في الإنترفيو ولو كان معايا كارت من البابا شنودة كان زماني بقيت مدير
نعم يا أخويا..تجيب مين
قلتلها اه والله وبعدين أنا غلطت وأنا داخل وقلت سلامو عليكم وبعد كده قلت صباح الخير وانا داخل ع المديرة..كنت المفروض أقول كيرياليصون وأدخل ومعايا شورية فيها بخور
بصراحة البت كانت حتقفل في وشي السكة لولا أني قلتلها حبقي افهمك بالتفصيل لما أروح وطبعا شرحتلها والبت إتقلبت من الضوحك خصوصا أن قبليها بأسبوعين كنت حبعت السي في بتاعتي في إحدي المجموعات الاستثمارية الكبيرة المعروفة جوه البلد ولكن واحدة صاحبتها بتشتغل في المجموعة قالت لها قوليوا ميبعتش السي في بتاعته عشان إسمه مايكل وحيتقلش من أول فرز أصلا
عمار يا مصر